Olombangi Via Yehova okuti via kũlĩhiwa calua lupange wavo woku kundila konjo lanjo, cilo va kasivo oku talavaya lokangulu koku kapa alivulu kovitumãlo vina okuti ku pita omanu valua.

Cilo, onjila yaco yoku kunda ya siata oku kuamiwa calua. Kosãi ya Kuvala yunyamo wo 2011, ocimunga cimue Colombangi Via Yehova kofeka yo Nova York, ya fetika oku kundila omanu esapulo Liembimbiliya lekuatiso lilomesa kuenda okangulu koku kapa alivulu. Upange waco wa kuata onima yiwa kuenda ya lisanduila lonjanga valupale akuavo.

Toke kunyamo wo 2015, ci soka 165.390 kolokangulu via tumiwa kakongelo osi Olombangi Via Yehova. Va siatavo oku talavaya lolomesa vioku kapa alivulu, kuenda otulopatilela.

Oku kundila konjo lanjo oyo onjila yavelapo Olombangi via sita oku kuama poku sandeka ocili Cembimbiliya. Pole, oku kundila lekuatiso liolokangulu koku kapa alivulu, ca siatavo oku eca onima yiwa. Kũlĩhisa ovolandu amue.

Kofeka yo Peru, ulume umue o tukuiwa hati, Raul wa enda toke Kombangi yimue ya Yehova wa kala oku talavaya lokangulu koku kapa alivulu, kuenje wo pula hati: ‘Wa kali pi? Pa pita ale anyamo atatu tunde eci nda fetika oku sandiliya Olombangi Via Yehova!’ Eci nda mõla okangulu kene, nda pandula ku Suku.’

Olombangi Via Yehova olonjanja viosi via enda oku nyula vimbo eye a kala. Pole, Raul lalimue eteke a sangiwile konjo vokuenda kueteke ale kesulilo liosemana. Eye wa popia okuti wa lilongisile ale Embimbiliya Lolombangi Via Yehova kuenda wa yonguile oku fetika vali. Kuenje va sokiya oku lilongisa.

Kofeka yo Bulgária, ohueli yimue ya enda toke pocitumãlo pa kala okangulu kua kapiwa alivulu kuenje va ambata elivulu losapi hati: Uloño Wepata Liasanjuka. Kosemana yikuavo, va tiuka kuenje va ambata alivulu avali losapi hati: Elivulu Liasapulo Embimbiliya kuenda elivulu Aprenda do Grande Instrutor. Ombangi yimue ya Yehova ya kala oku talavaya lokangulu koku kapa alivulu ya pula ohueli yaco nda va kuete omãla vañami. Ovo va tambulula vati: “Handi ka tu kuete omõla, pole eci tu kuata tu yongola oku va longisa ovina viatiamẽla ku Suku. Alivulu a-a owo tua yonguile.”

Kofeka yo Ukrania, ulume umue wa wala uwalo wasualali wa a enda toke Kolombangi Via Yehova va kasi ocipepi lokangulu koku kapa alivulu. Eye wa popia hati: “Ndi yongola oku kũlĩha, otembo yipi o Armagedo yi keya.” Ulume waco wa pangele onepa kuyaki umue wa lingiwa kofeka yo Ucrânia. Ovina vi kasi oku pita voluali luosi via lekisa kokuaye okuti o Armagedo i kasi ocipepi, kuenje wa enda oku li pula esunga lieci Suku ka li nenele handi. Lekuatiso Liembimbiliya, akundi va lombolola okuti Suku o kuete esunga limue lieci ka li nenele, pole, ndopo o ka nyõla olondingaĩvi viosi. Ulume waco wa ta va oku tambula Utala Wondavululi kuenda o Despertai! Kumue lelivulu losapi hati: Existe um Criador Que Se Importa com Você?

Kofeka yo Macedônia, ukuenje umue wa enda toke pocitumãlo pa kala okangulu koku kapa alivulu, kuenje wa popia okuti, wa siata oku tambula olorevista vietu kuenda o yongola elivulu losapi hati: Embimbiliya li Longisa Nye? Eye wa popia okuti enda vociseleko cimue calivulu ci sangiwa volokololo oco a ka fetike oku tanga elivulu liaco.

Eci pa pita olowola vivali, ulume waco wa tiuka okuti wa tanga ale toke kemẽla 79 lielivulu liaco. Eye wa popia hati: “Elivulu eli li pongolola omuenyo womanu! Nda limbuka okuti ovina vialua nda tavaile, viuhembi. Ovina via lomboluiwa velivulu eli, viocili. Olio lia pongolola onjila ndomo ndi tenda omuenyo.”