Ekisoda 20:1-26
20 Mudzimu a amba zwenezwi zwoṱhe a ri:+
2 “Ndi nṋe Yehova Mudzimu wau, we a u bvisa shangoni ḽa Egipita, nḓuni ya vhupuli.+
3 U songo gwadamela miṅwe midzimu nga nnḓa ha nṋe.*+
4 “U songo ḓivhaḓela tshifanyiso kana u ita tshifanyiso tsha zwa ṱaḓulu kana zwi re kha ḽifhasi kana zwi re maḓini.+
5 U songo zwi gwadamela kana wa ungeledzwa uri u zwi shumele,+ ngauri nṋe Yehova Mudzimu wau ndi Mudzimu ane a ṱoḓa u tshi ḓikumedza tshoṱhe khae,+ ane a pfisa vhana vhuṱungu nga nṱhani ha vhukhakhi ha vhokhotsi avho, u swika kha murafho wa vhuraru na wa vhuṋa kha vhane vha mmbenga;
6 fhedzi ane a sumbedza lufuno lu sa shanduki u swika kha mirafho ya zwigidi ya vhane vha mpfuna na vhane vha tevhedza milayo yanga.+
7 “U songo shumisa luvhi dzina ḽa Yehova Mudzimu wau,+ ngauri Yehova a nga si litshe u pfisa vhuṱungu ane a shumisa luvhi dzina ḽawe.+
8 “U humbule ḓuvha ḽa Savhatha, u ḽi ite ḽikhethwa.+
9 Mishumo yau yoṱhe u i ite nga maḓuvha a rathi,+
10 fhedzi nga ḓuvha ḽa vhusumbe ndi savhatha ya Yehova Mudzimu wau. U songo shuma tshithu, iwe na murwa wau, ṅwananyana wau, phuli yau ya munna, phuli yau ya mufumakadzi na zwifuwo zwau na mutsinda ane a dzula nḓuni yau.*+
11 Ngauri Yehova o ita ḽiṱaḓulu na ḽifhasi nga maḓuvha a rathi, lwanzhe na zwoṱhe zwi re khazwo, a awela nga ḓuvha ḽa vhusumbe.+ Ndi ngazwo Yehova o fhaṱutshedza ḓuvha ḽa Savhatha, a ḽi ita ḽikhethwa.
12 “Hulisa khotsi au na mme au+ uri u tshile tshifhinga tshilapfu u shangoni ḽine Yehova Mudzimu wau a khou ṋea ḽone.+
13 “U songo vhulaya.+
14 “U songo vha phombwe.+
15 “U songo tswa.+
16 “U songo ambela muṅwe muthu vhuṱanzi ha u zwifha musi u tshi khou ṋea vhuṱanzi.+
17 “U songo emula nnḓu ya muṅwe muthu. U songo emula mufumakadzi wa muṅwe muthu,+ phuli yawe ya munna, phuli yawe ya mufumakadzi, mboho yawe, donngi yawe kana tshithu tsha muṅwe muthu.”+
18 Vhathu vhoṱhe vho vha vha tshi khou pfa mibvumo na u vhona dziphenyo, hu tshi khou lila luṋanga, thavha i tshi khou duba vhutsi; vha tshi vhona zwenezwi vha tetemela, vha imela kule.+
19 Vha amba na Mushe vha ri: “Iwe amba na riṋe, ri ḓo thetshelesa; fhedzi Mudzimu a songo amba na riṋe ngauri ri khou ofha uri ri ḓo fa.”+
20 Mushe a amba na vhathu a ri: “Ni songo ofha, ngauri Mudzimu wa ngoho o ḓa u ni linga,+ uri ni dzule ni tshi mu ofha uri ni si ite tshivhi.”+
21 Vhathu vha imela kule, fhedzi Mushe a ya tsini na gole ḽitswu-ḽitswu ḽe Mudzimu wa ngoho a vha e khaḽo.+
22 Yehova a amba na Mushe a ri: “Zwine wa fanela u vhudza Vhaisiraele ndi hezwi: ‘No zwi vhona uri ndo amba na inwi ndi ṱaḓulu.+
23 Ni songo ita midzimu ya siḽiva kana ya musuku ngauri a no ngo tea u rabela miṅwe midzimu nga nnḓa ha nṋe.+
24 U mphaṱele aḽeṱare ya mavu, ine wa ḓo ṋekedza khayo zwifhiwa zwau zwa u fhiswa, zwiṱhavhelo zwau zwa u pfumedzana, nngu dzau kana mbudzi dzau na kholomo dzau. Huṅwe na huṅwe hune nda ita uri dzina ḽanga ḽi humbulwe+ ndi ḓo ḓa ha iwe, nda u fhaṱutshedza.
25 Arali wa mphaṱela aḽeṱare nga matombo, a wo ngo tea u i fhaṱa nga matombo o vhaḓwaho.+ Arali wa a vhaḓa u tshi shumisa tshezela, u ḓo i tshikafhadza.
26 U songo gonya nga zwiṱepisi u tshi ya aḽeṱareni yanga uri zwiraḓo zwau zwa mbeu zwi sa ḓo vhonala.’
Ṱhaluso dzi re magumoni a siaṱari
^ Kana “wa lwisana na nṋe.” Thevhedz., “phanḓa ha tshivhaṱuwo tshanga.”
^ Thevhedz., “khoroni yau.”
