“Pingi Kuenje cu Wĩhiwi”
KUATA UKAMBA LA SUKU
“Pingi Kuenje cu Wĩhiwi”
“A Ñala, tu longise oku likutilila.” (Luka 11:1) Epingilo eli, lia lingiwa ku Yesu la umue pokati kolondonge viaye. Poku tambulula epingilo liaco, Yesu wa ta alusapo avali a tu longisa ndomo tu likutilila kuenda ndomo olohutililo viaco vi yeviwa la Suku. Nda o kuete atatahãi vokuti olohutililo viove ka via siatele oku yeviwa la Suku, o ka sola etambululo lia Yesu.—Tanga Luka 11:5-13.
Olusapo luatete, lu tiamisiwila komunu o linga ohutililo. (Luka 11:5-8) Ulandu waco u tukula ulume umue wa tambula ukombe vokati kuteke okuti, ka kuatele okulia oco o poke. Kokuaye ocitangi caco ca sukilile oku ci tetulula lonjanga. Ndaño ca kala uteke, eye wa endele konjo yekamba liaye oco a undikeko utumbolo tumue. Kefetikilo, ekamba liaye lia susõha oku pasuka momo eye kumue lepata liaye va kala ale oku pekela. Pole, oco ka ka kutisiwe osõi, wa lipilika toke eci ekamba liaye lia pasuka, kuenda lia wĩha okulia. a
Olusapo olu, lu tu longisa nye catiamẽla kohutililo? Yesu o tu vetiya hati, tu sukila oku lipilika, poku pinga, poku sandiliya, kuenda poku totola. (Luka 11:9, 10) Momo lie? Anga hẽ Yesu wa yonguile oku popia hati Suku ukuakusimũla poku tambulula olohutililo vietu? Sio. Ca litepa lulume una wa simũla poku tambulula ekamba liaye, Yesu wa lekisa okuti, Suku o yongola oku tambulula vana va likutilila kokuaye lekolelo. Tu lekisa ekolelo liaco poku lipilika. Poku u pinga olonjanja vialua, tu lekisa okuti, tu yongola ovina tua pinga, kuenda tua kolela okuti nda ovina viaco vi litava locipango ca Suku, eye o tu vĩha.—Marko 11:24; 1 Yoano 5:14.
Olusapo luavali, lu tiamisiwila ku Yehova, okuti eye ‘Ukuakuyeva ohutililo.’ (Osamo 65:2) Yesu wa pula ndoco: “Isia yipi o kasi lomõla, nda o pinga olusi o wĩha onyõha, olusi haluoko? Pamue nda o pinga esaila, o wĩha enyenya?” Ocili okuti, ka kuli isia la umue eca komõlaye ocina cĩvi. Noke Yesu wa lombolola olusapo luaco poku popia ndoco: Nda okuti omanu ka va lipuile ‘va eca eca ovina viwa’ komãla vavo, “Isietu ukuailu hẽ ka velipo oku eca espiritu sandu liaye,” okuti oyo ombanjaile yiwa a eca komãla vaye palo posi vana vo pinga? b—Luka 11:11-13; Mateo 7:11.
Olusapo olu, lu tu longisa nye catiamẽla ku Yehova ‘Ukuakuyeva olohutililo’? Yesu o tu laleka oku kolela ku Yehova nda Isia umue o tu tata, haeye o yongola oku tambulula omãla vaye eci va sukila ocina cimue. Omo liaco, afendeli va Yehova, va pondola oku amela kokuaye lelianjo loku u pinga ovina viosi va yongola. Oku kũlĩha okuti, Yehova o va yonguila eci ciwa, va sanjukila atambululo aye kapingilo avo, ndaño okuti pamue haoko va lavokaile. c
Oku Tanga Embimbiliya Kosãi ya Kupupu
a Olusapo lua Yesu lu lekisa ovina via siata oku pita vomuenyo womanu kuenda ovituwa viavo. Va Yudea va tendele oku hindikisa akombe ndocina cimue ci kuete esilvilo. Omo okuti, apata a enda oku yoka olombolo vialua vieteke, omanu va kuata ocituwa coku undika vakuavo. Handi vali, vepata lina okuti olohukũi, vosi yavo va enda oku pekela vohondo yimuamue.
b Yesu wa tukula olonjanja vialua ondaka “ka velipo” oco a tepise ovina vialua levi vitito. Onoño yimue ya popia ndoco: “Elomboluilo liaco lieli: ‘Nda okuti kuli o A, momo kulivo o B, pole, viosi yavio vi kuete esilivilo.’”
c Oco o kũlĩhe vali ovina viatiamẽla koku likutilila kuenda koku yeviwa la Suku, tanga ocipama 17, velivulu Embimbiliya li Longisa Nye? lia sandekiwa Lolombangi Via Yehova.
[Etosi lia velapo 11]
Suku o yongola oku tambulula vana va likutilila kokuaye lekolelo
