Ocili okuti, olondonge vi soka 70 ka via kalepo, eci Yesu a linga Ondalelo ya Ñala, pole, eci ka ci lomboloka okuti ovio vio yandulukile, ale Yesu ka vi kapeleko vali. Ocili ceci okuti, vepuluvi liaco Yesu wa yonguile lika oku kala lovapostolo vaye.

Ci kaile ovapostolo 12 kuenda olondonge vi soka 70 vosi yavo va kala oloñame via Yesu. Catete, Yesu wa nõlele eci ci soka 12 kalume pokati kolondonge vialua eye a kuatele kuenda wa va tukula okuti ovapostolo. (Luka 6:12-16) Eye wa kala ko Galilea eci a “kovonga ovapostolo Ekũi la Vavali” kuenje “wa va tuma oku kunda Usoma wa Suku kuenda oku sakula.” (Luka 9:1-6) Noke, Yesu ko Yudea “wa nõla olondonge vikuavo vi soka 70 kuenje wa vi tuma vivali vivali.” (Luka 9:51; 10:1) Eci ci lekisa okuti, Yesu wa kuatele olondonge kovitumãlo via liyekaila kuna esapulo liaye lia kala oku kundiwa.

Va Yudea vana va linga olondonge via Yesu handi va sukilile oku linga ocipito co Paskoa ca lingawaile unyamo lunyamo, citava okuti ovo va ci lingaile kumosi lapata avo. (Etu. 12:6-11, 17-20) Eci kua kambele otembo yitito oco Yesu a fe, eye kumue lovapostolo vaye va endele ko Yerusalãi. Pole, eye ka kovongele olondonge viaye viosi vio ko Yudea, vio ko Galilea kuenda vio ko Perea, oco ku lingiwe ocipito cinene co Paskoa. Eci ci situlula okuti, Yesu wa yonguile lika oku kala lovapostolo vepuluvi liaco. Eye wa sapuila 12 hati: “Nda yonguile calua oku lia o Paskoa eyi kumue lene, osimbu sia talele ohali.”—Luka 22:15.

Yesu wa kuata asunga awa oku ci linga. Momo wa laikele oku fa ‘Ndokameme ka Suku, una upa akandu oluali.’ (Yoa. 1:29) Yesu wa laikele oku fila ko Yerusalãi kuna kua enda oku eciwa ovilumba ku Suku vokuenda kuotembo yalua. O Paskoa ya enda oku ivaluisa va Isareli eci Yehova a linga oco a va yovole Kegito. Pole, ocilumba ca Yesu ca laikele oku velapo, momo ca ponduile oku yovola omanu vosi kekandu kuenda kolofa. (1 Va Kor. 5:7, 8) Okufa kua Yesu kua ecelela okuti 12 kovapostolo, va kala ociseveto cekongelo Liakristão. (Va Efe. 2:20-22) Ci komõhisa ceci okuti olupale lukola luo Yerusalãi lu kuate “12 koviseveto viovawe,” kuna kua sonehiwa ‘olonduko viovapostolo 12 va Kameme.’ (Esit. 21:10-14) Eci ci lekisa okuti ovapostolo vakuekolelo va laikele oku kuata ocikele cimue ci kuete esilivilo, koku tẽlisiwa kuocipango ca Suku. Omo liaco, ca sunguluka okuti Yesu o kala lavo ko Paskoa yaye ya sulako kuenda Konjivaluko eye a linga noke, okuti Ondalelo ya Ñala.

Ci soka 70 kolondonge via Yesu kuenda vakuavo, ka va kale laye kondalelo yaco ya sulako. Pole, ndaño ndoco olondonge viosi vakuekolelo va ponduile oku kuatisiwa lasumũlũho Ondalelo ya Ñala. Kuenje olondonge viosi vina okuti vokuenda kuotembo via linga Akristão olombuavekua, via ponduilevo oku iñila vocisila Cusoma Yesu a tukuilile ovapostolo vuteke waco wa sulako.—Luka 22:29, 30.