Ulume umue o tukuiwa hati Paul, okuti ohueli haiye isia yomãla vavali wa popia hati: “Eci ondando yovina ya livokiya vofeka yetu, okulia kua fetikavo oku tĩla kuenda ka ca lelukile oku ku sanga. Tua enda oku kala kulala, pole eci onjanja yetu yoku landa ya pitĩlapo, okulia kuapua. Omanu va kopa omo lionjala kuenda vamue va enda oku ambuka volokololo. Ondando yovina tua sukilile ya li vokiya calua. Kuenje olombongo viofeka yetu ka via kuatele vali esilivilo lialua. Nda pumba etendelo liange lioku upa olombongo kombango, opapelo yuvangi yi ndi kuatisa poku liyaka lovitangi, kuenda opapelo yuvangi woku kuatisa vana va kuka.”

Paul wa kũlĩhĩle okuti, oco epata liaye li teyuiwe wa sukilile oku lekisa “olondunge.” (Olosapo 3:21) Eye wa lombolola ndoco: “Ndaño okuti nda kuatele uloño woku panga olusu, pole nda enda oku tava oku linga ovopange osi ndaño okuti ofeto yaco yitito. Vamue va ndi fetaile okulia ale, ovina vikuavo vi sukiliwa vonjo. Nda va ndi feta ovinimbu vikuãla vionjapãu, vivali ndi vi landisa vikuavo vivali ndi vi ambata konjo. Nda kuata eci ci soka 40 kotulosanji. Eci via kula nda vi landisa kuenje nda landa eci ci pitahãla 300 kotulosanji. Noke nda tolokala eci ci soka 50 kolosanji lolonjeke vivali viosema yepungu via 50 kilu. Kuenje nda tekula lavio epata liange kuenda omanu vakuavo vokuenda kuotembo yalua.”

Paul wa kũlĩhĩlevo okuti ocina ca velapo tu sukila oku linga oku kolela ku Suku. Eci tu linga eci Suku a pinga, eye o tu kuatisa. Oco tu kuate onima kovina tu sukila komuenyo, Yesu wa popia hati: “Ko ka kali lutima wa sakalala . . . puãi Isiene wa kũlĩha okuti vio sesameli.”—Luka 12:29-31.

Satana unyãli wa velapo wa Suku, wa siata oku yapuisa omanu valua voluali oco va tiamisile utima wavo koku kuata ovokuasi. Omanu va sakalala calua lovina va sukila. Vovina viaco mua kongela ovina va tẽla levi ka va tẽla kuenda va pesila otembo yalua koku sandiliya ovina ka va sukila. Omanu valua poku linga olofuka va limbuka okuti, “ukuakulevala o linga upika yu wo levalisa.”—Olosapo 22:7.

 Omanu valua va nola onjila ka ya sungulukile. Paul wa lombolola okuti, “omanu valua va siata oku sia apata avo lakamba, oco va kuate ekalo lia velapo komuenyo. Omanu vamue va linga ovongende, pole ka va kuatele ovicapa vi va ecelela oku ci linga kuenje eci ca va tateka oku sanga upange. Olonjanja vialua va enda oku tila akuenje velombe kuenda oku lala voluayela. Ka va ecele epuluvi ku Suku oco a va kuatise. Pole, tu kasi ndepata lia nõlapo oku liyaka locitangi cekambo liolombongo, lekuatiso lia Suku.”

Paul wamisako ndoco: “Yesu wa popia hati: ‘Ko ka sakalali lovina vi keya eteke likuavo, momo eteke likuavo, li kuete asakalalo alio. Ohali yeteke liongongo yi tẽla eteke liaco.’ Oloneke viosi eci ndi likutilila ndi pinga ku Suku oco a ‘tu ĩhe ombolo yeteke liaco’ oco tu puluke. Eye wa tu kuatisa ndeci Yesu a ci likuminyile. Haloneke viosiko tua kuatele ovina tu yongola. Onjanja yimue nda kala kulala oco ndande okulia ndaño sia kũlĩhĩle eci ca kala oku landisiwa. Eci ya pitĩlapo onjanja yange yoku landa, va kala oku landisa o yogurte. Ame si sole o yogurte. Pole, omo okuti okulia, oyo tua lia koñolosi. Ndi pandula Suku omo okuti vokuenda kuotembo yaco, epata liange la limue eteke lia lalele onjala.” a

“Cilo ca leluka oku landa ovina tu sukila. Pole, ulandu tua pita lawo wa tu longisa okuti onjila ya velapo yoku liyaka lesakalalo, oku kolela Suku. Otembo yosi Yehova b o ka tu kuatisa nda tu amamako oku linga ocipango caye. Tua mola oku tẽlisiwa kuolondaka Viosamo 34:8 viokuti: “Seteki oco vu limbuke okuti Yehova ukuahenda. Omunu wosi o wunda kokuaye o sumũlũha.” Omo liaco, ka tu kuete usumba woku liyaka vali locitangi cekambo liolombongo.

“Kaliye tua sanga elomboloko liokuti oco omanu va amameko lomuenyo, ka va sukila upange ale olombongo, pole va sukila okulia. Tu lavoka lesanju lialua oku tẽlisiwa kuohuminyo ya Suku yokuti: “Vofeka mu kale olomema via lua.” Cilo “Nda tu kuete okulia leci tu lisikilĩla ci tu tela.” Tua kolela kolondaka Viembimbiliya viokuti: ‘Ko ka kali locipululu colombongo. Tẽli lovina vu kuete, momo eye muẽle wa popia hati, “Ame lalimue eteke hu yanduluka ndaño oku ku sia.” Oco tu tẽle oku popia lutõi, tuti, “Yehova eye oñuatisi yange, si kuata usumba.”’” c

Ci sukila ekolelo liocili oco ‘tu ende la Suku’ ndeci Paul kuenda epata liaye va kasi oku linga. (Efetikilo 6:9) Citava okuti cilo tu kasi oku liyaka locitangi cekambo liolombongo ale tu ka liyaka laco kovaso yoloneke. Pole, ongangu ya Paul yoku lekisa ekolelo kuenda olondunge, yi tu kuatisa calua.

Nye ci popiwa nda ovitangi viepata vi kasi okutu sakalaisa?