VOKUENDA kuanyamo a pita, vukanda umue wasapulo kofeka yo Korea u tukuiwa hati, The Chosun Ilbo, mua sandekiwa esapulo limue li komõhisa. Vukanda waco mua sangiwa epulilo liokuti: Shim Cheong, ka Kũlĩhĩle Cimue Catiamẽla ku Yesu—Anga hẽ wa Enda Vifelu?”

Esapulo liaco lia sumuisa omanu momo, Shim Cheong okuti o soliwe calua kofeka yo Korea wa kapa kohele omuenyo waye oco a kuatise isiaye omeke. Vokuenda kuanyamo, wa sivayiwa calua. Kofeka yo Korea, “Shim Cheong” wa lekisa ongangu yiwa omo lioku lieca olumue.

Komanu valua, ocisimĩlo cokuti omunu waco o ka kangisiwa vifelu omo okuti ka kaile ukristão umue wapapatisiwa ka ca sungulukile kuenda ci sumuisa. Citava okuti ulandu waco, wa lomboluiwa osimbu eci handi esapulo liatiamẽla ku Kristu ka lia sandekiwile vimbo liufeko waco.

Vocipama caco mua kongelele oku pula ocitunda cimue cetavo. Vo pula nda vana va fa okuti ka va kuetele epuluvi lioku lilongisa catiamẽla ku Yehova vosi va kangisiwa vifelu. Wa tambulula ndati? Ka tua kũlĩhĩle etambululo a eca. Pole, tua kũlĩha okuti “Kilu Kua Lingiwa Eliangiliyo” limue komanu.

O Nova Enciclopédia Católica ya lombolola ndoco: “Epapatiso li sukiliwa oco omunu a popeliwe. Ndomo Kristu a ci popia, wa lekisa okuti, umue nda ka citiwa lovava kuenda lespiritu, ka pondola oku iñila Vusoma wa Suku. (Jn 3.5).” Omo liocisimĩlo caco, valua va sima okuti vana va fa okuti ka va papatisiwile, va lavoka oku imbiwa vifelu, ale o talisiwa ohali vonjila yimue noke yokufa.

Pole omanu valua va tenda elongiso liaco nduveke. Omanu valua va siata oku fa omo lacimue va kũlĩha catiamẽla Kembimbiliya. Ovo hẽ va sesamẽla ekangiso ka li pui? Nye Embimbiliya li popia catiamẽla kulandu waco?

Embimbiliya li lekisa okuti Yehova wa kapako vana ka va kũlĩhile ovihandeleko viaye. Elivulu Liovilinga 17:30, li tu sapuila ndoco: “Suku wa simuila oloneke viapungunjumba.” Nye Embimbiliya li popia catiamẽla ku vana vafa okuti ka va kuatele epuluvi lioku lilongisa catiamẽla ku Suku?

Etambululo li sangiwa volondaka Yesu a sapuila kocingumba cimue ca fila ponele yaye. Ulume waco wa sapuila Yesu hati: “Eci wiñila Vusoma wove, njivaluke.” Yesu wo kumbulula ndati? Yesu wo tambulula hati: “Etaili hu sapuila okuti, o ka kala kumue lame Voluali Luokaliye.”—Luka 23:39-43, NW.

Anga hẽ Yesu wo likuminya okuti enda kilu? Sio. Ulume waco ka citiwile evali lovava kuenda lespiritu okuti, oco ocina ca kisikiwile ku vana va sesamẽla oku iñile Vusoma wa Suku. (Yoano 3:3-6) Pole, Yesu wa kala oku likuminya kocingumba okuti o kala lomuenyo Vofeka Voluali Luokaliye palo posi. Omo ulume waco wa kala u Yudea—wa kũlĩhĩle ciwa ulandu Wofeka Yelau palo posi okuti—ocumbo Cedene ca tukuiwa kelivulu liatete Liembimbiliya. (Efetikilo 2:8) Ovina Yesu a popia vio vetiya oku kolela kohuminyo yepinduko Vofeka Yelau eci yi ka tumbuluiwa palo posi.

Embimbiliya li tu likuminya okuti: “Kuli epinduko lia vakuesunga lava havakuesungako.” (Ovilinga 24:15) Omanu “havakuesungako” vana okuti ka va kũlĩhile ovihandeleko via Suku. Yesu o ka pindula ocingumba “hokuesungako” una a sapela laye, oku kongelamo omanu valua, kuenda vana va fa okuti ka va kũlĩhĩle ondaka ya Suku. Omo liaco, Vofeka Yelau palo posi, va ka longisiwa ovihandeleko via Suku kuenda va ka kuata epuluvi lioku lekisa okuti va sole Suku poku pokola kolonumbi viaye.

Eci vana okuti havakuesungako va ka pinduiwa, va ka sombisiwa hẽ omo liovina va linga kosimbu? Sio. Ukanda wa Va Roma 6:7 u popia ndoco: ‘Omunu wosi wa fa wa yovuiwa kakandu.’ Vana “havakuesungako” va ka feta akandu avo poku fa. Omo liaco, ovo va ka sombisiwa omo liovina va linga noke yepinduko, pole ka va ka sombisiwa omo liovina va linga osimbu ka va file. Va ka kuatisiwa ndati?

Noke yepinduko, vana havakuesungako va ka kuata epuluvi lioku lilongisa ovihandeleko via Suku vi ka situluiwa eci oviña viocindekaise vi ka yuluiwa. Ovo va ka sombisiwa “lovilinga viavo,” nda va pokola ale sio kovihandeleko via Suku. (Esituluilo 20:12, 13) Omanu valua “havakuesungako,” ka ci kala epuluvi liavali, pole, epuluvi liatete oco va kuate omuenyo ko pui palo posi, oku lilongisa kuenda oku linga ocipango ca Suku.

Elongiso eli Liembimbiliya lia kuatisa valua oku tumbulula ekolelo liavo ku Suku. Yeong Sug, wa kala umue pokati kavo. Eye wa pitisile calua kovaso etavo lio Katolika tunde vutila. Valua vepata liaye va kala olopatele. Omo okuti wa yonguile oku kala omandele, wa enda oco a kaile konjo yolomandele. Noke, wa tundako omo liovina ka via sungulukile a enda oku mõla. Handi vali, ka tavele kelongiso liondalu yifelu momo oku kangisa omanu vifelu ka ca sungulukile kuenda ci lekisa ekambo liocisola.

Umue Ombangi ya Yehova wa lekisa ku Yeong Sug olondaka Viembimbiliya vi popia ndoco: “Ava va kasi lomuenyo va kũliha okuti va laika oku fa, puãi ava va fa lacimue va kũliha, ndaño onima yimue ka va kuete vali, momo onjivaluko yavo ya nyõleha.” (Ukundi 9:5) Olombangi Via Yehova vio kuatisa oku limbuka okuti va kukulu yaye ka va kasi oku kangisiwa vifelu. Pole, va pekela volofa loku kevelela epinduko.

Poku limbuka okuti omanu valua lalimue eteke va yevele ocili Cembimbiliya, Yeong Sug wa pokola kolondaka via Yesu vi sangiwa kelivulu lia Mateo 24:14: “Ondaka eyi yiwa Yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” Cilo o kasi oku kunda olondaka viwa viusoma kuenda o sapuilako vakuavo elavoko liaye li komohisa li sangiwa Vembimbiliya.

Embimbiliya li tu sapuila okuti, “Suku ka kuete ocame. Pole, kolofeka viosi, omunu wosi o lekisa esumbilo kokuaye loku linga esunga, o taviwa laye.” (Ovilinga 10:34, 35) Esunga liaco lia lipua, olio tu pondola oku lavoka ku Suku “o sole esunga locili.”—Osamo 33:5.