Ekisoda 23:1-33
23 “U songo phaḓaladza mafhungo a mazwifhi.+ U songo shumisana na muvhi nga u vha ṱhanzi ya mazwifhi.+
2 U songo tevhela gogo ḽine ḽa ita vhuvhi, u songo ṋea vhuṱanzi ha mazwifhi wa ita uri muṅwe muthu a haṱulwe nga nḓila i songo teaho u tshi itela u takalelwa nga vhathu.
3 U songo sumbedza tshiṱalula kha mushai musi e tsengoni ngauri ndi mushai.+
4 “Arali wa ṱangana na mboho ya swina ḽau kana donngi yawe yo xela, u tea u i humisela khae.+
5 Arali wa vhona uri donngi ya muthu ane a u vhenga yo wa na muhwalo wayo, u songo i fhira wa i sia. U tea u mu thusa uri a i rule muhwalo.+
6 “U songo shanda mafhungo a mushai a re vhukati hau musi e tsengoni, u tshi itela uri a haṱulwe nga nḓila i songo teaho.+
7 “U songo pomoka muthu nga mazwifhi, u songo vhulaya muthu a si na mulandu na muvhuya, ngauri ndi nga si ambe uri muvhi ndi muvhuya.+
8 “U songo ṱanganedza zwa tshanḓanguvhoni, ngauri zwa tshanḓanguvhoni zwi ita uri vhathu vha si ite zwo lugaho. Zwi nga ita uri vhavhuya vha shandule phetho dzavho.+
9 “U songo tsikeledza mutsinda. Ni a zwi ḓivha uri zwi hani u vha mutsinda, ngauri na inwi no vha ni vhatsinda shangoni ḽa Egipita.+
10 “U lime tsimu yau miṅwaha ya rathi, u kuvhanganye zwibveledzwa zwayo.+
11 Fhedzi nga ṅwaha wa vhusumbe u i litshe i lale, u songo vhuya wa kaṋa tshi melaho khayo, vhashai vha re vhukati haṋu vha ḓo ḽa zwi melaho henefho, zwine vha zwi sia, zwi ḓo ḽiwa nga dziphukha. Hezwi ndi zwine wa fanela u zwi ita kha tsimu yau ya minḓirivhe na ya miṱwari.
12 “U shume mishumo yau maḓuvha a rathi; fhedzi nga ḓuvha ḽa vhusumbe u songo shuma tshithu, uri mboho yau na donngi yau zwi awele na ṅwana wa phuli yau na mutsinda vha awele.+
13 “Ni tea u tevhedza zwoṱhe zwine nda ni vhudza zwone;+ a no ngo tea u bula madzina a miṅwe midzimu; ni songo vhuya na pfala ni tshi khou a amba.+
14 “Ni pembelele vhuṱambo hanga luraru nga ṅwaha.+
15 U pembelele Vhuṱambo ha Vhurotho vhu si na Mbiliso.+ U ḽe vhurotho vhu si na mbiliso maḓuvha a sumbe, sa zwe nda u laya, nga tshifhinga tsho vhewaho nga ṅwedzi wa Abibi,*+ ngauri nga tshenetsho tshifhinga wo bva Egipita. Hu songo vha na ane a ḓa phanḓa hanga a songo fara tshithu.+
16 U pembelele Vhuṱambo ha u Kaṋa* ha zwiranzhe zwe wa lima masimuni au;+ na Vhuṱambo ha u Kuvhanganya* mafheloni a ṅwaha, musi u tshi kuvhanganya zwe wa kaṋa masimuni.+
17 Vhanna vhoṱhe vha fanela u ḓa phanḓa ha Murena wa ngoho Yehova, luraru nga ṅwaha.+
18 “A wo ngo tea u ṋekedza malofha a tshiṱhavhelo kana tshithu tshi re na mbiliso. Musi u tshi ṋekedza zwiṱhavhelo zwo nonaho nga vhuṱambo hanga, u songo zwi siela matshelo.
19 “U ḓise zwiranzhe zwa khwine zwe wa kaṋa masimuni au, u zwi ḓise nḓuni ya Yehova Mudzimu wau.+
“U songo vholomisa ṋama ya tshibudzana nga mafhi a mme atsho.+
20 “Ndi ruma muruṅwa uri a u range phanḓa+ na uri a u ise fhethu he nda u lugiselela hone.+
21 U mu thetshelese, u pfe zwine a amba. U songo mu shandukela, ngauri ha nga u hangweli vhutshinyi hau,+ ngauri dzina ḽanga ḽi khae.
22 Naho zwo ralo, arali wa thetshelesa nga vhuronwane zwine nda amba, wa ita zwoṱhe zwine nda amba, ndi ḓo vha swina ḽa maswina au, ndi ḓo lwa na vhane vha lwa na iwe.
23 Ngauri muruṅwa wanga u ḓo u ranga phanḓa a u swikisa shangoni ḽa Vhaamori, ḽa Vhahethe, ḽa Vhapheresi, ḽa Vhakanana, ḽa Vhahevi na ḽa Vhayebusi, ndi ḓo vha fhelisa.+
24 U songo gwadamela midzimu yavho kana wa ungeledzwa uri u i shumele, u songo edzisa maitele avho.+ Nṱhani hazwo, u tea u vha fhelisa u phusukanye phuphu dzavho khethwa.+
25 Ni tea u shumela Yehova Mudzimu waṋu,+ u ḓo ni fhaṱutshedza nga u ni ṋea vhurotho na maḓi.+ Ndi ḓo bvisa malwadze vhukati haṋu.+
26 Mufumakadzi a re shangoni ḽau a nga si ḓo tshinyalelwa kana u sa beba,+ ndi ḓo ita uri u tshile u swika u tshi vha mualuwa.
27 “U sa athu u swika ndi ḓo ita uri vhathu vha nnyofhe,+ ndi ḓo ita uri vhathu vhoṱhe vhane wa ṱangana navho vha ḓaḓe, ndi ḓo ita uri maswina au a u shavhe.*+
28 U sa athu u swika ndi ḓo ita uri vhathu vha kulee nungo,*+ ndi ḓo pandela Vhahevi, Vhakanana na Vhahethe phanḓa hau.+
29 A thi nga vha pandeli vhoṱhe nga ṅwaha muthihi, uri shango ḽi sa ḓo sala ḽi soga, phukha dza vho ḓo anda.+
30 Ndi ḓo vha pandela phanḓa hau nga zwiṱuku nga zwiṱuku, u swika u tshi anda wa dzula kha ḽeneḽo shango.+
31 “Ndi ḓo vhea mikano u bva Lwanzheni Lutswuku u swika lwanzheni lwa Vhafilisita, na u bva sogani u swika Mulamboni;*+ ngauri ndi ḓo kumedzela vhadzulapo vha ḽeneḽo shango zwanḓani zwau, iwe u ḓo vha pandela phanḓa hau.+
32 U songo vhofha mulanga navho kana u u vhofha na midzimu yavho.+
33 A vho ngo fanela u dzula shangoni ḽau, uri vha sa ḓo u itisa tshivhi phanḓa hanga. Arali wa shumela midzimu yavho, zwi ḓo vha tshikwekwe kha iwe.”+
Ṱhaluso dzi re magumoni a siaṱari
^ Sedzani Ṱhume. B15.
^ Vhu dovha ha ḓivhiwa sa Vhuṱambo ha Dzivhege kana Pentekoste.
^ Vhu dovha ha ḓivhiwa sa Vhuṱambo ha Mishasha (Madennde Makhethwa).
^ Kana “ndi ḓo ita uri maswina au a u furalele.”
^ Kana khamusi, “vha tshuwe; vha ofhe.”
^ Ndi Yufuratha.
