Ceci Ci Kuatisa Apata Oku Kala Lesanju

Lekisa Esumbilo Kohueli Yove

Will *wa popia hati: “Rachel nda wa tema, o lila calua. Eci tu tumãla oco tu sapele catiamẽla kocitangi caco, o vangula lonyeño ale o liwekapo oku vangula lame. Ovina viosi nda seteka oku linga oco tu tetulule ocitangi caco, ka via kuatele esilivilo. Nda kuatele ocisimĩlo coku liwekapo oku potolola ovitangi vietu.”

Rachel wa popia hati: “Eci Will a pitila konjo, nda kala oku lila. Nda seteka oku lombolola esunga lieci nda temẽla, pole wa ndi teta kondaka. Eye wa ndi sapuila hati, eci hacitangiko, ku ka sokolole vali ondaka yaco. Olondaka viaye via vokiya onyeño yange.”

OVE hẽ olonjanja vimue wa siata oku liyaka locitangi ndeci ca Will ale Rachel? Vosi yavo ndaño va kuete onjongole yoku sapela, pole, va siata oku tema. Momo lie?

Alume kuenda akãi va kuete ovituwa via litepa vioku sapela, kuenda olonjongole via litepa. Ukãi o sole calua oku situlula ovisimĩlo viaye. Pole, alume valua va sandiliya oku kala lombembua poku seteka oku tetulula lonjanga ovitangi kuenda oku vi yuvula. Ndamupi o pondola oku yula ovitangi viaco kuenda oku sapela ciwa lohueli yove? Poku lekisa esumbilo kokuaye.

Omunu una o kuete esumbilo wa kapako vakuavo kuenda ovisimĩlo viavo. Tunde vutila, ove wa lilongisa oku sumbila omanu vana va kuete omoko yoku songola, ale vana va kũlĩha ovina vialua okuti ove ci sule. Ocitangi cinene volohuela, oku lekisa esumbilo kohueli yove una o kasi ndu okuti vu kuete omoko yimuamue yoku songola. Linda una okuti tunde eci a kuela papita ale anyamo ecelãla, wa popia hati: “Nda kũlĩhĩle okuti Phil eci vo sapuila ondaka yimue o yevelela lutate, kuenda o kapako ovina vo sapuila. Nda yonguilevo okuti o lekisa ocikembe kokuange.” Ocili okuti, ove poku vangula lakamba vove kuenda omanu vakuavo, wa siata oku va yevelela lutate kuenda oku lekisa esumbilo kokuavo. Pole, wa sumbila hẽ ohueli yove?

Ekambo liesumbilo, li nena onyeño kuenda ovitangi volohuela. Soma umue ukualondunge wa popia hati: “Okambu ka kola lombembua ka sunguluka, onjo yeyuka lovilia kumue luyaki, ci sule.” (Olosapo 17:1) Embimbiliya li vetiya alume oku tata akãi vavo lesumbilo. (1 Petulu 3:7) ‘Ukãi layevo o sukila oku sumbila ulume waye.’​—Va Efeso 5:33.

Ndamupi o sapela lonjila yimue yi lekisa esumbilo kohueli yove? Kũlĩhĩsa ndomo oku kapako olonumbi Viembimbiliya ci pondola oku tu kuatisa.

Ceci Ohueli Yove yi Yongola Oku Popia Cimue

Ocitangi: Omanu valua va sole oku vangula calua okuti oku yevelela ci sule. Anga hẽ eci oco ocitangi cove? Embimbiliya li lombolola okuti omunu una “o kumbulula osimbu ka yevele ciwa,” eveke. (Olosapo 18:13) Omo liaco, osimbu kua tambuluile ondaka yimue, yevelela ciwa. Momo lie? Kara, ukãi umue okuti tunde eci a kuela papita ale 26 kanyamo, wa popia hati: “Si yongola okuti ulume wange o sanda lonjanga onjila yoku tetulula ovitangi viange. Eye citava okuti ka tava, ale ka kũlĩha esunga liocitangi caco. Pole, eci ndi yongola lika oku ndi yevelela kuenda oku kapako ovisimĩlo viange.”

Handi vali, alume vamue lakãi, va kuete ohele yoku vangula catiamẽla kovitangi viavo, kuenda ka va sole okuti ohueli yavo yi va kisika oku situlula eci ci kasi vutima wavo. Lorrie, ukãi umue okuti ndopo a kuela, wa limbuka okuti ulume waye ka situlula lonjanga eci ci kasi vutima waye. Eye wa popia hati: “Nda siata oku lekisa epandi kuenda oku kevelela toke eci a situlula eci ci kasi vutima waye.”

Ndomo ku Potoluiwa Ocitangi Caco: Nda ove la hueli yove vu yongola oku sapela catiamẽla kocitangi cimue, vu sukila oku ci linga vepuluvi lina okuti olonyeño viene via tulumuha. Nye o sukila oku linga nda hueli yove o kuete ohele yoku vangula? Ivaluka okuti, “uloño vutima womunu ovava a longa, puãi ukualondunge upamo.” (Olosapo 20:5) Nda poku tapa ovava lociyenjo wa ci linga lonjanga yalua, ovava a peseka. Cimuamue haico catiamẽla kokuove okuti, nda wa vangula lohueli yove olondaka viukãlu, eye o ku tambululavo lolondaka viaco, kuenje ku kuata vali epuluvi lioku amẽla kokuaye. Omo liaco, lesumbilo linga apulilo kokuaye, kuenda kuata epandi nda ka situlula lonjanga ovisimĩlo viaye ndomo o yongola.

Nda ohueli yove yi kasi oku vangula, ‘kala lutima woku yevelela, livala oku popia, livala konyeño.’ (Tiago 1:19) Omunu o yevelela ciwa, ka yevelela lika lovatũi, pole o yevelelavo lutima. Eci ohueli yove yi vangula kũlĩhĩsa ovisimĩlo viaye ale olonjongole viaye. Eye o ka limbuka esumbilo liove kocituwa cove coku u yevelela.

Yesu wa tu longisa ndomo tu yevelela. Eci ulume umue ombeyi eya kokuaye oku pinga ekuatiso, Yesu ka nõlelepo lonjanga oku tetulula ocitangi caye. Tete, wa yevelela lutate ulume waco. Noke, wo kuatela ohenda, kuenje wo sakula. (Marko 1:40-42) Nda ohueli yove yi kasi oku vangula, kuama ongangu yaco. Ivaluka okuti eye ka kasi oku sandiliya omunu o tetulula lonjanga ocitangi caye, pole, o yongola lika una u kuatela ohenda. Omo liaco, yevelela lutate. Kuata ocikembe. Noke sandiliya onjila yoku u kuatisa. Nda wa ci linga, o ka lekisa okuti wa sumbila ohueli yove.

SETEKA NDOCO: Onjanja yikuavo eci ohueli yove yi fetika oku vangula love, yuvula oku tambulula lonjanga. Talamẽla toke eci a mãla oku vangula leci o kuata elomboloko liovina a ku sapuila. Noke u pula ndoco: “Ove hẽ o sima okuti nda ku yevelela lutate?”

Ceci o Yongola Oku Popia Cimue

Ocitangi: Linda una wa tukuiwa kefetikilo, wa popia hati: “Olomapalo vio Televisãu via siata oku lekisa ndu okuti oku vangula lãvi ohueli yove, oku lipopia olondaka ka via sungulukile, ale oku lituka laye, ka cĩviko. Vamue va kulila vapata ana okuti oku lipopia lãvi, oco ocituwa cavo. Noke yoku kuela, ci tĩla calua kokuavo oku siapo ocituwa caco. Ivy, o kasi kofeka yo Kanada wa popia hati: “Nda kulila vepata limue okuti oku vangula upopi ũvi, loku lituka, kuenda oku litukula olonduko vĩvi, ka ca tendiwile ndocituwa cimue cĩvi.”

Ndomo ku Potoluiwa Ocitangi Caco: Eci o sapela la vakuene catiamẽla kohueli yove, popia “olondaka vi kuatisa, haivio via soka lotembo yaco, kuenje vi sumũluisa ava va vi yeva.”  (Va Efeso 4:29) Vangula olondaka vi vetiya vakuene oku kuata ovisimĩlo viwa viatiamẽla kohueli yove.

Ndaño muẽle ceci o kasi lohueli yove, yuvula oku popia olondaka vĩvi kuenda oku u tukula olonduko vĩvi. Ko Isareli yosimbu, ukãi umue o tukuiwa hati, Mikale, weya oku temẽla calua ulume waye Soma Daviti. Eye wa popia lãvi ulume waye kuenda wa linga hati, ‘wa pua osõi.’ Olondaka viaye via sumuisa Daviti kuenda Suku. (2 Samuele 6:20-23) Nye tu lilongisa kulandu owu? Poku sapela lohueli yove, nõla lutate olondaka o popia. (Va Kolosai 4:6) Phil, okuti tunde eci a kuela papita ale anyamo ecelãla, wa popia hati, eye lukãi waye toke cilo va siata oku litatamisa. Pole, wa limbuka okuti ovina a siata oku popia ovio vi vokiya onyeño kohueli yaye. Eye wamisako hati: “Oku lisandela lika esunga eci pokati kene pa kala oku li tatamisa, ka ci kuete esilivilo. Nda limbuka okuti, ocina ca velapo oku pamisa ukamba wetu.”

Ukãi umue kosimbu okuti wa kala ocimbumba haeye wa kuka, wa kolisa olondatembo viaye viakãi vina via kalavo ovimbumba oco va sange ocitumãlo cepuyuko okuti, “u onjo yaye lulume waye, u onjo yaye lulume waye.” (Ruti 1:9) Eci ulume lukãi va li kuatela esumbilo, onjo yavo yi linga ocitumãlo cepuyuko.

SETEKA NDOCO: Kumosi la hueli yove, sandi otembo yoku sapela catiamẽla kovitangi viene poku kuama olonumbi evi vikuãimo. Pulisa ohueli yove ndoco: “Eci ndi vangula catiamẽla kokuove pokati komanu, o liyeva okuti nda ku sumbila ale nda ku lavisa? Apongoloko api ndi sukila oku linga?” Omo liaco, nda ohueli yove yi kasi oku vangula, yevelela ovisimĩlo viaye. Seteki oku kapako olonumbi vu yeva.

Kapako Ekalo Liohueli Yove

Ocitangi: Olohueli vimue okuti ndopo via kuela, via siata oku sima hati ondaka Yembimbiliya yokuti, “va linga etimba limuamue,” yi lomboloka oku kuata ovisimĩlo kuenda ovituwa vimuamue. (Mateo 19:5) Pole, noke va limbuka okuti ovisimĩlo viaco haviociliko. Omo liovituwa viavo via litepa, noke yolohuela pokati kavo peya atatamiso. Linda wa popia hati: “Ocitangi cinene ca kala pokati ketu, ceci okuti, Phil ka kuete ocituwa coku yokokela ocitangi cimue ndeci nda tuwa. Olonjanja vimue osimbu ame nda yokoka, eye wa tula utima, kuenje ci ndi kokela onyeño yalua, momo ci kasi ndu okuti ka kapeleko ovitangi.”

Ndomo ku Potoluiwa Ocitangi Caco: Limbuka ndomo wa litepi kovituwa kuenda kapako ekalo lia hueli yove. Kũlĩhĩsa ndoco: Ovaso ove a litepa lovatũi, pole, a talavaya kumuamue oco va ku kuatise oku lomboka ciwa etapalo. Adrienne, ukãi umue okuti tunde eci a kuela papita ale ci panda akũi atatu kanyamo, wa popia hati: “Nda ovisimĩlo vietu ka vi pisiwa Londaka ya Suku, ame lulume wange tu kuama olonjila via litepa. Ocili okuti ndaño tu lohueli, pole, tua litepa kekalo kuenda kovisimĩlo.”

Nda ohueli yove yi kuete ovisimĩlo via litepa levi viove, ku ka pitise lika kovaso olonjongole viove. Kapako ovisimĩlo viaye. (Va Filipoi 2:4) Kyle, ulume wa Adrienne, wa popia hati: “Olonjanja vimue eci tu potolola ovitangi, si kuata elomboloko liovisimĩlo viukãi wange ale oku vi tava. Pole, nda kũlĩha okuti ndu u sole calua okuti ovisimĩlo viange vi sule. Nda eye wa sanjuka, ame ndi sanjukavo.”

SETEKA NDOCO: Soneha ovisimĩlo viohueli yove vioku potolola ovitangi okuti via velapo ovisimĩlo viove. (Va Filipoi 2:3)

Esumbilo olio li kuatisa oku kuata esanju volohuela loku kala otembo ka yi pui. Linda wa popia hati: “Esumbilo li nena esanju kuenda li pamisa olohuela. Omo liaco, ciwa oku likolisilako oku kuata ocituwa caco.”

[Atosi pombuelo yamẽla]

LIPULA NDOCO . . .

▪ Ekalo lia litepa liohueli yange lia siata oku pamisa ndati epata lietu?

▪ Momo lie ci kuetele esilivilo oku ecelela ovisimĩlo via hueli yange nda ka vi lipatãla lolonumbi Viembimbiliya?