Genesi 49:1-33
49 Nga murahu Yakobo a vhidza vharwa vhawe a ri: “Kuvhanganani uri ndi ni vhudze zwine zwa ḓo itea kha inwi maḓuvhani a u fhedza a vhutshilo haṋu.
2 Kuvhanganani ni thetshelese inwi vharwa vha Yakobo, thetshelesani Isiraele khotsi aṋu.
3 “Rubeni,+ iwe u tanzhe+ ḽanga, u nungo dzanga, u mbebo yanga ya u ranga, iwe we wa ita uri ndi vhe na tshirunzi na nungo khulu.
4 Nga nṱhani ha u sa londa, u fana na maḓi a sa langei, a u nga ḓo vha wa u thoma, ngauri wo lala kha mmbete wa khotsi au.+ Wo tshikafhadza mmbete wanga nga tshenetsho tshifhinga. Wo lala kha mmbete wanga zwa vhukuma!
5 “Simioni na Levi ndi murathu na mukomana.+ Vha shumisa zwiṱhavhane zwavho u ita vhuvemu.+
6 Nṋe ndi nga si vhe vhukati havho. Ndi nga si kuvhangane navho, ngauri vho vhulaya vhanna vho sinyuwa,+ vho ḓitakadza nga u huvhadza mboho.
7 Hu semwa mbiti dzavho, ngauri ndi dza tshiṱuhu na vhuhali havho, ngauri ho kalula.+ Kha ndi vha fhandekanye shangoni ḽa Yakobo, ndi vha balanganye Isiraele.+
8 “Iwe Yuda,+ vhana vha khotsi au vha ḓo u khoḓa.+ Maswina au a ḓo kumedzwa zwanḓani zwau.*+ Vharwa vha khotsi au vha ḓo gwadama phanḓa hau.+
9 Yuda ndi ndawana.+ Ṅwananga, u ḓo ṱuwa musi wo no ḽa phukha ye wa i vhulaya. Wo lala wo shuvhama vhunga ndau, u fana na ndau, ndi nnyi ane a nga u ṱunga?
10 Lubaḓa a lu nga ṱuwi kha Yuda,+ na lubaḓa lwa vhuhosi lu re milenzheni yawe a lu nga bviswi, u vhuya u swika Shiḽo* a tshi ḓa;+ tshaka dzi ḓo mu thetshelesa.+
11 Iwe u ḓo vhofha donngi yau kha munḓirivhe, tshidonngana tshau u ḓo tshi vhofha kha munḓirivhe wavhuḓi, u ḓo kuvha zwiambaro zwau nga waini i ngaho malofha.
12 Maṱo au o tswukiswa nga waini, maṋo au o tsheniswa nga mafhi.
13 “Sebuloni+ u ḓo dzula khunzi-khunzini, hune zwikepe zwa vhofhiwa hone;+ mukano wawe u ḓo vha thungo ya Sidoni.+
14 “Isashari+ ndi donngi yo khwaṱhaho, yo lalaho vhukati ha mihwalo mivhili yo vhofhelelwaho kha sale.
15 U ḓo ita uri fhethu hune a dzula hone hu vhe havhuḓi na uri shango ḽi vhe ḽavhuḓi. U ḓo hwala muhwalo nga shaḓa ḽawe, a kombetshedzwa u shuma nga maanḓa sa phuli.
16 “Dani+ ane a vha muṅwe wa lushaka lwa Isiraele u ḓo haṱula vhathu vhawe.+
17 Dani u ḓo nga ṋowa i re thungo ha nḓila, ṋowa ya vuluvulu thungo ha nḓila, ine ya luma zwirethe zwa bere uri muṋameli wayo a we nga tshitiko.+
18 Ndi ḓo lindela u tshidzwa nga iwe Yehova.
19 “Gada+ u ḓo tangiwa nga tshigwada tsha mavemu, fhedzi ene u ḓo vha pandamedza.+
20 “Vhurotho* ha Ashere+ vhu ḓo vha vhunzhi, u ḓo ṋea khosi zwiḽiwa zwo i teaho.+
21 “Nafutali+ ndi tholo ya luvhilo. U amba maipfi avhuḓi.+
22 “Yosefa+ ndi tavhi ḽa muri u aṋwaho mitshelo, wo ṱavhiwaho tsini na tshisima, une matavhi awo a navhela kha luvhondo.
23 Fhedzi vhapfuli vho mu vutshela vha mu pfula nga misevhe, vha ḓi bvela phanḓa vha tshi mu vhenga.+
24 Vhura hawe vhu dzula ho akhwa,+ zwanḓa zwawe zwa dzula zwo khwaṱha.+ Zwo vha zwi tshi bva zwanḓani zwa wa Maanḓa wa Yakobo, kha Mulisa, a re Tombo ḽa Isiraele.
25 Ene* u bva ha Mudzimu wa khotsi au, u ḓo u thusa, u na Ramaanḓaoṱhe, u ḓo u fhaṱutshedza nga phaṱhutshedzo dzi bvaho ṱaḓulu, nga phaṱhutshedzo dzi bvaho mativhani,+ phaṱhutshedzo dza vhana vhanzhi na zwifuwo.
26 Phaṱhutshedzo dza khotsi au dzi ḓo fhira phaṱhutshedzo dza thavha dza lini na lini, na zwithu zwavhuḓi zwa zwikwara zwa lini na lini.+ Zwi ḓo dzula zwi ṱhohoni ya Yosefa, kha khare i re ṱhohoni ye ya nangwa vhukati ha vhana vha khotsi awe.+
27 “Benyamini+ u ḓo ṱhukhukanya sa ṱarelwa.*+ Nga matsheloni u ḓo ḽa tshe a zwima, nga madekwana u ḓo kovha zwe a thuba.”+
28 Vhenevha vhoṱhe ndi tshaka dza 12 dza Isiraele, ndi zwenezwo zwe khotsi avho a vha vhudza zwone musi a tshi khou vha fhaṱutshedza. O ṋea muṅwe na muṅwe wavho phaṱhutshedzo yo mu teaho.+
29 Nga murahu ha zwenezwo, a vha laya a ri: “Ndi ḓo vhulungwa na vhathu vha hashu.+ Ni mbulunge na vhokhotsi anga bakoni ḽi re tsimuni ya Efuroni wa Muhethe,+
30 kha bako ḽi re tsimuni ya Makapela phanḓa ha Mamure shangoni ḽa Kanana, tsimu ye Abrahamu a i renga kha Efuroni wa Muhethe uri hu vhe mavhiḓa.
31 Ndi hone he vha vhulunga Abrahamu na Sara+ mufumakadzi wawe. Henefho ho vhulungwa Isaka+ na Rebeka mufumakadzi wawe, henefho ndo vhulunga Lea.
32 Tsimu na bako ḽi re khayo zwo rengwa kha vharwa vha Hethe.”+
33 Ngauralo, musi Yakobo o no fhedza u laya vharwa vhawe, a humisela milenzhe yawe mmbeteni, a fa a vhulungwa he vhathu vha hawe vha vhulungwa hone.+
Ṱhaluso dzi re magumoni a siaṱari
^ Thevhedz., “Tshanḓa tshau tshi ḓo vha kha mitsinga ya maswina au.”
^ Zwine zwa amba uri “Muṋe Wa Tshithu; Ane Tsha Vha Tshawe.”
^ Kana “Zwiḽiwa.”
^ Ndi Yosefa.
^ Kana “mmbwa ya ḓaka.”
