Vulima wa kuamamo, nda fetika oku panga onepa volo filme kuenda olonjanja vialua nda linga ocikele ca velapo. Vakuavingungu viasapulo va yonguile ulandu wange, vakualitalatu va yonguile oku njupa alitalatu kuenda omanu va yonguile okuti eci va sandeka ovina, eci ku tumbikiwa ocitumãlo cimue, poku lia onanya kuenda ondalelo va yongola okuti ñalapo. Omanu vosi va yonguile oku ndi mõla.

Vokuenda kuotembo nda limbuka okuti ovina viaco ka via posokele ndomo nda ci simaile. Nda panga onepa volofilme muiñila uyaki kuenda ca kala ohele yocili. Vakuakupanga olofilme ko Hong Kong ka va walaile ocina cimue ci va teyuila oco ka va ka livalule ndeci vakuavo ko Hollywood va lingaile, omo liaco, nda nolapo oku linga olomapalo viange muẽle ndeci, oku tẽha akãlu lomoto. Olofilme vialua nda enda oku linga mua kongelele ukahonga kuenda ungangala. Vimue via enda oku lekisa umbanda.

Kunyamo wo 1995, nda kuela la umue ukuaku panga olofilme. Ndaño nda simĩle okuti nda kuatele ovina vialua vi ñokela esanju ndeci, eposo, ovokuasi kuenda ulume umue ukuacisola, pole nda limbuka okuti sia kuatele esanju. Nda liwekapo oku linga olofilme.

Nda fetika oku ivaluka ovina vitito viatiamẽla kekolelo liange eci nda kala omõla. Kosimbu, Voviasapalo viosi ame la manjange ukulu tua enda oku nyula epata limue okuti Olombangi Via Yehova. Isia yepata liaco okuti Joe McGrath wa kala ulongisi wetu kuenda womãla vaye vatatu afeko. Lia kala epata limue lia sanjuka halio li kuete ocisola kuenda “Pahãyi Joe” wa enda oku tata ukãi waye kuenda omãla lesumbilo. Nda solalevo oku enda kolohongele viavo. Olonjanja vimue tua endaile kolohongele vinene. Via kala oloneke vimue viesanju. Nda li yevaile okuti nda kolapo oku kala Lolombangi Via Yehova.

Ekalo lia litepele lovina via kala oku pita komuenyo wange kuenda vonjo yange. Ekalo liomuenyo wa Isia yange lia nena esumuo ku Ina yange. Eci nda tẽlisa ekũi lianyamo Ina yange wa liwekapo oku endaenda kolohongele Violombangi Via Yehova. Pole ame nda amamako, kuenda nda papatisiwa eci nda tẽlisa 17  kanyamo. Ka pa pitile otembo yalua, nda fetika oku kuama ovituwa ka via sungulukile kuenje nda siapo ekongelo.

Noke lioku kuela, akulu vavali vekongelo Liolombangi Via Yehova veya oku ndi nyula. Ovo va ndi sapuila eci ndi sukila oku linga oco niuke ku Yehova kuenda va vangula lamanji umue omisionalia o tukuiwa hati Cindy oco a ñuatise. Kotembo yaco, ekolelo liange lia honguele, kuenje nda pinga kokuaye oco a ndi lekise okuti Embimbiliya Ondaka ya Suku. Eye wa ndi lekisa Ovitumasuku Viembimbiliya via tẽlisiwa ale. Vokuenda kuotembo tua linga akamba vawa, kuenda wa pinga oco a ndongise Embimbiliya. Kuenje nda tava. Nda limbuka okuti Yehova, o Suku yimue yocisola kuenda o yongola okuti ndi kuata esanju.

Eci nda fetika oku endaenda vali kolohongele, nda limbuka okuti esanju lioku kala Lolombangi Via Yehova, lia velapo okuti lioku kala lomanu vakuakulinga olofilme li sule. Pole, ulandu nda pita lawo eci nda kala umãlehe wa ndi vetiya oku siapo oku kolela komanu kuenda sia li solele vali. Manji umue vekongelo wa ndi kuatisa poku ndekisa ndomo Embimbiliya li pondola oku ñuatisa oku liyaka lovitangi viatiamẽla kovisimĩlo, kuenda nda lilongisavo ndomo ndi pondola oku sanga akamba vawa.

Kunyamo wo 1997, ame lulume wange tua ilukila ko Hollywood, Kalifornia, ko Estados Unidos. Kofeka yaco, nda vokiya ombili yange koku kuatisa omanu oku limbuka esilivilo liolondunge vi sangiwa Vondaka ya Suku. Oku longisa omanu Embimbiliya ca ndi kuatisa oku sanga esanju lialua okuti li tunda kekemãlo lioku panga onepa kolofilme li sule. Kunyamo wo 2002, nda lisanga la Cheri ekamba liange liosimbu wa tunda ko Hong Kong. Ovolandu alua omuenyo wetu a likuata. Osimbu handi sia nõliwile ndufeko wa velapo kofeka yo Hong Kong eye wa nõliwile ale unyamo wa pita ndufeko wa velapo. Eci nda nõliwa ndufeko wavelapo, eye wa ñapa ekolowa kutue. Eye wa kalavo ukuakulinga olofilme kuenje noke wa linga ukuakusoneha ovolandu aco, loku talavaya lasongui va kemãla. Eye wa ilukilavo kolupale luo Hollywood.

Nda sumua calua eci nda yeva okuti ukuenje Cheri a yonguile oku kuela laye wa fa omo liocitangi cutima. Eye ka sangele elembeleko vetavo lio Budista. Ndeci ame nda kala, eye wa kuatelevo omuenyo umue wa kemãla okuti omanu valua va yonguile oku kuata ekalo liaco, pole, wa sumuile calua kuenda ka kolelele vali omunu laumue. Nda fetika oku u longisa ovina nda lilongisa Vembimbiliya, pole omo okuti wa kulila vetavo lio Budista, ka ca lelukile kokuaye oku sola ovina viaco.

Eteke limue kunyamo wo 2003, Cheri wa mbilikiya oco ngende ko Vancouver, Kanada kuna eye a kala oku linga ofilme yimue. Eye wa ndi sapuila okuti osimbu a kala oku endisa loku komõha ndomo ovina via posoka, velivala liaco wa fetika oku likutilila lolukandi poku popia hati: “Ndi sapuileko, Suku yocili helie? Onduko yaye helie?” Vepuluvi liaco, wa endisa toke Ponjango yimue Yusoma kuenje wa mola onduko Yehova. Eye wa limbuka okuti lia kala etambululo lia Suku, kuenda wa yonguile oku lisanga Lolombangi Via Yehova. Nda linga esokiyo, kuenje noke lioloneke vimue eye wa enda kohongele vekongelo limue kelimi lio Chinês kolupale luo Vancouver.

Noke Cheri wa ndi sapuila okuti, “omanu vaco va ñapeleko calua. Ame ndi pondola oku va sapuila ndomo ñasi.” Nda kuata esanju lialua poku yeva  okuti tunde eci Cheri a kala vupange woku linga olofilme, lalimue eteke a lingile ukamba. Cheri wa amamako oku endaenda kolohongele. Pole kunyamo wo 2005 eye wa soneha ocicapa ci lekisa okuti o ka linga olofilme vivali kofeka yo China kuenje ca kisika eye oku tiukila ko Hong Kong. Kunyamo wo 2006 Cheri wa tumbika omuenyo waye ku Yehova kuenda wa papatisiwa kohongele yimue Yolombangi Via Yehova ya lingiwila ko Hong Kong. Ndaño okuti eye wa yonguile oku talavaya calua kupange wa Yehova, pole, upange woku linga olofilme wa kala oku u tateka, kuenje ka kuatele esanju liasuapo.

Kunyamo wo 2009, ekalo liomuenyo wa Cheri lia pongoloka. Eye wa nolapo oku siapo upange woku linga olofilme oco a litumbike lutima wosi kupange wa Yehova. Wa linga ukamba walua vekongelo. Eye wa linga ukundi wotembo yosi yolondaka viwa Viusoma kuenda wa kuata esanju lioku kuatisa omanu oku sanga ekalo liwa komuenyo.—Mateo 24:14.

Noke, Cheri wa nõlapo oku lilongisa elimi lio Nepalês oco a kuatise ocimunga cimue Colombangi Via Yehova vi vangula elimi lio Nepalês ko Hong Kong. Ame ndo sapuila okuti omanu valua va vangula elimi lio Nepalês, ka va yevelela momo ka va vangula ciwa elimi liongelesi ale elimi lio Chinês kuenda va kuete ovituwa via litepa. Cheri wa ndi sapuila esanju a kuata omo lioku kuatisa omanu vaco oku sanga elomboloko Liembimbiliya. Eteke limue eci a kala kupange woku kunda konjo lanjo, wa sanga ukãi umue wo kofeka yo Nepal okuti wa kũlĩhile ovina vimue viatiamẽla ku Yesu, pole, ka kũlĩhile lacimue catiamẽla ku Yehova, Suku yocili. Cheri wo lekisa Vembimbiliya okuti Yesu wa likutilila ku Isiaye wokilu. Eci ukãi waco a limbuka okuti o sukila oku likutilila ku Suku yocili okuti onduko yaye Yehova, wa tava oku lilongisa Embimbiliya. Noke, ulumue waye kuenda omõlavo ufeko va fetikavo oku lilongisa Embimbiliya.—Osamo 83:18; Luka 22:41, 42.

Eci nda limbuka esanju Cheri a kuata omo lioku litumbika kupange wakundi wotembo yosi, nda lipula ndoco: ‘Nye ci ndi tateka oku linga eci eye a kasi oku linga?’ Otembo yaco nda tiukililevo ko Hong Kong. Nda nolapo oku linga apongoloko komuenyo wange oco ndi pesile otembo yalua koku longisa ocili Cembimbiliya. Nda limbuka okuti oku yevelela omanu kuenda oku va kuatisa oku sanga elomboloko Liondaka ya Suku, ci nena esanju.

Ame nda fetika oku longisa Embimbiliya ukaĩ umue wo kofeka yo Vietname okuti wa sumuile calua kuenda wa enda oku lila otembo yosi. Cilo, eye wa kũlĩha ocimãho comuenyo kuenda o kuete esanju lioku kala la vamanji vekongelo.

Cheri kumue lame tua sanga ocina cimue ca velapo okuti ekemãlo li sule. Ndaño okuti koku linga olofilme tua kuatele esanju kuenda ekemãlo, oku longisa omanu catiamẽla ku Yehova Suku ca tu ĩha esanju lialua momo ceca esivayo kokuaye. Tua kuata elomboloko liolondaka Yesu a popia viokuti: “Esumũlũho li tunda koku eca olio lia lua, eli li tunda koku tambula li sule.”—Ovilinga 20:35.