Vhurifhi Ha U Thoma Vhu Yaho Kha Vhakorinta 6:1-20
6 Musi ni tshi lwa na wahaṋu,+ ndi ngani ni tshi mu isa khothe uri a haṱulwe nga vhathu vha songo lugaho? Ndi ngani ni sa mu isi kha vhakhethwa uri vha mu haṱule?
2 Kani a ni zwi ḓivhi uri vhakhethwa vha ḓo haṱula shango?+ Arali ni tshi ḓo haṱula shango, ni kundwa ngani u haṱula milandu miṱuku?
3 Naa a ni zwi ḓivhi uri ri ḓo haṱula vharuṅwa?+ Ri nga kundwa hani u haṱula milandu ya ḽino shango?
4 Arali ni na milandu ya ḽino shango ine ya tea u haṱulwa,+ ndi ngani ni tshi nanga vhane vha nyadziwa nga tshivhidzo uri vha ni haṱule?
5 Ndi amba zwenezwo uri ni shone. Naa a hu na o ṱalifhaho vhukati haṋu ane a nga kona u haṱula vhahawe?
6 Nṱhani hazwo, Vhakriste vha isana khothe kha vhathu vhane vha si vhe vhatendi!
7 Musi ni tshi isana khothe ni vha ni tshi khou shonisana. Ndi ngani ni sa konḓeleli wahaṋu musi a tshi ni khakhela?+ A si khwine u fhurwa?
8 Nṱhani hazwo, ni khakhela na u fhura Vhakriste nga inwi.
9 Naa a ni zwi ḓivhi uri vhathu vha songo lugaho a vha nga ḽi ifa ḽa Muvhuso wa Mudzimu?+ Ni songo fhurwa. Vhane vha ḓifara luvhi nga zwa vhudzekani,*+ vhane vha gwadamela midzimu ya zwifanyiso,+ phombwe,+ vhanna vhane vha rengisa muvhili,*+ vhanna vhane vha ita zwa vhudzekani na vhaṅwe vhanna,+
10 dzimbava, vha re na tseḓa,+ zwidakwa,+ vhane vha semana na mavemu a vha nga ḽi ifa ḽa Muvhuso wa Mudzimu.+
11 Vhaṅwe vhaṋu vho vha vha tshi ita zwenezwo. Fhedzi no ṱanzwiwa,+ no itwa vhakhethwa,+ no itwa vho lugaho+ dzinani ḽa Murena washu Yesu Kristo na nga muya wa Mudzimu washu.
12 Ndo tendelwa zwithu zwoṱhe, fhedzi a si zwoṱhe zwi vhuyedzaho.+ Ndo tendelwa zwithu zwoṱhe, fhedzi a thi nga tendi u langiwa nga tshiṅwe na tshiṅwe.
13 Zwiḽiwa ndi zwa thumbu, thumbu ndi ya zwiḽiwa; fhedzi Mudzimu u ḓo fhelisa vhuvhili hazwo.+ Muvhili ndi wa u shumela Murena, hu si wa u ḓifara luvhi nga zwa vhudzekani;*+ Murena u ṱhogomela muvhili.
14 Fhedzi Mudzimu o vusa Murena vhafuni,+ na riṋe u ḓo ri vusa+ nga maanḓa awe.+
15 Naa a ni zwi ḓivhi uri mivhili yaṋu ndi miraḓo ya Kristo?+ Naa ndi nga ita uri miraḓo ya Kristo na ya ane a rengisa muvhili i vhe na vhuthihi? Na khathihi!
16 Naa a ni zwi ḓivhi uri ane a ita zwa vhudzekani na ane a rengisa muvhili vha vha muvhili muthihi? Ngauri o ri, “vhuvhili havho vha vha ṋama nthihi.”+
17 Fhedzi ane a vha na vhuthihi na Murena u humbula u fana nae.+
18 Iledzani* u ḓifara luvhi nga zwa vhudzekani.*+ Zwiṅwe zwivhi a zwi tshikafhadzi muvhili, fhedzi tshivhi tshine tsha tshikafhadza muvhili ndi u ḓifara luvhi nga zwa vhudzekani.*+
19 Naa a ni zwi ḓivhi uri ni thembele+ ya muya mukhethwa une wa vha kha inwi, we na u wana kha Mudzimu?+ Zwiṅwe hafhu, ni vha Mudzimu,+
20 ngauri no rengwa nga mutengo muhulu.+ Ngauralo, hulisani Mudzimu+ nga mivhili yaṋu.+
Ṱhaluso dzi re magumoni a siaṱari
^ Zwi ambela kha vhanna vhane vha tendela vhaṅwe vhanna vha tshi ita navho zwa vhudzekani.
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Thevhedz., “Shavhani.”
