Antonio: A Tim, ciwa? Nda sanjuka omo nda ku sanga vali konjo yove.

Tim: Nda sanjuka omo lioku li sanga love.

Antonio: Nda ku nenela Utala Wondavululi wokaliye lo Despertai! Ndi sima okuti o ka sola calua oku tanga ovipama viaco.

Tim: Nda pandula. Nda sanjuka calua omo weya etaili, momo ndi kuete cimue ndi yongola oku ku pulisa.

Antonio: Nye o yongola oku pula?

Tim: Eteke limue nda kala oku sapela lekamba liange kupange. Ndo sapuila eci catiamẽla kokokanda kana wa nyihile kuenda ndomo nda sola esapulo liaco. Eye wa ndi sapuila hati, liwekapo oku tanga alivulu aco, momo Olombangi Via Yehova ka vi tava ku Yesu. Anga hẽ eci ocili? Ame ndo sapuila hati, ondaka eyi ndi ka yi pulisa kokuaye eci eya vali konjo yange oku ndi nyula.

Antonio: Nda pandula omo wa ndi pulisa ondaka eyi. Wa linga ciwa omo kua pulisile omunu ukuavo. Onjila ya velapo yoku kũlĩha eci omunu a tava, siti oku pulisa omunu waco?

Tim: Ondaka eyi ocili.

Antonio: Olombangi Via Yehova vi tava ku Yesu. Tua kũlĩha okuti oku lekisa ekolelo ku Yesu oco ci tuala kepopelo.

Tim: Nda kũlĩha okuti ove o tava ku Yesu, pole, eci ekamba liange kupange a ndi sapuila okuti ove ku tava ku Yesu, ca ndi komohisa. Lalimue eteke tua sapelele catiamẽla kondaka eyi.

Antonio: Ci tava okuti ndu ku lekisa ovinimbu vimue Viembimbiliya vi situlula esilivilo lioku kolela ku Yesu? Ovinimbu evi, ovio Olombangi via Yehova via siata oku tanga kupange wavo woku kunda.

Tim: Ciwa.

Antonio: Tu fetikila oku tanga olondaka via Yesu vi sangiwa kelivulu lia Yoano 14:6. Olondaka viaco via kala ombangulo yimue Yesu a kuata la umue pokati kovapostolo vaye. Tu tanga ndoco: “Yesu wa popia laye hati, Ame ndinjila, haime ndicili, haime ndimuenyo. Lomue iya ku Isia, te lame.” Ndomo ca lomboluiwa vocinimbu eci, yipi onjila yoku kũlĩha Isia?

Tim: Onjila yaco Yesu.

Antonio: Ocili. Olombangi Via Yehova vi tava kondaka yaco. Linga ndu ku pulise: Eci o likutilila ku Suku, o cilinga vonduko yelie?

Tim: Vonduko ya Yesu.

Antonio: Ndi tava kondaka eyi. Eli olio esunga lieci okuti poku likutilila ndi popia hati, vonduko ya Yesu. Olombangi Via Yehova oco via siatavo oku linga.

 Tim: Ciwa oku ci kũlĩha.

Antonio: Ocinimbu cikuavo Cembimbiliya tu kũlĩhĩsa, Yoano 3:16. Ocinimbu eci ci kuete esilivilo lialua kuenda ca siata oku tukuiwa hati, Evanjeliu litito. Esunga liaco lieli okuti, ulandu wosi watiamẽla komuenyo wa Yesu eci a kala palo posi kuenda upange waye woku kunda, via situluiwa vocinimbu eci. Tanga handi ocisonehua caco.

Tim: Ciwa. Oco ci popia ndoco: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.”

Antonio: Nda pandula. Ocinimbu eci wa ci tangele ale?

Tim: Nda siata oku ci yeva calua, kuenda ca siata oku tukuiwa vovisungo, lovotuikanda tumue.

Antonio: Ocinimbu eci ca kulĩhiwa calua. Kũlĩhisa ciwa eci Yesu a popia vocinimbu caco. Eye wa popele hati: Ocisola ca Suku ca ecelela omanu oku kuata omuenyo ko pui. Pole, nye tu sukila oku linga?

Tim: Oku lekisa ekolelo.

Antonio: Ocili. Oku lekisa ekolelo Komõlaye wongunga, Yesu Kristu. Ondaka yokuti—oku kolela ku Yesu oco ci tuala komuenyo ko pui—ya lomboluiwa kemẽla 2 yorevista nda ku nenela ndeti. Catiamẽla kocimãho Cutala Wondavululi, orevista eyi yi lombolola okuti, owo “u vetiya omanu oku kolela ku Yesu Kristu, una wa tu fila oco tu kuate omuenyo ko pui okuti, cilo o kasi oku viala Vusoma wa Suku kilu.”

Tim: O kuete esunga. O revista yene yeca uvangi wokuti Olombangi Via Yehova vi tava ku Yesu.

Antonio: Ocili.

Tim: Oco hẽ, momo lie omanu va popela okuti ene ka vu tava ku Yesu?

Antonio: Citava okuti kuli asunga amue a va vetiya oku ci popia. Olonjanja vimue omanu va ci popia ño omo lioku ci yeva ku vakuavo. Ale va kuete ovisimĩlo ka via sungulukile viatiamẽla kupange wetu woku kunda.

Tim: Ame ndi simavo okuti—omanu mbi va kuete esunga lioku popia hati, ene ka vu tava ku Yesu, momo ka vu li tukuli okuti, Vulombangi via Yesu, pole, vu popia hati, Tulombangi Via Yehova.

Antonio: Ci kuete esunga.

Tim: Momo lie vu vanguila enene catiamẽla ku Yehova?

Antonio: Etu tua limbuka okuti ci kuete esilivilo oku tukula onduko ya Suku—Yehova ndeci Omõlaye Yesu a linga. Kũlĩhĩsa eci Yesu a linga poku likutilila ku Isiaye. Olondaka viaco via sonehiwa kelivulu lia Yoano 17:26. Citava okuti o tanga ocinimbu caco?

Tim: Citava. “Nda va lomboluila onduko yove, kuenje, lopo ndi va yi lomboluila, oco ocisola wa ndi sola laco, ci kale lavo, kuenje, ame ndi kala vomunga kumue lavo.”

Antonio: Nda pandula. Yesu wa popia hati, nda situlula onduko ya Suku. Momo lie a cilingila?

Tim: Sia ci kũlĩhile.

Antonio: Tu kũlĩhise ocisonehua cikuavo ci tu kuatisa oku kuata elomboloko liwa. Nda sokolola elivulu Liovilinga 2:21. Tu tanga ndoco: “Wosi o vilikiya onduko ya Ñala [Yehova] o popeliwa.” Kaliye o tava okuti, nda oku tukula onduko ya Yehova oco ci tuala kepopelo, Yesu wa kũlĩhile onumbi yaco.

Tim: Ocili.

Antonio: Yesu kumue lolondonge viaye omo lioku limbuka esilivilo lioku popeliwa, eli olio esunga lieci va sandela oku kũlĩha loku tukula onduko ya Suku. Eli halio esunga lieci tu vanguila calua catiamẽla ku Yehova. Tua limbuka okuti ci kuete esilivilo oku kũlĩha onduko ya Suku kuenda tu sukila oku kuatisa vakuetu oco va yi tukulevo.

Tim: Ndaño omanu ka va kũlĩhile onduko ya Suku ale ka va yi tukula, pole, vutima wavo va kũlĩha okuti va kasi oku tukula muẽle Suku.

Antonio: Ondaka eyi yocili. Pole, Suku poku tu situluila onduko yaye, wa ci lingila oco ci leluke oku kuata ukamba laye.

Tim: Eci ci lomboloka nye?

 Antonio: Sokolola ndoco: Ka tua sukilile oku kũlĩha onduko ya Mose. Tua sukilile ño oku u kũlĩha ndulume umue wa tepa pokati ovava Okalunga ka Kusuka ale ulume umue wa tambuile Ovihandeleko Ekũi. Cimuamue haico catiamẽla—ku Noha. Momo lie tua kũlĩhila onduko yaye? Tua sukilile ño oku u kũlĩha ndulume umue wa tunga ocimbaluku loku popela epata liaye kuenda ovinyama. Cimuamue haico ci popia catiamẽla ku Yesu okuti tua sukilile ño oku u kũlĩha nda umue wa tunda kilu kuenda wa fa omo liakandu etu. Ale haicoko?

Tim: Ndi sima okuti oco.

Antonio: Pole, Suku wa ecelela okuti tu kũlĩha olonduko viomanu vaco. Oku kũlĩha olonduko viavo ci tu kuatisa oku vetiyiwa lovolandu avo. Ndaño okuti lalimue eteke tua muile Mose, Noha ale Yesu, pole oku kũlĩha olonduko viavo ci tu kuatisa oku kuata elomboloko liwa liovolandu avo.

Tim: Lalimue eteke nda kuatele ovisimĩlo evi, pole, ondaka eyi yocili!

Antonio: Eli olio esunga likuavo lieci Olombangi Via Yehova vi tukuila calua onduko ya Suku. Tu yongola oku kuatisa omanu oco va kolele Yehova Suku Ndomunu okuti ci tava oku kuata ukamba laye. Kuenda tua kapako calua ocikele Yesu a kuete coku tu popela. Citava okuti tu tanga vali ocisonehua cimue ci situlula ciwa ondaka eyi.

Tim: Ciwa.

Antonio: Kefetikilo tua tanga elivulu lia Yoano 14:6, ku tu ivaluisa okuti Yesu wa popia hati, “ame ndinjila, haime ndicili, haime ndimuenyo.” Tu tiukile kocipama caco loku tanga olondaka viaye vi sangiwa kelivulu lia Yoano 14:1. Citava okuti o tanga olondaka Yesu a popia kesulilo liocinimbu eci?

Tim: Citava. Ci popia citi: ‘Koleli Suku, ñolelivo ame.’

Antonio: Nda pandula. Ove hẽ o sima okuti ekolelo liocili li kuete esilivilo? Anga hẽ oku kolela ku Yesu ca litepa loku kolela ku Yehova?

Tim: Sio. Yesu wa popia hati, tu sukila oku kolela kokuavo.

Antonio: Ocili. Nda kolela okuti ove o tava okuti ka tu sukila lika oku popia hati, tua kolela ku Suku kuenda ku Yesu. Tu sukila oku lekisa ekolelo liaco komuenyo wetu.

Tim: Ondaka eyi yocili.

Antonio: Oco hẽ, omunu o lekisa ndati okuti wa kolela ocili ku Suku kuenda ku Yesu? Eteke likuavo tu sapela eci catiamẽla kondaka eyi. *

Tim: Ndu ku lavoka.