Suku ‘o Kutisa Ovitima Vietu’
KUATA UKAMBA LA SUKU
Suku ‘o Kutisa Ovitima Vietu’
Anga hẽ Yehova wa kapako omanu va kasi palo posi? Embimbiliya lieca etambululo li tu sanjuisa. Suku wa kapako omanu vosi va kasi palo posi, kuenda o yongola okuti tu kuata esanju komuenyo. Oloneke viosi ecelela okuti omanu vana ka va siatele oku eca olopandu kokuaye va kuatisiwa lohenda yaye. Tu konomuisi olondaka upostolu Paulu a popia.—Tanga Ovilinga 14:16, 17.
Paulu wa sapuila omanu va kala volupale luo Lustra okuti ka va kaile afendeli va Suku poku va sapuila hati: ‘Kovitumbulukila viosiahũlu Suku wa tava okuti olofeka viosi vi endela volonjila viavio muẽle. Eye ka liwekelepo oku eca olondimbukiso viu wimbila uvangi, momo wa lingainga ohenda. Wo wĩhi ombela ya tunda kilu, wo muisi ovovo elau, kuenje wa kutisa ovitima viene omo wo wĩhi okulia kuenda esanju.’ Olondaka via Paulu via kuata elomboloko lie ku vana va vi yevelela?
Omanu va kala ko feka yo Lustra ka va kuatele elomboloko liolondaka via Paulu. Ovo va enda oku talavaya kovapia kuenda va kala vofeka yimue okuti osi yaco ya enda oku ima ovikulia vialua. Omo liaco, Paulu wa va ivaluisa okuti Suku eye wa siata oku eca ombela kuenda apako. Olonjanja viosi va enda oku ungula okulia kuenda va kuata esanju poku lia ovina viaco, momo va kuatisiwa la Suku.
Olondaka Paulu a sapuila omanu va kala ko Lustra, vi tu longisa ovina vi kuete esilivilo liatiamẽla ku Yehova Suku.
Yehova o tu ihã elianjo lioku linga ovina tu yongola. Konomuisa ndomo Yehova a ecelela omanu vakualofeka viosi “oku linga ovina via sunguluka.” Omanu vana va pongolola Embimbiliya va popia vati: “Ondaka oku linga ovina via sunguluka” yi lomboloka “ oku linga ovina omanu va sima okuti vi kuete esilivilo lia velapo.” Yehova ka kisika omunu oco o fendele. Eye wa tu ĩha elianjo lioku linolela ovina tu yongola oku linga.—Esinumuĩlo. 30:19.
Yehova o yongola okuti tu u kũlĩha. Paulu wa popia hati, Yehova ‘o kuete olombangi viaye.’ Eye, wa tukula olondaka evi, “oco a lekise komanu ndomo Suku a tuwa.” Ovina Suku a lulika vi eca uvangi ‘wovituwa viaye ka vi muiwa’ oku kongelamo ohenda, olondunge, unene kuenda ocisola. (Va Roma 1:20) Yehova wa siata oku situlula ovina viatiamẽla kokuaye Vembimbiliya. (2 Timoteo 3:16, 17) Ovina viaco ka vi lekisa hẽ okuti Yehova o yongola oco tu u kũlĩhe?
Yehova o yongola okuti tu kuata esanju. Paulu wa popia hati: Yehova o kutisa “ovitima vietu lokulia kuenda esanju.” Ndaño muẽle omanu vakuakandu okuti ka va kũlĩhĩle Yehova, va siata oku lia kuenda oku kuata esanju komuenyo. Yehova o yongola okuti tu kuata esanju. Pole, tu kuata lika esanju komuenyo nda tua lilongisa ocili catiamẽla kokuaye loku kapako ovina tua lilongisa. —Osamo 144:15; Mateo 5:3.
Tu pondola oku kuatisiwa lohenda ya Yehova oloneke viosi. Momo lie ku lilongisila oku eca olopandu ku Suku una wa siata oku ku ĩha okulia loku ku lingila ‘ovina vi ku nenela esanju’?
Olonumbi Vioku Tanga Embimbiliya Kosãi Yevambi Linene
[Etosi lia velapo 11]
Oloneke viosi Suku wa siata oku ecelela okuti omanu vana ka va siatele oku eca olopandu kokuaye, va kuatisiwavo lohenda yaye
