1. Ocili cipi wa kũlĩha eci wa fetika oku lilongisa Embimbiliya?

 OVE hẽ wivaluka ovina viosi eci wa fetika oku lilongisa Embimbiliya? Pamue ove wa komõha poku limbuka okuti Suku o kuete onduko yimue. Citava okuti wa yeva ekavuluko eci wa limbuka okuti Suku ka kangisa omanu vifelu viondalu. Handi vali, citava okuti wa kuata esanju lialua poku kũlĩha okuti omanu va fa va ka kala vali lomuenyo voluali luokaliye palo posi.

2. Poku lilongisa ocili Cembimbiliya apongoloko api wa linga? (Va Efeso 5:1, 2)

² Osimbu wamamako oku lilongisa Ondaka ya Suku, ocisola o kuetele Yehova ca livokiya. Ocisola caco ca ku vetiya oku kapako ovina wa lilongisa. Ove wa tẽla oku nõla olonjila viwa vina via kunamẽla kolonumbi Viembimbiliya. Wa mioñolola ovituwa viove momo wa yonguile oku sanjuisa Suku. Ndeci omãla va setukula olonjali viavo vakuacisola, ove o kasi oku setukula Isiove wokilu.—Tanga Va Efeso 5:1, 2.

3. Apulilo api tu sukila oku lipula?

³ Tu pondola oku lipula ndoco: ‘Anga hẽ ocisola ndi kuetele Yehova cilo, ca livokiya okuti eci nda fetika oku lilongisa Embimbiliya ci sule? Tunde eci nda papatisiwa, ovisimĩlo viange kuenda ovilinga, vi likuata hẽ levi via Yehova, ca piãla enene poku lekisa ocisola ku vamanji?’ Nda wa limbuka okuti “ocisola wa kuatele tete” ca tepuluka, ku ka sumue. Cimuamue haico ca lipita Lakristão vo kocita catete. Yesu ka va likalele kuenda ka ka tu likalavo. (Esit. 2:4, 7) Eye wa kũlĩha okuti tu pondola oku tumbulula ocisola tua kuatele tete, eci tua fetika oku lilongisa Embimbiliya.

4. Nye tu konomuisa vocipama cilo?

 ⁴ Ocipama cilo, ci ka lombolola ndomo tu vokiya ocisola tu kuetele Yehova kuenda vakuetu. Noke tu ka lilongisa eci catiamẽla kasumũlũho tu ka kuata omo lioku vokiya ocisola caco.

5-6. Ovitangi vipi upostolo Paulu a liyaka lavio vokuenda kupange waye woku kunda, pole, nye co vetiya oku amamako oku vumba Yehova?

⁵ Upostolo Paulu wa sanjukilile oku tumbika omuenyo waye kupange wa Yehova, pole, oku ci linga ka ca lelukile. Paulu wa linga ovongende kovitumãlo viocipãla kuenda kotembo yaco ovongende ka a lelukile. Kovongende aco Paulu olonjanja vimue wa “kala kohele volondui” kuenda “kohele yovingumba.” Olonjanja vimue eye wa tipuiwavo lovanyali vaye. (2 Va Kor. 11:23-27) Kuenda vamanji vamue ka va kapeleko ovina Paulu a enda oku linga oco a va kuatise.—2 Va Kor. 10:10; Va Fil. 4:15.

⁶ Nye ca kuatisa Paulu oku amamako oku vumba Yehova? Paulu wa lilongisa ovina vialua viatiamẽla kovituwa via Yehova kuenda kovolandu eye muẽle a kuatele. Paulu wa kolelele okuti Yehova Suku wo solele. (Va Rom. 8:38, 39; Va Efe. 2:4, 5) Kuenje eye weya oku sola calua Yehova. Paulu wa lekisa ocisola a kuatelele Yehova poku “vumba olosandu, loku amamako oku va vumba.”—Va Hev. 6:10. 

7. Yipi onjila yimue yoku vokiya ocisola tu kuetele Yehova?

⁷ Etu tu pondola oku vokiya ocisola tu kuetele Suku, poku lilongisa Ondaka yaye olonjanja viosi. Osimbu o tanga Embimbiliya seteka oku limbuka eci ulandu lulandu u situlula catiamẽla ku Yehova. Lipula ndoco: ‘Ulandu owu u situlula nye catiamẽla kocisola Yehova a ndi kuetele? Ulandu waco u ñuatisa ndati oku sola Yehova?

8. Ohutililo yi tu kuatisa ndati oku vokiya ocisola tu kuetele Suku?

⁸ Onjila yikuavo tu vokiya ocisola tu kuetele Yehova, poku likutilila kokuaye olonjanja viosi lutima wosi. (Osa. 25:4, 5) Yehova o ka tambulula olohutililo vietu. (1 Yoa. 3:21, 22) Manji umue o tukuiwa Khanh wo ko Asia, wa popia hati: “Kefetikilo, ocisola cange ku Yehova ca kunamelele kukũlĩhĩso, pole, ocisola caco ca livokiya osimbu nda limbuka ndomo eye a kala oku tambulula olohutililo viange. Kuenje eci ca mbetiya oku linga ovina viu sanjuisa.” b

9. Timoteo wa lekisa ndati okuti wa kala oku vokiya ocisola a kuatelele vamanji?

⁹ Noke lianyamo amue tunde eci Paulu a linga Ukristão, wa lisanga lumalẽhe umue uwa o tukuiwa Timoteo. Timoteo wa solele Yehova kuenda omanu. Paulu wa sapuila va Filipoi hati: “Si kuete omunu ukuavo ndi tuma okuti, o kasi lonjongole ndeyi yaye [Timoteo] yoku vu tati ciwa.” (Va Fil. 2:20) Paulu ka tukuile uloño Timoteo a kuatele woku sokiya ciwa ovina, ale woku kala ohundi yiwa, pole, Paulu wa limbukile okuti Timoteo wa solele calua vamanji. Ocili okuti, vamanji kakongelo Timoteo a enda oku nyula, va ci limbukavo vokuenda kuapasu aye.—1 Va Kor. 4:17.

10. Manji Ana kumue lulume waye va lekisa ndati ocisola va kuatelele vamanji?

¹⁰ Etu tua siatavo oku sanda olonjila vioku kuatisa manjetu. (Va Hev. 13:16) Kũlĩhĩsa ulandu wa manji Anna wa tukuiwa kocipama ca pita. Noke yoku pita locilunga cimue, eye lulume waye va nyula epata limue Liolombangi Via Yehova kuenje va limbuka okuti ocilunga  ca nyõla olusoka luonjo luepata liaco. Omo liaco, epata liaco ka lia kuatele ovowalo a yela. Manji Anna wa popia hati: “Tua ambata ovowalo aco, tua u sukula, tua u ngomala kuenda tua u vaka ciwa, noke tua ka u tuale. Kokuetu ca kala ndu okuti ka tua lingile ovina vialua, pole, ca kuatisa oku kuata ukamba umue wa pama, una u kasi oku amamako toke etaili.” Ocisola manji Anna lulume waye va kuatela vamanji, ca va vetiya oku eca ekuatiso kokuavo.—1 Yoa. 3:17, 18.

11. (a) Vakuetu va liyeva ndati eci tu lekisa ocisola kokuavo? (b) Ndomo ca tangiwa Kolosapo 19:17, eci tu lekisa ocisola ku vakuetu, Yehova o ci tenda ndati?

¹¹ Eci tu lekisa ocisola cocili kuenda ohenda ku vakuetu, ovo va limbuka okuti tu kasi oku likolisilako oku setukula Yehova. Ovo va pondola oku limbuka ocituwa cetu cohenda okuti etu muẽle ci sule. Manji Khanh wa tukuiwa ale, ivaluka locisola calua, vana va ecele ekuatiso kokuaye. Eye wa popia hati: “Mandula calua vamanji vosi va likolisilako oku ndi kuatisa. Ovo veyile konjo yange, va ndi laleka oku lia lavo kuenda va linga aliangiliyo okuti ndi kolapo konjo yange. Cilo, nda limbuka okuti ca kala upange walua kokuavo. Pole, ovo va sanjukilile oku ci linga.” Ocili okuti, havosiko va ka eca olopandu kokuetu kueci tu va lingila. Manji Khanh wa popia eci catiamẽla ku vana vo kuatisa hati: “Nda yonguila oku tiula ovina viosi va ndingila omo liohenda va lekisa kokuange, pole, sia kũlĩhĩle apa va kasi. Omo liaco, Yehova a ci linga kuenda ndi likutilila lika oco eye a ci ndingile.” Manji Khanh o kuete esunga lioku vangula olondaka viaco. Yehova wa kũlĩha ovina viosi tu lingila vakuetu, ndaño okuti citito. Eye o ci tenda ndombanjaile yimue yi kuete esilivilo kuenda ndofuka yimue eye a ka feta.—Tanga Olosapo 19:17.

12. Vamanji va pondola oku lekisa ndati ocisola cavo vekongelo? (Talavo ociluvialuvia.)

 ¹² Nda ove vumanji umue, o lekisa ndati ocisola ku vakuene kuenda oku va lingila ovina vi va kuatisa? Manji umue umãlehe o tukuiwa Jordan, wa pula kukulu umue wekongelo eci a ponduile oku linga oco a kuatise ekongelo. Ukulu wekongelo wo pandiya omo lioku kula kuaye konepa yespiritu kuenda wo sapuila ndomo a ponduile oku amamako oku ci linga. Ndeci, eye wa sapuila manji Jordan oco a kuate ocituwa coku pitĩla selo Vonjango Yusoma kuenda oku lama vana veya, oku eca atambululo kolohongele, oku kundila kumosi la vamanji vo vocimunga caye kuenda oku sokolola kovina a ponduile oku linga oco a kuatise vakuavo. Manji Jordan ka kaile lika oku lilongisa ovina viokaliye, pole, wa kala oku vokiya ocisola a kuetele vamanji. Manji Jordan wa lilongisa okuti, eci manji umue a linga oñuatisi yekongelo, eye ka fetika lika oku kuatisa vakuavo, pole, amamako oku va kuatisa.—1 Tim. 3:8-10, 13.

13. Ocisola ca vetiya ndati manji umue o tukuiwa Christian oku kala vali ukulu wekongelo?

¹³ Nye ci popiwa nda kosimbu ove wa kala oñuatisi yekongelo ale ukulu wekongelo? Yehova ka ivaleleko upange ove wa linga kosimbu kuenda ocisola ca ku vetiya oku ci linga. (1 Va Kor. 15:58) Eye o letevo ocisola wa siata oku lekisa. Manji umue o tukuiwa Christian, wa sumuile calua eci a liwekapo oku kala ukulu wekongelo. Pole, eye wa popia hati: “Nda nõlapo oku likolisilako oku linga cosi ndi tẽla poku vumba Yehova omo liocisola ndu u kuetele okuti, si ci lingi omo liovikele.” Vokuenda kuotembo, eye wa linga vali ukulu wekongelo. Manji Christian hati: “Sia yonguile vali oku kala ukulu wekongelo. Pole, nda sokolola okuti, nda Yehova omo liohenda  yaye o yongola okuti ndi kala vali ukulu wekengelo, ame ndi ci linga omo liocisola ndi kuetele Yehova kuenda vamanji.”

14. Nye tu lilongisila kolondaka via manji umue ukãi woko Georgia?

¹⁴ Afendeli va Yehova, va siatavo oku lekisa ocisola cavo komanu vana va lisungue lavo. (Mat. 22:37-39) Ndeci, Manji Elena o kasi kofeka yo Georgia, wa popia hati: “Ocina catete ca mbetiya oku kunda, ocisola ndi kuetele Yehova. Pole, osimbu ocisola ndi kuetele Isiange wokilu ca kala oku li vokiya, ocisola ndi kuetele omanu ca kalavo oku li vokiya. Nda sokolola ovitangi ovo va siata oku liyaka lavio kuenda ovina nda ponduile oku popia oco ci vetiye utima wavo. Osimbu ndaenda oku kuata ovisimĩlo viaco, onjongole yange yoku va kuatisa ya kalavo oku livokiya.”—Va Rom. 10:13-15.

15-16. Ndomo ci lekisiwa vociluvialuvia, asumũlũho api eyilila koku lekisa ocisola ku vakuetu?

¹⁵ Eci tu lekisa ocisola ku vamanjetu, havoko lika va kuatisiwa. Eci efengi lio KOVID-19 lia fetika, manji umue o tukuiwa Paolo kumue lukãi waye, va kuatisa vamanji valua akãi va kuka ndomo va lilongisa oku kunda lo telefone, o tablet ale o kombutadore. Manji umue ukãi okuti kefetikilo ka tẽlele oku talavaya lovimalẽho viaco, noke wa ci tẽla. Eye wa talavaya lovimalẽho viaco oco a laleke vakuepata liaye oku kala Kocipito Conjivaluko. Va soka  epandu komanu vepata liaye, va kala Kocipito Conjivaluko lekuatiso lio videoconferencia! Manji yaco ukãi kumue lepata liaye ka va lilongisa ocili, va kuatisiwa lalikolisilo a lingiwa la manji Paolo kuenda ukãi waye. Noke manji yaco wa sonehela manji Paolo hati: “Nda pandula omo lioku tu longisa etu tua kuka. Lalimue eteke ndi ka ivalako ndomo Yehova a siata oku tu tata kuenda alikolisilo ene oku tu kuatisa.”

¹⁶ Ovolandu nda-a a longisa manji Paolo, ocina cimue ci kuete esilivilo. Eye wa ivaluisiwa okuti ocisola oco ci kuete esilivilo lialua okuti ukũlĩhĩso ale ovoloño ci sule. Wa amisako hati: “Nda kala kupange woku nyula akongelo. Cilo ndi limbuka okuti, ndaño pamue akundi va ivalako olohundo nda linga, ovo handi va ivailuka ekuatiso nda eca kokuavo.”

17. Esumũlũho lipi tu ka kuata eci tu lekisa ocisola?

¹⁷ Eci tu lekisa ocisola ku vakuetu, tu kuatisiwa lonjila yimue ka tua lavokaile. Manji Jonathan o kasi ko Nova Zelandia, o tava kondaka yaco. Vocasapalo cimue kekumbi okuti kua kala owuya walua, eye wa mola ukundi umue wotembo yosi wa kala oku kunda vetapalo. Manji Jonathan wa nõlapo oku kundila kumosi la manji yaco ukundi wotembo yosi, Vocasapalo ca kuamamo kekumbi. Vepuluvi liaco, eye ka limbukile ndomo a ponduile oku kuatisiwa omo lielinga liaco liohenda. Manji Jonathan wa popia hati: “Kotembo yaco sia solele upange woku kunda. Pole, nda enda oku yeva onjila akundi votembo yosi va kuama poku longisa kuenda onima va enda oku kuata kupange woku kunda kuenje ca ñuatisa oku sola upange woku kunda. Nda lingavo ukamba la manji umue wa ñuatisa oku kula konepa yespiritu, oku sola upange woku kunda kuenda oku kuata ukamba uwa la Yehova.”

18. Nye Yehova a tu yonguila?

¹⁸ Yehova o yongola okuti vosi yetu, tu vokiya ocisola tu u kuetele kuenda ocisola tu kuetele omanu. Ndomo tua lilongisa, tu pondola oku pamisa ocisola tu kuetele Yehova poku tanga Ondaka yaye loku sokolola kueci tua tanga kuenda oku sapela laye olonjanja viosi vohutililo. Tu pondolavo oku vokiya ocisola tu kuetele vamanjetu poku eca ekuatiso ovo va sukila. Osimbu ocisola cetu ci livokiya, tu ka kuata ukamba uwa la Yehova kuenda la vamanjetu. Kuenje ukamba waco u ka amamako otembo ka yi pui!