Omanu va Vetiwa Lehunguhungu ko Mianmar Va Kuatisiwa

KETEKE liavali kosãi ya Kupemba, kunyamo wo 2008, Ehunguhungu li tukuiwa hati, Nargis, lia veta longusu yalua ofeka yo Mianmar, kuenje esapulo liaco lia li sanduila kolofeka viosi. * Ci pitãhala 140.000 komanu, va fa, vakuavo va nyẽlela noke liehunguhungu liaco omo liovava alua a pesekela Vofeka yaco.

Eci ci komõhisa oku limbuka okuti Olombangi Via Yehova vialua ka via vetiwile calua locitangi caco. Ovo va puluka omo va tilila Vonjango Yusoma. Eci ci soka 20 Kolombangi Via Yehova kuenda 80 komanu vakuavo, va kala kolusoka Luonjango Yusoma vokuenda kuolowola ecea, toke eci ovava a tepuluka utunga wolometulu vitãlo. Vosi yavo va puluka. Pole ci soka 300 komanu vakuavo va kala vimbo liaco, va fa. Kovaimbo alua olonjo viosi via teka teka, Olonjango Viusoma ovio lika via supapo.

Noke yoloneke vivali pana okuti ehunguhungu lia pita, Ofiliale Yolombangi Via Yehova ko Yangon, ya tuma omanu kakongelo o kimbo lio Bothingone lia kala pasango olui. Poku ka tuala oluoso, omasa, ovava lolovela, vonjila va pita mua kala ovimunu kuenda mue yukile ovivimbi viomanu va fa lehunguhungu. Ovo va pitĩla tete kocitumãlo caco. Noke yoku eca okulia Kolombangi Via Yehova, va va lembeleka loku va sila alivulu kuenda Ambimbiliya, omo ovina viavo viosi via nyõliwa lehunguhungu.

Ocituwa Olombangi Via Yehova via vetiwa lehunguhungu va lekisa, ca  komõhisa omanu valua. Umue pokati kolombangi viaco, wa popia hati: “Ovina viosi tua kuata via nyõleha. Olonjo vietu via teka teka. Ovapia a enda lendunde. Ovava oku nyua, osi a lĩha. Pole, vamanji alume lakãi ka va yokokele ndomanu vakuavo. Ovo va kolela Yehova kuenda ocisoko caye. Ci kale okuti tu kala vimbo, ale tu enda kumue kuiñi, tuka kapako olonumbi va tu ĩha.”

Ocimunga cikuavo ca 30 Kolombangi Via Yehova okuti va peselavo ovina viavo, va imba lesanju ovisungo Viusoma poku linga ungende wolowola ekũi, eci va kala oku enda oku ka tambula okulia, uwalo kuenda ovina vikuavo. Osimbu ka va endele kocitumãlo caco va yeva okuti ohongele yinene Yolombangi Via Yehova ya laika oku lingiwila volupale lua kala ocipepi. Kuenje va sokiya oku enda tete kohongele oco va tambule eteku liespiritu kuenda oku pamisiwa la vamanji Akristão.

Konepa kua pita ehunguhungu, ci soka 35 kolonjo Violombangi Via Yehova, via teka teka, 125 kolonjo vikuavo kuenda 8 Kolonjango Viusoma ka via nyõlehele calua. Pole tu eca olopandu ku Suku omo ofiliale ka ya nyõlehele.

Vokuenda kuoloneke vimue o Filiale ka ya talavayele omo vetapalo mua kupukilile oviti. Noke liokatembo kamue, ci soka 30 komanu vo ko Filiale, vopa oviti via kala vetapalo. Omanu va komõha upange waco. Eci vamanji akãi va nena ovava oku nyua lapako kolonalavayi loku kongelamo omanu vakuavo, ava va ci mola va komõha. Kuenje ulume umue ukuasapulo wa pula hati: “Omanu va kasi oku talavaya ndeti lombili, pi va tunda?” Eci vo sapuila oku omanu vaco va tunda, eye wa popia hati: “Nda omanu vosi va kasi vimbo lietu va kaile Ndolombangi Via Yehova, nda ca posoka calua!”

Olombangi Via Yehova, lonjanga yalua, via kapa oloseketa vivali vioku kuatisa vana va pita locilunga. Ci soka ocita komanu va li tumbika kupange waco. Kuenje vokuenda kuoloneke vimue, Olombangi Via Yehova via tungila olonjo viokaliye vamanji vana olonjo viavo via nyõlehele. Eci vamanji vakuakutunga va pitĩla oco va tungile manji umue ukãi onjo yokaliye, omanu vo vimbo liaco ka va simĩle okuti ci tẽliwa. Umue pokati kavo wa popia hati: “Ombangi eyi ya Yehova, onjo yaye ya tungiwa la vakuetavo liavo. Puãi, lomue ukuetavo lietu lio Budista weya oku ndi kuatisa. Eci Olombangi Via Yehova vi keya oku ndi kuatisa, ndi tava kokuavo!”

Eci olonalavayi vio seketa yombiali via pitĩla vimbo lio Thanlyn locisimĩlo coku semũlula onjo yimue, via komõha calua eci Ombangi yimue ya Yehova ya va sapuila hati: “Etu ka tu kuete ocitangi. Onjo yetu handi yi kasi ciwa. Tu kala muẽle mulo! Ka kuatisi vamanji vakuavo ka va kuete olonjo!”

Kimbo lio Yangon, omanu vamue va seteka oku tilila vonembele. Pole, apito ayo a yikiwile, kuenje lomue wa ponduile oku iñilamo. Omanu va linga ombuanja yalua kuenda va yonguile oku teya apito onembele yaco. Eci hacoko ca pita Lolombangi Via Yehova, momo Vonjango yavo Yusoma mua tilila omanu valua vokuenda kuehunguhungu. Ulandu umue u lekisa okuti kolupale luo Dala, olohueli vimue via laleka eci ci soka 20 komanu oku tilila Vonjango Yusoma, kuenje va puluka. Keteke likuavo lomẽle omanu vaco va tiukila kolonjo viavo kuenda va kala lonjala, momo olonjo viavo viosi via nyõleha.

Vimbo lio Yangon vapata amue, Olombangi Via Yehova, vakuavo va tiamẽlele ketavo likuavo. Noke yehunguhungu omanu vaco va fetika oku enda kolohongele Vonjango Yusoma. Momo lie? Umue pokati kavo wa popia hati: “Vetavo lietu, omanu va likuminyile oku tu nyula, pole toke cilo lomue wa molẽha. Olombangi Via Yehova, ovio lika vi kasi oku  tu nyula. Ene wa tu ĩhi oluoso lovava. Wa litepi latavo akuavo!” Apata ana okuti Halombangiko Via Yehova va lilongisa ocipama Vutala Wondavululi losapi hati, “Yehova o Yevelela Epingilo Lietu Liekuatiso,” kuenda va eca atambululo kohongele.

Ukãi umue okuti kosimbu wa lilongisile Embimbiliya Lolombangi Via Yehova, noke yehunguhungu wa fetika oku endaenda kohongele. Vokuenda kuohongele, kua tangiwa ukanda wa tunda ko Filiale, wa lekisa ndomo vana va pita lehunguhungu va kuatisiwa, kuenda wa lombolola ndomo omanu vaco va puluka. Osimbu ukanda waco wa kala oku tangiwa ukãi wa fetika oku lolula asuẽlela. Eye wa komõha calua kuenda wa sanjuka eci a yeva okuti Olombangi Via Yehova, viosi via puluka, kuenda via kala ciwa. Noke wa tambula okulia, kuenda posamua yonjo yaye pa tungiwila ombalaka. Eye wa pandula ocisola Olombangi Via Yehova via lekisa kokuaye.

Yesu wa popia hati: “Kokulisola kuene pokati oko omanu vosi va limbukila okuti vulondonge viange.” (Yoano 13:​35) Kuenda ndonge Tiago wa popia hati ekolelo liocili li lekisiwa lovilinga. (Tiago 2: 14-​17) Olombangi Via Yehova via kapako olondaka evi, kuenda vi likolisilako oku lekisa ocisola caco poku kuatisa vana va saka.

[Atosi pombuelo yamẽla]

[Etosi Liavelapo kemẽla 11]

Embimbiliya li lekisa okuti ekolelo liocili, lekisiwa lovilinga viwa