1, 2. Ocitangi cipi Yefita kumue lomõla waye ufeko va liyaka laco?

UMALẼHE umue ufeko wa tunda vonjo lolupesi, oco a ñualehele la isiaye. Eye wa kuata esanju lialua eci a mola okuti, isiaye Yefita wa tiuka ciwa kuyaki. Omo okuti wa yula kuyaki, ca vetiya omõla waye oku imba ocisungo, kuenda oku piluka lesanju. Pole, omõla ufeko wa Yefita wa komõha calua omo liovina isiaye a linga, kuenda evi o sapuila. Noke, Yefita wa tola uwalo waye, kuenje wa kaluka loku popia hati: ‘Avoyo we, amõlange! Wa ndi sumuisa calua.’ Kuenje, Yefita wa sapuila komõla waye hati, nda linga ohuminyo ku Yehova okuti, yi pongolola ekalo liomuenyo wove. Ohuminyo Yefita a linga ya lombolokele okuti, omõla waye ka laikele oku kuela, ale oku cita omãla. Pole, omõla waye wa eca lonjanga etambululo liwa poku vetiya isiaye oco a tẽlise ohuminyo a linga ku Yehova. Etambululo liomõla wa Yefita lia lekisa okuti, wa kolelele okuti, ovina viosi Yehova a pinga kokuaye via sunguluka. (Olonganji 11:34-37) Eci Yefita a limbuka ekolelo omõla waye a kuata, wa yeva esanju lialua. Momo, wa kũlĩhĩle okuti onjongole yomõla waye ya laikele oku sanjuisa Yehova.

 ² efita kumue lomõla waye va lekisile ekolelo ku Yehova, kuenda konjila yaye yoku linga ovina. Ovo va lekisa ekolelo lialua ndaño okuti olonjanja vimue ka ca lelukile oku ci linga. Yefita kumue lomõla waye va likolisilako calua, momo va yonguile oku taviwa la Yehova.

3. Ongangu ya Yefita leyi yomõla waye yi tu kuatisa ndati koloneke vilo?

³ Ocili okuti, olonjanja vimue ka ca lelukile oku lekisa ekolelo ku Yehova. Omo liaco, tu sukila oku “yakela ekolelo” lietu. (Yuda 3) Pole, oco tu amameko oku ci linga, tu konomuisi ndomo Yefita kumue lomõla waye va pandikisa poku liyaka lovitangi komuenyo wavo. Ovo va lekisa ndati ekolelo ku Yehova?

4, 5. (a) Ocihandeleko cipi Yehova a ecele ku va Isareli eci va iñila Vofeka Yohuminyo? (b) Ndomo ca lomboluiwa Vosamo 106, nye ca pita la va Isareli omo liesino liavo?

⁴ Oloneke viosi Yefita kumue lomõla waye va enda o ku ivaluka ovitangi va Isareli va kuata omo okuti ka va pokuile ku Yehova. Eci kua kambele 300 kanyamo, Yehova wa ecele ocihandeleko ku va Isareli oco va ponde omanu vosi va enda oku fendela olosuku viesanda Vofeka Yohuminyo, pole ka va pokuile. (Esinumuĩlo 7:1-4) Valua pokati ka va Isareli va fetika oku kuama ongangu ya va Kanana yoku fendela olosuku viesanda, kuenda oku ambata omuenyo umue wa vĩha.—Tanga Osamo 106:34-39.

⁵ Omo okuti va Isareli ka va lekisile epokolo, Yehova ka va teyuilile kovanyãli vavo. (Olonganji 2:1-3, 11-15; Osamo 106:40-43) Vokuenda kuotembo yaco yovitangi, apata ana a lekisile ocisola ku Yehova, ka ca lelukile kokuavo oku amamako lekolelo. Pole, Embimbiliya li lekisa okuti, kua kala omanu vamue va lekisile ekolelo ndeci: Yefita, omõla waye ufeko, Elikana, Hana, kuenda Samuele. Ovo va nõlelepo oku sanjuisa Yehova.—1 Samuele 1:20-28; 2:26.

6. Ovituwa vipi violuali via siata koloneke vilo, kuenda nye tu sukila oku linga oco tu vi yuvule?

⁶ IKoloneke vilo, ovisimĩlo viomanu vamue kumue lovilinga viavo vi sokisiwa levi via va Kanana. Momo, va enda oku tiamisila lika ovisimĩlo viavo kukahonga, kungangala, kuenda kolombongo. Pole, Yehova wa siata oku tu ĩha alungulo. Eye o yongola oku tu teyuila ndeci a yonguile oku teyuila va Isareli kovina viaco vĩvi. Anga hẽ tu pondola oku lilongisila kovilinga viavo vĩvi? (1 Va Korindo 10:6-11) Omo liaco, tu sukila oku likolisilako oco tu yuvule ovisimĩlo violuali lulo. (Va Roma 12:2) Ka tu sukila hẽ oku likolisilako oku ci linga?

7. (a) Ovina vipi vĩvi vamanji a Yefita kumue lomanu vakuavo va linga kokuaye? (b) Nye Yefita a linga?

⁷ Koloneke via Yefita va Isareli va talisiwa ohali yalua la va Filisiti kuenda va Amoni. Momo, va Isareli ka va pokuile ku Yehova. (Olonganji 10:7, 8) Yefita ka liyakele lika lovitangi via tunda kovanyãli vaye. Pole, wa liyakavo lovitangi via tunda ku vamanjaye kuenda kasongui vo ko Isareli. Omo okuti Yefita vamanjaye vo suvukile calua, kuenda vo kuatela onya, vo kisika oku tunda vofeka yaye. (Olonganji 11:1-3) Pole, Yefita wa yuvula oku ecelela oku yapuisiwa lovilinga viavo vĩvi.  Tua ci kũlĩha ndati? Tua kũlĩha ulandu waco, momo eci akulu vofeka vo pinga oco a va kuatise eye wa tava. (Olonganji 11:4-11) Nye ca vetiya Yefita oku ci linga?

8, 9. (a) Olonumbi vipi vi sangiwa Vocihandeleko Yehova a ecele ku Mose okuti via kuatisa Yefita? (b) Ocina cipi ca kuatele esilivilo lia velapo ku Yefita?

⁸ Yefita wa kala ulume umue ukuotõi kuyaki, momo wa kũlĩhĩle ulandu wa va Isareli, kuenda Ocihandeleko Yehova a ecele ku Mose. Onjila Yehova a kuama poku kuatisa afendeli Vaye, ya longisa Yefita oku kũlĩha olonumbi via Yehova vioku tepisa pokati keci ciwa leci cĩvi. (Olonganji 11:12-27) Ovina Yefita a lilongisa vio kuatisa oku nõla onjila a sukilile oku kuama komuenyo waye. Eye wa kũlĩhĩle okuti Yehova o nyale onyeño loku fetuluinya, kuenda o yongola okuti afendeli Vaye va likuatela ocisola pokati. Ocihandeleko caco ca longisavo Yefita ndomo a sukilile oku tata omanu vakuavo oku kongelamo vana vo suvukile.—Tanga Etundilo 23:5; Ovisila 19:17, 18.

⁹ Citava okuti ongangu ya Yosefe ya kuatisavo Yefita. Eye wa lilongisa ndomo Yosefe a lekisa ohenda ku va manjaye ndaño okuti vo suvukile. (Efetikilo 37:4; 45:4, 5) Oku sokolola ulandu waco ca kuatisa Yefita oku lekisa ovituwa via sanjuisa Yehova. Ovina vamanji ya Yefita va linga, vio sumuisile calua. Pole, eci ca kuatele esilivilo lia velapo kokuaye, oku teyuila onduko ya Suku kumue lafendeli vaye okuti, ovisimĩlo viaye muẽle ci sule. (Olonganji 11:9) Eye wa nõlelepo oku kolela ku Yehova. Omo liocituwa Yefita a lekisa, Yehova wo sumũlũisa kumue la va Isareli.—Va Heveru 11:32, 33.

10. Tu pondola oku ecelela ndati okuti olonumbi via Yehova vi tu kuatisa oku lekisa ovituwa viwa koloneke vilo?

¹⁰ Ulandu wa Yefita u tu longisa nye? Nye tu sukila oku linga nda vamanji va tu sumuisa ale tua limbuka okuti va kasi oku tu tata lãvi? Ka tu ka eceleli okuti esumuo li tu tateka oku vumba Yehova. Ka tu ka liwekipo oku endaenda kolohongele, kuenda ka tu ka yuvuli oku kala otembo yalua la vamanji. Pole, tu sukila oku setukula Yefita loku pokola ku Yehova. Nda tua ci linga, ci tu kuatisa oku liyaka lovitangi, kuenda oku lekisa ongangu yiwa.—Va Roma 12:20, 21; Va Kolosai 3:13.

11, 12. Ohuminyo yipi Yefita a linga kuenda nye ca kongelele vohuminyo yaco?

¹¹ Yefita wa kũlĩhĩle okuti oco a yovole va Isareli ku va Amoni wa sukilile ekuatiso lia Suku. Eye wa lingile ohuminyo yokuti, nda Yehova wo kuatisa oku yula kuyaki, eci a tiukila konjo omunu wa tunda tete vonjo yaye, u weca ku Yehova “ndocilumba coku pia elisi.” (Olonganji 11:30, 31) Olondaka evi vi lomboloka nye?

¹² Yehova o nyãle oku eca  omanu ndovilumba. Omo liaco, tua kũlĩha okuti Yefita ka ecele omõla waye ndocilumba. (Esinumuĩlo 18:9, 10) Vocihandeleko Suku a ecele ku Mose, ocilumba coku pia elisi ca kuatele esilivilo lia velapo ku Yehova. Omo liaco, olondaka Yefita a popia via kuatele elomboloko liokuti, omunu a laikele oku eca ku Yehova, wa sukilile oku talavaya votavernakulu vokuenda kuomuenyo waye wosi. Yehova wa yevelela Yefita, kuenda wo kuatisa oku yula uyaki. (Olonganji 11:32, 33) Pole, helie Yefita a eca ku Yehova?

13, 14. Olondaka via Yefita vi sangiwa kelivulu Liolonganji 11:35 vi situlula nye catiamẽla kekolelo liaye?

¹³ Sokolola ulandu wa tukuiwa kefetikilo liocipama cilo. Eci Yefita a tiuka kuyaki, omõla waye ufeko eye wa tunda tete vonjo, kuenje wo yolela! Anga hẽ Yefita wa sukilile oku tẽlisa ohuminyo a lingile? Yefita wa ecele hẽ omõla waye ku Yehova oco a talavaye votavernakulu vokuenda kuomuenyo waye?

¹⁴ Olonumbi vi sangiwa Vocihandeleko ca Suku via kuatisa Yefita oku nõla onjila ya sunguluka. Citava okuti, Yefita wa ivaluka olondaka vielivulu Lietundilo 23:19, vi lombolola ndomo afendeli va Yehova Suku va sukilile oku lekisa onjongole yoku eca kokuaye ovina via velapo. Ocihandeleko ca lekisavo okuti, eci omunu a linga ohuminyo yimue ku Yehova, “ka ci tava vali oku tokoka ohuminyo yaye. Cosi ca tunda vomẽla waye oco a linga.” (Atendelo 30:2) Yefita wa sukilile oku tẽlisa ohuminyo yaye, ndeci ca pita la Hana ukuekolelo okuti, pamue wa kala kotembo yimuamue laye. Ndaño okuti Yefita wa kũlĩhĩle ovina via laikele oku pita lomõla waye kuenda eye muẽle, pole wa tẽlisa ohuminyo a linga. Omo okuti omõla wa Yefita wa sukilile oku talavaya votavernakulu, ka laikele oku cita omãla. Omo liaco, ka kua kalele omunu wa laikele oku piñala onduko ya Yefita, kuenda ofeka yaco. (Olonganji 11:34) Pole, Yefita wa lekisa ekolelo,  kuenje wa popia hati: “Lomẽla wange nda likuminya ku Yehova, kuenje si tẽla vali oku [litiukamo].” (Olonganji 11:35) Yehova wa tava ocilumba ca Yefita, kuenje wo sumũlũisa. Ove hẽ wa tẽlisile ale ohuminyo yimue ndeci Yefita a linga?

15. Ohuminyo yipi vosi yetu tua linga, kuenda tu pondola oku lekisa ndati okuti tu kasi oku yi tẽlisa?

¹⁵ Eci tua litumbika ku Yehova tua linga ohuminyo yokuti, tu yongola oku tẽlisa ocipango caye ndaño lovitangi. Tua kũlĩha okuti, olonjanja vimue ka ci leluka oku tẽlisa ohuminyo yaco. Pole, ocituwa cipi tu sukila oku lekisa nda va tu pinga oku linga upange umue ka tu sole? Nda tua yuvula ovisimĩlo ka via sungulukile kuenda tu pokola lika ku Suku, ci tu kuatisa oku lekisa okuti, tua kapako ohuminyo tua linga. Ndaño okuti tu liyaka lovitangi omo lioku tẽlisa ohuminyo tua linga, pole, tu pondola oku tambula asumũlũho alua ku Yehova. (Malakiya 3:10) Nye ci popiwa catiamẽla komõla wa Yefita? Eye wa tendele ndati ohuminyo isiaye a lingile?

16. Omõla wa Yefita wa tendele ndati ohuminyo isiaye a lingile? (Tala ociluvialuvia kefetikilo liocipama cilo.)

¹⁶ Ohuminyo Yefita a lingile ya li tepele leyi ya Hana. Momo, Hana wa likuminyile oku eca omõla waye Samuele ndu Nasiri oco a linge upange votavernakulu. (1 Samuele 1:11) Omunu una okuti u Nasiri wa kuatele omoko yoku kuela, kuenda oku cita omãla. Pole, Yefita wa ecele omõla waye ufeko “ndocilumba coku pia elisi.” Omõla waco ka kuatele esumũlũho lioku kuela loku cita omãla. (Olonganji 11:37-40) Sokolola ulandu owu! Omo okuti isiaye wa kala usongui wofeka yo Isareli, citava okuti, nda wa kueliwa lulume umue uwa. Pole, omo liumbombe a lekisa, wa nõlapo oku talavaya votavernakulu. Eye wa lekisa ndati okuti wa tava oku linga upange waco? Wa ci linga poku pitisa kovaso upange wa Yehova, poku sapuila isiaye hati: “Ndinge ndeci wa popia lomẽla wove.” (Olonganji 11:36) Omo liaco, wa nõlapo oku yuvula oku kuela, kuenda oku cita omãla oco a pitise kovaso upange wa Yehova. Tu pondola oku setukula ndati ongangu yaye yoku lieca olumue?

17. (a) Tu pondola oku setukula ndati ongangu ya Yefita leyi yomõla waye ufeko? (b) Olondaka viukanda wa Va Heveru 6:10-12, vi ku vetiya ndati oku lieca olumue kupange wa Yehova?

 ¹⁷ Amalẽhe valua va siata oku yuvula oku kuela, ale nda va kuela ka va yongola oku cita omãla cilo. Momo lie? Momo, va yongola oku tiamisila lika utima wavo kupange wa Yehova. Vamanji valua akulu va siatavo oku yuvula oku pesila otembo yalua koku kala lomãla vavo, ale lolonekulu. Pole, va nõlapo oku pesila otembo yavo kuenda ongusu yavo kupange wa Yehova. Vamue pokati kavo va siata oku songuila upange woku tunga Olonjango Viusoma kumue lolonjo vikuavo vioku fendela Yehova, kuenda vakuavo va siata oku pindisiwa Kosikola Yakundi Vusoma. Handi vali, kuli vamanji vamue okuti, va siata oku ilukila kovikanjo vina kuli ekambo liakundi. Vamanji vakuavo va siata oku nõlapo oku pesila otembo yalua kupange wa Yehova vokuenda kuotembo yocipito Conjivaluko. Yehova ka ivalako alikolisilo a vamanji vaco vakuekolelo. (Tanga Va Heveru 6:10-12.) Nye ci popiwa catiamẽla kokuove? Anga hẽ o pondola oku likolisilako oco o pesile otembo yalua kupange wa Yehova?

18, 19. Ulandu Wembimbiliya watiamẽla ku Yefita kumue lomõla waye u tu longisa nye? Tu pondola oku kuama ndati ongangu yavo?

¹⁸ Nye ca kuatisa Yefita oku yula ovitangi vialua a liyaka lavio? Eye wa ecelela okuti, Yehova u songuila poku nõla onjila ya sunguluka. Pole, ka ecelele oku yapuisiwa lomanu vana a kala lavo. Yefita wamamako lekolelo ndaño ceci a sumuisiwa lomanu vakuavo. Yehova wa sumũlũisa Yefita kumue lomõla waye omo lioku likolisilako oku linga upange va tambuile. Omo liaco, va kuatisa koku amamako lefendelo liocili. Ndaño okuti omanu va liwekelepo oku linga ovina via sunguluka, pole, Yefita kumue lomõla waye va pandikisa lekolelo ku Yehova.

¹⁹ Embimbiliya li popia hati: ‘Kali olosetukuli via vana okuti, omo liekolelo kuenda epandi va piñala olohuminyo.’ (Va Heveru 6:12) Omo liaco, tuamamiko oku setukula ongangu ya Yefita leyi yomõla waye ufeko. Momo, tua kũlĩha okuti, nda tua pandikisa lekolelo, Yehova o ka tu sumũlũisa.