Dotoronomio 12:1-32
12 “Maitele na mahaṱulele zwine na fanela u zwi tevhedza maḓuvha oṱhe musi ni tshi khou tshila shangoni ḽine Yehova Mudzimu wa vhomakhulukuku waṋu a ḓo ni ṋea ḽone uri ḽi vhe ḽaṋu ndi haya:
2 Ni fhelise tshoṱhe fhethu hoṱhe hune tshaka dzine na ḓo dzi dzhia dza gwadamela hone midzimu yadzo,+ hu sa londwi uri ndi thavhani ndapfu kana zwikwarani kana nga fhasi ha miri yoṱhe mihulu.
3 Ni thuthe aḽeṱare dzavho, ni phusukanye phuphu dzavho khethwa,+ ni fhise thanda dzavho khethwa,* ni reme zwifanyiso zwa midzimu yavho zwo vhaḓwaho,+ ni fhelise madzina avho uri a si tsha pfala henefho fhethu.+
4 “A no ngo tea u gwadamela Yehova Mudzimu waṋu nga yeneyo nḓila.+
5 Nṱhani hazwo, ni ṱoḓe Yehova Mudzimu waṋu huṅwe na huṅwe hune a nanga u vhea hone dzina ḽawe na fhethu hune a dzula hone vhukati ha tshaka dzaṋu dzoṱhe, ni ye henefho.+
6 Ni ḓise henefho zwifhiwa zwa u fhiswa,+ zwiṱhavhelo zwaṋu, tshafumi tshaṋu,+ miṋeelo yaṋu,+ zwifhiwa zwaṋu zwa muano, zwifhiwa zwaṋu zwa u ḓifunela+ na matanzhe a masambi aṋu a kholomo na a nngu.+
7 Inwi na miṱa yaṋu ni tea u zwi ḽa henefho phanḓa ha Yehova Mudzimu waṋu,+ ni takalele mishumo yaṋu yoṱhe,+ ngauri Yehova Mudzimu waṋu o ni fhaṱutshedza.
8 “A no ngo tea u ita zwine ra khou zwi ita fhano ṋamusi, hune muṅwe na muṅwe a ita zwine a vhona zwo tea khae*
9 ngauri a ni athu u swika fhethu hune na ḓo dzula hone,+ a ni athu u wana ifa ḽine Yehova Mudzimu waṋu a ḓo ni ṋea ḽone.
10 Musi ni tshi wela Yorodane+ na dzula shangoni ḽine Yehova Mudzimu waṋu a ḓo ni ṋea ḽone, u ḓo ni awedza kha maswina aṋu oṱhe o ni tangaho, ni ḓo dzula no tsireledzea.+
11 Ni ḓo ḓisa zwoṱhe zwe nda ni laedza fhethu hune Yehova Mudzimu a ḓo hu nanga uri dzina ḽawe ḽi dzule hone,+ zwifhiwa zwaṋu zwa u fhiswa, zwiṱhavhelo zwaṋu, tshafumi tshaṋu,+ miṋeelo yaṋu, na tshifhiwa tshiṅwe na tshiṅwe tsha muano tshine na tshi anela Yehova.
12 Ni takale phanḓa ha Yehova Mudzimu waṋu,+ inwi na vharwa vhaṋu, vhananyana vhaṋu, phuli dzaṋu dza vhanna na dza vhafumakadzi na Vhalevi vhane na dzula navho miḓini* yaṋu, ngauri a vho ngo wana mukovhe kana ifa u fana na inwi.+
13 Ni ṱhogomele uri ni si ṋekedze zwifhiwa zwa u fhiswa huṅwe na huṅwe hune na funa.+
14 Ni ṋekedze zwifhiwa zwaṋu zwa u fhiswa fhethu hune ha vha na tshaka dzaṋu fhedzi hune Yehova a ḓo hu nanga, henefho fhethu ni ite tshiṅwe na tshiṅwe tshine nda khou ni laya tshone.+
15 Musi ni tshi tama ṋama ni nga ṱhavha na ḽa,+ u ya nga phaṱhutshedzo ye Yehova Mudzimu waṋu a ni ṋea yone miḓini yaṋu yoṱhe.* Muthu a re na tshika na o kunaho vha nga i ḽa, u fana na musi ni tshi ḽa phala kana ntsa.
16 Fhedzi ni songo ḽa malofha;+ ni a shululele fhasi u fana na maḓi.+
17 A u nga tendelwi miḓini yau* u ḽa tshipiḓa tshithihi kha zwa fumi zwa thoro, waini yau ntswa, mapfura au, matanzhe a masambi au a kholomo na a nngu,+ zwifhiwa zwa u ḓifunela kana muṋeelo wau.
18 Zwenezwi u zwi ḽe u phanḓa ha Yehova Mudzimu wau, fhethu hune Yehova Mudzimu wau a ḓo hu nanga,+ iwe na murwa wau, ṅwananyana wau, na mushumeli wau wa munna na wa mufumakadzi, na Vhalevi vhane vha dzula miḓini yau; u ḓo takala phanḓa ha Yehova Mudzimu wau kha mishumo yau yoṱhe.
19 U ṱhogomele uri u si hangwe Mulevi+ tshifhinga tshoṱhe musi u shangoni ḽau.
20 “Musi Yehova Mudzimu wau a tshi ḓo engedza shango ḽau,+ sa zwe a fhulufhedzisa,+ iwe wa ri: ‘Ndi khou ṱoḓa u ḽa ṋama,’ ngauri wo vha u tshi khou tama u ḽa ṋama, u nga ḽa ṋama tshifhinga tshiṅwe na tshiṅwe musi u tshi i tama.+
21 Arali fhethu he Yehova Mudzimu waṋu a hu nanga uri a vhee dzina ḽawe+ hu kule na hune na vha hone, ni ṱhavhe iṅwe ya kholomo dzaṋu kana nngu dzaṋu dze Yehova a ni ṋea dzone, sa zwe nda ni laya, ni nga i ḽela miḓini* yaṋu musi ni tshi i tama.
22 Ni nga i ḽa u fana na musi ni tshi ḽa phala na ntsa;+ i nga ḽiwa nga muthu a re na tshika na muthu o kunaho.
23 Ni ite vhungoho ha uri ni songo ḽa malofha+ ngauri malofha ndi vhutshilo,+ a no ngo tea u ḽa ṋama i re na vhutshilo.
24 A no ngo tea u a ḽa. Ni a shululele fhasi u fana na maḓi.+
25 A no ngo tea u a ḽa, uri zwi ni tshimbilele zwavhuḓi khathihi na vhaḓuhulu vhaṋu, ngauri ni khou ita zwo lugaho phanḓa ha Yehova.
26 Ni dzhie fhedzi zwithu zwikhethwa zwine zwa vha zwaṋu na zwifhiwa zwaṋu zwa muano musi ni tshi ya fhethu he Yehova a hu nanga.
27 Henefho ni ḓo ṋekedza zwifhiwa zwa u fhiswa, ṋama na malofha,+ aḽeṱareni ya Yehova Mudzimu waṋu, malofha a zwiṱhavhelo zwaṋu a tevhulelwe kha aḽeṱare+ ya Yehova Mudzimu waṋu, fhedzi ṋama ni nga i ḽa.
28 “Ni ite vhungoho ha uri ni thetshelesa ndaela dzenedzi dzoṱhe dzine nda khou ni laya, uri inwi na vhana vhaṋu zwi ni tshimbilele zwavhuḓi tshifhinga tshoṱhe, ngauri ni khou ita zwithu zwavhuḓi na zwo lugaho phanḓa ha Yehova Mudzimu waṋu.
29 “Musi Yehova Mudzimu waṋu a tshi fhelisa mashango a tshaka+ ane na ḓo a dzhia na dzula khao,
30 ni ṱhogomele uri ni si fashwe musi dzo no fheliswa phanḓa haṋu. Ni songo vhudzisa nga ha midzimu yadzo na ri: ‘Tshaka idzo dzo vha dzi tshi shumela hani midzimu yadzo? Na nṋe ndi ḓo ita nga u ralo.’+
31 A no ngo tea u ita zwenezwi zwithu kha Yehova Mudzimu waṋu, ngauri vha itela midzimu yavho zwithu zwoṱhe zwi nengisaho zwine Yehova a zwi vhenga, vha fhisa vharwa vhavho na vhananyana vhavho vha tshi itela midzimu yavho.+
32 Ni ite zwoṱhe zwine nda khou ni laya.+ A no ngo tea u zwi engedza kana u zwi fhungudza.+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana “zwine a humbula uri zwo luga.”
^ Thevhedz., “khoroni.”
^ Thevhedz., “nga ngomu khoroni dzaṋu dzoṱhe.”
^ Thevhedz., “nga ngomu khoroni dzaṋu.”
^ Thevhedz., “khoro.”
