Dotoronomio 6:1-25
6 “Hedzi ndi ndaela, maitele na mahaṱulele zwe Yehova Mudzimu waṋu a nṋea zwone uri ndi ni funze zwone uri ni tevhedze zwenezwo musi ni tshi wetshela kha shango ḽine na ḓo ḽi dzhia,
2 uri ni ofhe Yehova Mudzimu waṋu na u tevhedza maitele awe oṱhe na ndaela dzawe dzine nda khou ni ṋea dzone maḓuvha oṱhe a vhutshilo haṋu, inwi, vhana vhaṋu na vhaḓuhulu vhaṋu,+ uri ni tshile tshifhinga tshilapfu.+
3 Thetshelesa iwe Isiraele, u tevhedze zwenezwo nga vhuronwane, uri u bvelele na uri u ande shangoni ḽi elelaho mafhi na mutoli, sa zwe Yehova Mudzimu wa vhomakhulukuku wau a fhulufhedzisa.
4 “Thetshelesa, Iwe Isiraele: Yehova Mudzimu washu ndi Yehova e eṱhe.+
5 U tea u funa Yehova Mudzimu wau nga mbilu yau yoṱhe na nga zwoṱhe zwine wa vha zwone*+ na nga nungo* dzau dzoṱhe.+
6 Haya maipfi ane nda khou u vhudza one ṋamusi a dzule e mbiluni yau,
7 u a ṅwale mbiluni dza vhana vhau,*+ u ambe nga hao musi wo dzula nḓuni yau, musi u tshi khou tshimbila, musi u tshi ya u eḓela na musi u tshi vuwa.+
8 U a vhofhelele kha tshanḓa tshau sa tshihumbudzi, u a vhofhelele kha phanḓa yau.*+
9 U a ṅwale kha fureme dza nnḓu yau na khoroni dzau.
10 “Musi Yehova Mudzimu wau a tshi u isa shangoni ḽe a anela vhomakhulukuku wau Abrahamu, Isaka na Yakobo uri u ḓo u ṋea ḽone,+ miḓi mihulu yavhuḓi ye wa si i fhaṱe,+
11 nnḓu dzo ḓalaho nga zwithu zwavhuḓi zwo fhambanaho zwe u si zwi shumele, zwisima zwe u si zwi bwe, masimu a minḓirivhe na a miri ya miṱwari zwe u si zwi ṱavhe, musi wo no ḽa wa fura,+
12 u ṱhogomele uri u si hangwe Yehova+ we a u bvisa shangoni ḽa Egipita, nḓuni ya vhupuli.
13 U ofhe Yehova Mudzimu wau,+ u shumele ene fhedzi,+ u ane nga dzina ḽawe.+
14 A wo ngo tea u gwadamela miṅwe midzimu, naho i midzimu ifhio ya vhathu vhane wa dzula tsini navho,+
15 ngauri Yehova Mudzimu wau ane a vha vhukati hau ndi Mudzimu ane a ṱoḓa u tshi ḓikumedza tshoṱhe khae.+ Arali wa sa ita nga u ralo, Yehova Mudzimu wau u ḓo u sinyutshela,+ a u fhelisa fhano kha ḽifhasi.+
16 “U songo linga Yehova Mudzimu wau,+ u fana na zwiḽa u tshi mu linga ngei Masaha.+
17 U tevhedze nga vhuronwane ndaela dza Yehova Mudzimu wau, na khumbudzo dzawe na maitele awe, zwe a u laya uri u zwi tevhedze.
18 U ite zwo lugaho na zwivhuya phanḓa ha Yehova uri u bvelele u kone u dzhena u dzhie shango ḽavhuḓi ḽe Yehova a anela vhomakhulukuku wau,+
19 nga u pandela maswina au oṱhe, sa zwe Yehova a fhulufhedzisa.+
20 “Tshifhingani tshi ḓaho musi ṅwana wau a tshi ḓo u vhudzisa a ri: ‘Khumbudzo, maitele na mahaṱulele zwe Yehova Mudzimu washu a u laya zwone zwi amba mini?’
21 u fhindule ṅwana wau u ri: ‘Ro vha ri phuli dza Farao ngei Egipita, fhedzi Yehova a ri bvisa Egipita nga tshanḓa tshawe tsha maanḓa.
22 Ngauralo, Yehova a ita vhuṱolo vhuhulu vhu ofhisaho ngei Egipita+ na kha Farao na kha muṱa wawe woṱhe ri tshi zwi vhona.+
23 O ri bvisa henefho uri a ri ḓise fhano uri a ri ṋee shango ḽe a anela vhomakhulukuku washu.+
24 Ngauralo, Yehova a ri laya uri ri tevhedze enea maitele oṱhe na uri ri ofhe Yehova Mudzimu washu uri zwithu zwi ri tshimbilele zwavhuḓi,+ uri ri tshile,+ samusi ro bvela phanḓa ri tshi khou tshila u swika zwino.
25 Ri ḓo vha vhavhuya arali ra tevhedza dzenedzi ndaela dzawe dzoṱhe nga vhuronwane ra thetshelesa Yehova Mudzimu washu, sa zwe a ri laya.’+
Ṱhaluso dzi re magumoni a siaṱari
^ Kana “maanḓa; zwishumiswa.”
^ Kana “u a vhudze vhana vhau tshifhinga tshoṱhe.”
^ Thevhedz., “vhukati ha maṱo au.”
