OCIPAMA CELILONGISO 23
OCISUNGO 28 Kala Ekamba Lia Yehova
Yehova o tu Laleka Oco tu Kale Akombe Vaye
“Ombalaka yange yi ka kala lavo kuenda ame ndi ka linga Suku yavo.”—ESEK. 37:27.
OCIMÃHO CELILONGISO
Oku vokiya onjongole yetu kelaleko lia Yehova oco tu kale akombe vombalaka yaye kuenda oku sanjukila onjila ndomo Eye a siata oku tu tata.
1-2. Elaleko lipi Yehova a linga kafendeli vaye vakuekolelo?
NDA umue wa ku pula okuti helie Yehova, ove nda wa tambulula ndati? Pamue nda wa tambulula hati: ‘Yehova Isiange, Suku yange kuenda Ekamba liange.’ Handi vali, kuli olonduko vikuavo viesumbilo kuenda olondaka vi tiamisiwila ku Yehova. Anga hẽ wa sokoluile ale okuti, Yehova wa ku yekisavo?
2 Soma Daviti wa sokisa Yehova nda umue ukuakuyekisa kuenda afendeli Vaye va sokisiwa ndakombe. Daviti wa pula hati: “A Yehova, helie o sesamẽla oku kala vombalaka yove? Helie o sesamẽla oku tunga vomunda yove yi kola?” (Osa. 15:1) Ndomo ca lomboluiwa vocinimbu eci, etu tu kuete elomboloko liokuti tu pondola oku kala akombe vombalaka ya Yehova, ale oku kala akamba vaye. Ove hẽ ku tava okuti eli elaleko limue lilikasi Yehova a linga kokuetu?
YEHOVA O YONGOLA OKUTI TU KALA AKOMBE VAYE
3. Helie ukombe watete wa Yehova kuenda ukamba upi wa kala pokati kavo?
3 Osimbu Yehova ka lulikile ovina viosi, eye wa kala lika liaye. Noke wa lulika Omõlaye wongunga. Ca kala ndu okuti, Yehova wa laleka ukombe waye watete vombalaka yaye kuenje wa sanjukila calua oku u Yekisa. Embimbiliya li lekisa okuti Yehova wa “sanjukilile calua” Omõlaye. Handi vali, omolaye “otembo yosi wa sanjukilile [Yehova] kovaso aye.”— Olosap. 8:30.
4. Velie veya oku lingavo akombe va Yehova?
4 Yehova wa lulika ovangelo okuti veyavo oku kala akombe vaye. Ovangelo va tukuiwa okuti “omãla va Suku” kuenda Embimbiliya li va tukula okuti, va kuete esanju omo lioku kala kumue la Yehova. (Yovi 38:7; Dan. 7:10) Vokuenda kuanyamo alua, akombe va Yehova va kala lika vana va kala laye kilu. Pole, noke Yehova wa lulika omanu mulo vongongo, oco va kalevo akombe vombalaka yaye. Vamue pokati kakombe vaco Enoke, Noha, Avirahama kuenda Yovi. Embimbiliya li popia hati, ovo va kala akamba va Suku, momo va pokola kuenda va endaenda “la Suku yocili.”—Efet. 5:24; 6:9; Yovi 29:4; Isa. 41:8.
5. Nye tu lilongisila kocitumasuku ci sangiwa ku Esekiele 37:26, 27?
5 Vokuenda kuanyamo alua Yehova wamamako oku laleka akamba vaye, oco va kale akombe vaye. (Tanga Esekiele 37:26, 27.) Ndeci, vocitumasuku ca Esekiele tua lilongisa okuti, Yehova o yongola okuti afendeli vaye va kuata ukamba wocili laye. Eye wa likuminya oku linga “ocisila cimue combembua lavo.” Ocitumasuku eci ci lombolola otembo vana va kuete elavoko lioku enda kilu la vana va kuete elavoko lioku kala palo posi, va laikele oku kala kumosi vombalaka yaye ‘ndocunda cimuamue.’ (Yoa. 10:16) Ocitumasuku eci ci kasi oku tẽlisiwa koloneke vilo!
YEHOVA O PONDOLA OKU TU TATA KOVITUMÃLO VIOSI TU SANGIWA
6. Omunu umue o kala ndati ukombe vombalaka ya Yehova kuenda pi ku sangiwa ombalaka Yaye?
6 Kosimbu, ombalaka ya kala ocitumãlo cimue omunu umue a ponduile oku puyukila kuenda oku teyuiwa omo liutanya, ale ombela. Ukombe umue vombalaka, wa ponduile oku tula utima poku kũlĩha okuti wa laikele oku teyuiwa. Eci tu litumbika ku Yehova tu linga akombe vombalaka yaye yocindekaise. (Osa. 61:4) Vombalaka yaco, tu kuete okulia kualua kuespiritu tu sukila, oco tu amamiko oku linga akamba va Yehova kuenda oku kala la vana okuti akombevo vaye. Kocitumãlo cosi tu sangiwa, vosi yetu tu pondola oku kala akombe va Yehova. Ndeci, pamue wa lingile ale ungende kofeka yikuavo, oco wende kohongele yimue yilikasi kuenje wa kũlĩha vamanji vakuavo okuti, va kuetevo esanju lioku kala vombalaka ya Yehova. Ombalaka ya Yehova yi kasi kolofeka viosi ku sangiwa afendeli vaye.—Esit. 21:3.
7. Momo lie tu popela hati afendeli va Yehova vana va fa ale, handi va kasi vombalaka yaye? (Talavo ociluvialuvia.)
7 Nye ci popiwa catiamẽla kafendeli va Yehova okuti va fa ale? Anga hẽ tu pondola oku popia okuti ovo handi akombe vombalaka ya Yehova? Oco! Momo lie tu ci popela? Momo ku Yehova omanu vaco handi va kasi lomuenyo vovisimĩlo viaye. Yesu wa popia hati: “Catiamẽla kuava va ka pinduiwa, ndaño muẽle Mose, wa lekisa vulandu wocisapa eci a tukula Yehova okuti, eye ‘Suku ya Avirahama, Suku ya Isake kuenda Suku ya Yakoba.’ Eye ha Sukuko yava va fa, te yava va kasi lomuenyo, momo kokuaye vosi va kasi lomuenyo.”—Luka 20:37, 38.
Afendeli vakuekolelo va fa ale, va pondola oku tendiwa ndakombe va Yehova vombalaka Yaye (Tala ocinimbu 7)
ASUMŨLŨHO TU KUETE KUENDA OCIKELE
8. Asumũlũho api tu kuete omo lioku kala vombalaka ya Yehova?
8 Ndeci ci kasi ombalaka yimue okuti, ocitumãlo cepuyuko kuenda ociteyuilo cofela, ombalaka ya Yehova yi teyuilavo akombe vaye kovina viosi vi koka ohele konepa yespiritu kuenda yi tu ĩhavo elavoko lio kovaso yoloneke. Eci tu kala ocipepi la Yehova, Satana ka tẽla oku tu linga cimue cĩvi otembo ka yi pui. (Osa. 31:23; 1 Yoa. 3:8) Voluali luokaliye, Yehova ka kamamako lika oku teyuila akamba vaye vakuekolelo kohele yonepa yespiritu, pole, o ka va teyuilavo kolofa.—Esit. 21:4.
9. Ovituwa vipi Yehova a lavoka ku vana okuti akombe vaye?
9 Ocili okuti, esumũlũho linene oku kala akombe vombalaka ya Yehova kuenda oku kuata ukamba wocili laye una u kala otembo ka yi pui. Pole, nda tu yongola oku amamako oku kala akombe va Yehova, ovituwa vipi tu sukila oku kuata? Nda wa lalekiwa konjo yimue, o lavoka okuti muẽleanjo oku sapuila ovina o sukila oku linga. Ndeci, pamue muẽleanjo o ku sapuila oco o lule olosapato osimbu kua ñilile kuenda ove o tava oku linga eci a ku pinga. Cimuamue haico okuti, tu yongolavo oku kũlĩha ovina Yehova a yongola okuti akombe vaye vamamako oku kala vombalaka yaye. Ocisola tu kuetele Yehova ci tu vetiya oku likolisilako oku “u sanjuisa calua.” (Va Kol. 1:10) Yehova Ekamba kokuetu, pole, tu sukilavo oku ivaluka okuti eye Suku yetu kuenda Isietu. Omo liaco, eye o sesamẽla esumbilo lietu. (Osa. 25:14) Poku sokolola ovina viaco, tu vetiyiwa oku komõha Yehova olonjanja viosi kuenda oku ivaluka ndomo eye a tuwa. Esumbilo liaco, li ka tu kuatisa oku yuvula ocina cosi ci sumuisa Yehova. Ocili okuti, etu tu yongola oku ‘endaenda la Suku yetu lesuluviko!’—Mika 6:8.
YEHOVA KA TATELE VA ISARELI LOCAME
10-11. Onjila ndomo Yehova a tata va Isareli eci va kala vekalasoko lio ko Sinai, ya lekisa ndati okuti omanu vosi vamuamue?
10 Yehova ka lekisa ocame poku tata akombe vaye. (Va Rom. 2:11) Etu tu pondola oku limbuka okuti Yehova hokuacameko, konjila ndomo a tata va Isareli eci va kala vekalasoko lio Sinai.
11 Yehova noke lioku yovola afendeli vaye kupika Kegito, wa nõla ovitunda oco vi vumbe vo tavernakulu. Va Lewi va nõliwile oco va linga ovopange akuavo atiamẽla kocitumãlo caco ci kola. Anga hẽ vana va kala oku vumbila vo tavernakulu, ale vana va tungile ocipepi layo, Yehova wa va tata lonjila ya velapo okuti, vakuavo ci sule? Sio! Ku Yehova omanu vosi vamuamue, momo eye hokuacameko.
12. Yehova poku tata va Isareli vekalasoko, wa lekisa ndati okuti eye hokuacameko? (Etundilo 40:38) (Tala ociluvialuvia.)
12 Omunu lomunu pokati ka va Isareli, wa ponduile oku kala ekamba lia Yehova ci kale okuti wa kala ocipepi lo tavernakulu, ale wa kala ocipãla layo. Ndeci, Yehova wa ecelela okuti epata liosi lia va Isareli, li mola elende kuenda ulienge wondalu wa kala kilu lio tavernakulu. (Tanga Etundilo 40:38.) Eci elende lia enda oku votoka oco li va songuile konepa yikuavo, ndaño muẽle vana va kala ocipãla lo tavernakulu, va ponduilevo oku ci mola. Kuenje apata a ponduile oku longeka ovikuata viavo, loku longolola olombalaka kuenda oku kuama epata liosi. (Ate. 9:15-23) Handi vali, ovo va ponduile oku yevelela ciwa alumbeta avali o palata, a enda oku eca ondimbukiso kepata liosi oku tunda vovilombo viavo. (Ate. 10:2) Oku kala ocipepi lo tavernakulu ka ca lombolokele okuti, omunu wa ponduile oku kuata ukamba wocili la Yehova okuti, vana va kala ocipãla ci sule. Pole, epata liosi lia litumbikile ku Yehova, lia ponduile oku kala akombe vaye kuenda oku tambula olonumbi, leteyuilo liaye. Cimuamue haico koloneke vilo, kuosi tu sangiwa kilu lieve, vosi yetu tu pondola oku limbuka ocisola ca Yehova poku tu tata kuenda eteyuilo liaye.
O tavernakulu ya kala vokati kocilombo, ocindekaise cokuti Yehova hokuacameko (Tala ocinimbu 12)
KOLONEKE VILO YEHOVA O LEKISAVO OKUTI HOKUACAMEKO
13. Volonjila vipi Yehova a lekisa okuti hokuacameko koloneke vilo?
13 Afendeli va Suku koloneke vilo va kasi ocipepi lombala Yolombangi Via Yehova, ale lo Betele. Vamue handi va kasi kovitumãlo viaco. Omo liaco, valua pokati kavo va linga onepa kovopange alua a siata oku lingiwa kovitumãlo viaco kuenda va kuete ukamba wa pama la vana va songola ocisoko. Vamue va kasi koku nyula akongelo, ale kovopange akuavo a likasi. Pole, nda ove ku kasi kupange waco, kolela okuti Yehova ukuakuyekisa, o sole akombe vaye vosi oku kongelamo ove. Eye o ka ku ĩha cosi o sukila. (1 Pet. 5:7) Vosi vana va panga onepa kepata lia Suku, va tambula okulia kuespiritu kuenda olonumbi leteyuilo va sukila.
14. Ulandu upi ukuavo u lekisa okuti Yehova hokuacameko koloneke vilo?
14 Ocina cikuavo ci lekisa okuti Yehova hokuacameko haeye uwa koku yekisa, poku ecelela okuti, omanu voluali luosi va kuata Embimbiliya. Ovisonehua vi Kola, catete via sonehiwa kalimi atatu: O Heveru, o Aramaiko kuenda o Helasi. Anga hẽ vana va tẽla oku tanga kelimi liatete kua sonehiwa Embimbiliya, ovo lika va kuete ukamba wa wocili la Yehova okuti, vana ka va vangula elimi liaco ci sule? Sio, hacoko.—Mat. 11:25.
15. Uvangi upi tu kuete u lekisa okuti Yehova ka kuete ocame? (Talavo ociluvialuvia.)
15 Oco tu kale akamba va Yehova ka tu sukila oku tanga calua ale oku kuata uloño woku vangula alimi alua. Yehova ecelela okuti, tu kuata ukamba laye kuenda eca ukũlĩhĩso komanu vosi voluali, ci kale okuti va tanga calua, ale sio. Ondaka ya Yehova Embimbiliya, lia pongoluiwa ale kolohuluwa vialimi kuenje lonjila eyi, omanu voluali luosi va pondola oku limbuka esilivilo lioku pokola kovina eye a longisa kuenda oku kala akamba vaye.—2 Tim. 3:16, 17.
Momo lie oku pongoluiwa Kuembimbiliya kalimi alua, uvangi wokuti ku Yehova omanu vosi vamuamue? (Tala ocinimbu 15)
AMAMAKO OKU KALA UKOMBE WA YEHOVA
16. Ndomo ca tangiwa Kovilinga 10:34, 35, nye tu sukila oku linga oco tuamameko oku kala akombe va Yehova?
16 Hesumũlũhokuolio ove oku lalekiwa la Yehova oco o kale ukombe vombalaka yaye! Yehova usongui umue wa velapo koku yekisa kuenda ukuacisola. Handi vali, kokuaye omanu vosi vamuamue. Eye o laleka omanu vosi kovitumãlo va sangiwa, ci kale ohukũi ale ohuasi, ava va tanga lava ka va tangele, akova a litepa, lapata, lovitunga via litepa, alume, lakãi. Vosi vana va kapako olonumbi via Yehova va pondola oku taviwa oco va kale akombe vaye.—Tanga Ovilinga 10:34, 35.
17. Pi tu pondola oku sanga olonumbi vi tu kuatisa oku kala akombe vombalaka ya Yehova?
17 Ndomo ca Kosamo 15:1, Daviti wa pula hati: “A Yehova, helie o sesamẽla oku kala vombalaka yove? Helie o sesamẽla oku tunga vomunda yove yi kola?” Yehova wa vetiya Daviti oku tambulula apulilo aco. Vocipama ci kuãimo, tu ka konomuisa olonumbi vimue tu sukila oku kapako oco tuamamiko oku taviwa la Yehova.
OCISUNGO 32 Tiamẽli ku Yehova!
