Bugu Ya Vhuvhili Ya Dzikhosi 14:1-29
14 Nga ṅwaha wa vhuvhili wa Yehoashi murwa wa Yoahasi+ khosi ya Isiraele, Amatsia murwa wa Yehoashi khosi ya Yuda a vha khosi.
2 O vha e na miṅwaha ya 25 musi a tshi vha khosi, o vhusa miṅwaha ya 29 Yerusalema. Mme awe o vha a tshi pfi Yehoadini wa Yerusalema.+
3 O bvela phanḓa a tshi ita zwo lugaho phanḓa ha Yehova, fhedzi o vha a sa fani na Davida+ makhulukuku wawe. O ita zwithu zwoṱhe zwe zwa itwa nga Yehoashi khotsi awe.+
4 Naho zwo ralo, ho ngo thutha fhethu ha vhurabeli,+ vhathu vho vha vha tshi kha ḓi dubisela midzimu yavho zwiṱhavhelo henefho fhethu ha vhurabeli.+
5 Musi muvhuso wawe u tshi tou khwaṱha, a vhulaya vhashumeli vhawe vhe vha vhulaya khotsi awe we a vha e khosi.+
6 Fhedzi ho ngo vhulaya vharwa vha vhavhulayi, u tendelana na ndaela ya Yehova yo ṅwaliwaho kha bugu ya Mulayo wa Mushe ine ya ri: “Vhokhotsi a vho ngo tea u fela zwivhi zwa vhana vhavho, na vhana a vho ngo tea u fela zwivhi zwa vhokhotsi avho; muṅwe na muṅwe u fanela u fela zwivhi zwawe.”+
7 O vhulaya Vhaedomo+ ngei Govhani ḽa Muṋo,+ o vhulaya vhanna vha 10 000, a thuba muḓi wa Sela nndwani,+ a u ira dzina ḽa Yokothiele na ṋamusi u kha ḓi vhidzwa nga ḽeneḽo dzina.
8 Amatsia a ruma vhaḓinḓa ha Yehoashi murwa wa Yoahasi murwa wa Yehu khosi ya Isiraele, a ri: “Iḓa ri lwe.”*+
9 Khosi Yehoashi wa Isiraele a rumela mulaedza kha Khosi Amatsia wa Yuda a ri: “Tsheṋe ya mipfa ya Libanoni yo rumela mulaedza kha muṱaululo wa Libanoni ya ri: ‘Ṋea murwa wanga ṅwananyana wau uri a vhe mufumakadzi wawe.’ Fhedzi tshivhanda tsha Libanoni tsha fhira nga henefho tsha kandekanya tsheṋe ya mipfa.
10 Ndi ngoho uri wo kunda Edomo,+ zwino mbilu yau i vho ḓihudza. Ḓiphiṋe nga gundo ḽau, fhedzi dzula nḓuni* yau. Ndi ngani u tshi ḓiṱungela khombo wa wa, wa wisa na muḓi wa Yuda?”
11 Fhedzi Amatsia a si thetshelese.+
Yehoashi khosi ya Isiraele a ya nndwani, ene na Amatsia khosi ya Yuda vha lwa ngei Bethe-semesi,+ muḓi une wa vha wa Yuda.+
12 Vhayuda vha kundwa nga Vhaisiraele, muṅwe na muṅwe a shavhela hayani* hawe.
13 Yehoashi khosi ya Isiraele a thuba Amatsia khosi ya Yuda, murwa wa Yehoashi murwa wa Ahasia ngei Bethe-semesi. Vha ya Yerusalema, vha kwasha luvhondo lwa Yerusalema u bva Khoroni ya Efuraimi+ u swika Khoroni ya Khonani,+ hune ha vha khubithi dza 400.*
14 A dzhia musuku woṱhe na siḽiva na madzanga oṱhe e a a wana nḓuni ya Yehova na mbulungeloni dza nḓuni* ya khosi, a thuba na vhathu. Nga murahu a vhuyelela Samaria.
15 Mafhungo oṱhe a Yehoashi na zwe a ita na mishumo yawe i sumbedzaho u vha na maanḓa na nḓila ye a lwa ngayo na Amatsia khosi ya Yuda, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele?
16 Yehoashi a vhulungwa na vhomakhulukuku wawe ngei Samaria+ na mahosi a Isiraele; murwa wawe Yerobeamu*+ a vha khosi vhudzuloni hawe.
17 Amatsia+ murwa wa Yehoashi khosi ya Yuda a fhedza miṅwaha ya 15 musi Yehoashi+ murwa wa Yoahasi khosi ya Isiraele o no fa.+
18 Mafhungo oṱhe a Amatsia, naa ho ngo ṅwaliwa buguni ya mafhungo a zwifhingani zwa kale zwa mahosi a Yuda?
19 Nga murahu vha mu itela tshimbevha+ ngei Yerusalema, a shavhela Laxisi, fhedzi vha rumela vhanna uri vha mu tevhele ngei Laxisi, vha mu vhulayela henengei.
20 Vha mu hwala nga bere vha mu humisela Yerusalema, vha mu vhulunga na vhomakhulukuku wawe Muḓini wa Davida.+
21 Vhathu vhoṱhe vha Yuda vha dzhia Asaria,*+ we a vha e na miṅwaha ya 16,+ vha mu ita khosi vhudzuloni ha khotsi awe Amatsia.+
22 A kunda muḓi wa Elatha+ a tshi itela Yuda, a u fhaṱulula musi khosi* yo no vhulungwa na vhomakhulukuku wayo.+
23 Nga ṅwaha wa vhu 15 hu tshi khou vhusa Amatsia murwa wa Yehoashi khosi ya Yuda, Yerobeamu+ murwa wa Yehoashi khosi ya Isiraele a vha khosi ngei Samaria, o vhusa miṅwaha ya 41.
24 O bvela phanḓa a tshi ita zwi sa takadzi Yehova. Ho ngo litsha zwivhi zwe Yerobeamu murwa wa Nebatha a ita uri Vhaisiraele vha zwi ite.+
25 O vusulusa mukano wa Isiraele u bva Lebo-hamathi*+ u swika Lwanzheni lwa Araba,*+ sa zwe Yehova Mudzimu wa Isiraele a amba a tshi shumisa mushumeli wawe Yona+ murwa wa Amithai, muporofita wa Gathi-hefere.+
26 Ngauri Yehova o vhona Vhaisiraele vha tshi khou tambula vhukuma.+ Ho vha hu songo sala muthu na muthihi we a vha a tshi nga thusa Vhaisiraele, naho e muthu a sa koni tshithu kana a si na nungo.
27 Fhedzi Yehova o vha o fhulufhedzisa uri ha nga fhelisi dzina ḽa Isiraele kha ḽifhasi.+ Ngauralo, a vha tshidza a tshi shumisa Yerobeamu murwa wa Yehoashi.+
28 Mafhungo oṱhe a Yerobeamu na zwoṱhe zwe a ita na mishumo yawe i sumbedzaho u vha na maanḓa, nḓila ye a lwa ngayo na nḓila ye a vhuyedzedza ngayo Damaseko+ na Hamathi+ ngei Yuda kha ḽa Isiraele, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele?
29 Yerobeamu a vhulungwa na vhomakhulukuku wawe vhoṱhe na mahosi a Isiraele; murwa wawe Sakaria+ a vha khosi vhudzuloni hawe.
Ṱhaluso dzi re magumoni a siaṱari
^ Kana “ri livhane zwifhaṱuwo.”
^ Kana “pfamoni.”
^ Thevhedz., “denndeni.”
^ Hu ṱoḓaho u vha mithara dza 178. Sedzani Ṱhume. B14.
^ Kana “pfamoni.”
^ Ndi Yerobeamu wa Vhuvhili.
^ Zwine zwa amba uri “Yehova O Thusa.” U vhidzwa Usia kha 2Dz 15:13; 2Krk 26:1-23; Yes 6:1 na Sak 14:5.
^ Ane a vha Amatsia khotsi awe.
^ Kana “khoroni ya Hamathi.”
^ Ndi Lwanzhe lwa Muṋo kana Lwanzhe lwo Faho.
