Kuata Ukamba la Suku

Onganji yi Lingainga Ovina Via Sunguluka

Efetikilo 18:​22-32

KU VETIYIWA hẽ oku sola ovituwa via posoka ndeci, esunga, esunguluko kuenda oku yuvula ocame? Etu tumanu, tua lulikiwa lonjongole yoku tatiwa lesunga. Koloneke vilo, omanu ka va siatele oku lekisa esunga. Pole, kuli Onganji yimue tu sesamẽla oku kolela​—⁠Yehova Suku. Eye o lingainga lika eci ca sunguluka. Eci ca lekisiwa ciwa kombangulo Yehova a kuata la Avirahama, ndomo ca sonehiwa kelivulu Liefetikilo 18:​22-32. *

Eci Yehova a sapuila Avirahama onjongole yaye yoku kũlĩhĩsa ekalo liomanu va kala volupale luo Sodoma la Gomora, Avirahama wa yokokele lomanu vakuesunga va kalamo oku kongelamo ocimumba caye Lote. Avirahama wa pulisa Yehova hati: “O nyõlela olondingesunga kumue lolondingaĩvi ale? Nda hẽ vimbo muli olondingesunga akui atãlo o li nyõla ño, . . . ku li ecela mekonda liakui atãlo kolondingesunga vi kasimo?” (Ovinimbu 23, 24) Suku wo sapuila hati, nda nda sangamo 50 kolondingesunga, si nyõli ovaimbo aco. Avirahama wa lipilikila Yehova olonjanja vitãlo toke eci a pitĩla ketendelo liekũi komanu. Suku wo sapuila okuti ka laikele oku nyõla ovaimbo aco nda wa sangelemo ekũi liomanu vakuesunga.

Anga hẽ Avirahama wa kala oku lihoyisa la Suku? Lakamue! Nda wa ci lingile nda wa lekisa epela. Olondaka via Avirahama vi lekisa esumbilo leliketiso. Eye wa li tukula eye muẽle hati, “ndineketela haime nditiko.” Olonjanja vikuãla eye wa popia hati, “ku ka teme ño.” (Ovinimbu 27, 30-​32) Handi vali, olondaka via Avirahama vi lekisa okuti wa kolelele kesunguluko lia Yehova. Olonjanja vivali Avirahama wa sapuila Suku hati, “ci kole kokuove,” oku nyõla olondingesunga kumue lolondingaĩvi. Ulume u ukuekolelo wa kũlĩhĩle okuti “Onganji yoluali luosi,” ya laikele oku linga “esunga.”​—⁠Ocinimbu 25.

Avirahama wa kuatele hẽ esunga lioku linga epingilo liaco? Citava okuti tu popia tuti wa kuatele esunga ale sio. Eye wa lueyele eci a popia hati valupale luo Sodoma la Gomora, mua kala ekũi liomanu vakuesunga. Pole, wa kuatele esunga lioku popia hati Suku ka “nyõlela olondingesunga kumue lolondingaĩvi.” Eci Suku a kundula ovaimbo aco, Lote kumue lomãla vaye vavali vakãi, va popeliwa lovangelo.​—⁠2 Petulu 2:​7-9.

Ulandu owu u tu longisa nye catiamẽla ku Yehova? Yehova wa laleka Avirahama oku lekisa ocisimĩlo caye eci o sapuila onjongole yaye yoku kũlĩhĩsa ovaimbo aco. Noke wa yevelela lutate ovisimĩlo viekamba liaye Avirahama. (Isaya 41:⁠8) Oku kũlĩha okuti Yehova, Suku yumbombe haeye wa velisapo omanu vaye, ci tu sanjuisa calua! Omo liaco, tu kuete esunga lioku kolela ku Yehova, Onganji yi lingainga lika esunga.

[Atosi pombuelo yamẽla]

[Elitalatu kemẽla 20]

Avirahama wa lipilikila Yehova catiamẽla kovaimbo o Sodoma la Gomora