Evangeli Ya Mateo 5:1-48
-
YESU U FUNZA E THAVHANI (1-48)
5 Musi a tshi vhona gogo, a gonya thavhani; musi o no dzula fhasi vhafunziwa vhawe vha ḓa khae.
2 A thoma u vha funza, a ri:
3 “Hu takala vhane vha ṱhogomela uri vha ṱoḓa u ḓivha Mudzimu,+ ngauri Muvhuso wa ṱaḓulu ndi wavho.
4 “Hu takala vhane vha lila, ngauri vha ḓo fhumudzwa.+
5 “Hu takala vho vuḓaho,+ ngauri vha ḓo vha vhaṋe vha ḽifhasi.+
6 “Hu takala vhane vha tama*+ u ita zwo lugaho, ngauri vha ḓo fushwa.+
7 “Hu takala vhane vha khathutshela,+ ngauri vha ḓo khathutshelwa.
8 “Hu takala vha mbilu dzo ṱambaho,+ ngauri vha ḓo vhona Mudzimu.
9 “Hu takala vhane vha ita uri hu vhe na mulalo,+ ngauri vha ḓo vhidzwa vhana* vha Mudzimu.
10 “Hu takala vho tovholwaho nga nṱhani ha uri vho luga,+ ngauri Muvhuso wa ṱaḓulu ndi wavho.
11 “Ni takale musi vhathu vha tshi ni sema+ na u ni tovhola+ nga nṱhani ha dzina ḽanga, vha tshi ni pomoka vhuvhi hoṱhe hu u zwifha.+
12 Takalani ni pembele,+ ngauri ni ḓo fhaṱutshedzwa+ zwihulu ngei ṱaḓulu, ngauri na vhaporofita vhe vha tshila tshifhingani tsho fhiraho vho vha tovhola.+
13 “Inwi ni muṋo+ wa ḽifhasi, fhedzi arali muṋo u si tsha pfala uri ndi muṋo, u nga itwa mini uri u dovhe u pfale? A u tshee na mushumo, tshawo ndi u laṱwa kule+ uri u kandekanywe nga vhathu.
14 “Inwi ni tshedza tsha shango.+ Muḓi u re nṱha ha thavha a u dzumbami.
15 Vhathu vha funga luvhone vha lu vhea khagala, a vha lu tibi nga manngi, uri lu vhonetshele vhoṱhe vha re nḓuni.+
16 Nga hu fanaho, tshedza tshaṋu kha tshi vhonetshele vhathu,+ uri vha vhone mishumo yaṋu mivhuya,+ vha rende Khotsi aṋu wa ṱaḓulu.+
17 “Ni songo humbula uri ndo ḓa u fhelisa Mulayo kana Vhaporofita. Ndo ḓa u ita uri zwo ṅwaliwaho zwi itee, hu si u zwi fhelisa.+
18 Ngoho ndi a ni vhudza uri samusi ḽiṱaḓulu na ḽifhasi zwi sa ḓo lovha, nga hu fanaho a hu na ḽeḓere na ḽithihi kana tshipiḓa tsha Mulayo tshine tsha ḓo fheliswa zwenezwi zwithu zwoṱhe zwi sa athu u itea.+
19 Ane a pfuka muthihi wa yeneyi milayo miṱuku, a funza vhathu uri vha i pfuke, u ḓo vhidzwa muṱuku Muvhusoni wa ṱaḓulu. Ane a i tevhedza na u i funza, onoyo u ḓo vhidzwa muhulwane Muvhusoni wa ṱaḓulu.
20 Ndi a ni vhudza uri arali ni songo luga u fhira vhamaṅwalo na Vhafarisei,+ ni nga si vhuye na dzhena Muvhusoni wa ṱaḓulu.+
21 “No zwi pfa uri ho ambiwa na vha kale ha pfi: ‘Ni songo vhulaya,+ ngauri ane a vhulaya u ḓo sengiswa khothe.’+
22 Naho zwo ralo, ndi a ni vhudza uri ane a dzula o sinyutshela+ wahawe u ḓo sengiswa khothe; fhedzi ane a sema wahawe u ḓo sengiswa Khothe Khulwane; ngeno ane a amba uri, ‘U tou vha tsilu!’ o eḓanwa nga u iswa muliloni wa Gehena.*+
23 “Arali ni tshi khou isa tshifhiwa tshaṋu aḽeṱareni,+ musi ni henengei na humbula uri wahaṋu o ni sinyutshela,
24 ni sie tshifhiwa tshaṋu henefho phanḓa ha aḽeṱare. Ni thome ni ye ni ite mulalo na wahaṋu, nga murahu ni kone u ṋekedza tshifhiwa tshaṋu.+
25 “Ni ṱavhanye ni dzudzanye mafhungo na ane a ni vhona mulandu musi ni nae nḓilani, uri a sa ni kumedzele kha muhaṱuli, muhaṱuli a ni kumedzela kha muḓinḓa na iswa dzhele.+
26 Ngoho ndi a ni vhudza ndi ri, a ni nga bvi ni sa athu u lifha tshelede yoṱhe.*
27 “No zwi pfa hu tshi pfi: ‘Ni songo vha phombwe.’+
28 Fhedzi nṋe ndi ri muthu ane a dzulela u lavhelesa mufumakadzi+ nga u mu emula, o no ita vhupombwe nae mbiluni yawe.+
29 Arali ḽiṱo ḽaṋu ḽa tsha u ḽa ḽi tshi ni khakhisa, ḽi nongoleni ni ḽi laṱe kule.+ Ngauri ndi khwine ni tshi xelelwa nga muraḓo muthihi nṱhani ha uri muvhili waṋu woṱhe u poswe Gehena.*+
30 Zwiṅwe hafhu, arali tshanḓa tshaṋu tsha u ḽa tshi tshi ni khakhisa, tshi tumuleni ni tshi laṱe kule.+ Ngauri ndi khwine ni tshi xelelwa nga muraḓo muthihi nṱhani ha uri muvhili waṋu woṱhe u poswe Gehena.*+
31 “Ho dovha ha ambiwa u pfi: ‘Ane a ṱala mufumakadzi wawe, a mu ṋee luṅwalo lwa u mu ṱala.’+
32 Fhedzi nṋe ndi ri ane a ṱala mufumakadzi wawe we a si ḓifare luvhi nga zwa vhudzekani,* u ita uri mufumakadzi wawe a vhe phombwe, na a vhingaho mufumakadzi o ṱalwaho, u ita vhupombwe.+
33 “No zwi pfa uri vha kale vho ambiwa navho ha pfi: ‘Ni songo ana na si ite,+ fhedzi ni fanela u ita zwe na anela Yehova.’*+
34 Hone ndi a ni vhudza uri ni songo ana na luthihi+ nga ḽiṱaḓulu, ngauri ndi khuluṋoni ya Mudzimu;
35 kana nga ḽifhasi ngauri ndi fhethu hune a kanda hone;+ kana nga Yerusalema ngauri ndi muḓi wa Khosi khulu.+
36 Ni songo ana nga ṱhoho yaṋu, ngauri ni nga si kone u ita uri vhudzi ḽi vhe ḽitshena kana ḽitswu.
37 Itani uri ‘Ee’ yaṋu i vhe ee, ‘Hai’ yaṋu i vhe hai,+ ngauri zwi fhiraho zwenezwi zwi bva kha muvhi.+
38 “No zwi pfa uri ho pfi: ‘Ḽiṱo ḽi lifhiwa nga ḽiṱo, ḽiṋo nga ḽiṋo.’+
39 Nṋe ndi ni vhudza uri ni songo lwa na muvhi, fhedzi ane a ni rwa kha shama ḽa tsha u ḽa, ni mu ṋekedze na ḽiṅwe.+
40 Arali muthu a tshi ṱoḓa u ni isa khothe uri a dzhie tshiambaro tshaṋu, mu ṋeeni na tshiṅwe;*+
41 arali muthu a re na maanḓa a ni kombetshedza u tshimbila khilomithara nthihi, ni tshimbile nae khilomithara mbili.
42 Ni ṋee ane a ni humbela, ni songo litsha u hadzima a ṱoḓaho u hadzimiwa.*+
43 “No zwi pfa hu tshi pfi: ‘Ni tea u funa muhura waṋu,+ ni vhenge swina ḽaṋu.’
44 Naho zwo ralo, nṋe ndi ni vhudza uri: Ni dzule ni tshi funa maswina aṋu+ na u rabelela vhane vha ni tovhola,+
45 ndi hone zwi tshi ḓo vhonala uri ni vhana vha Khotsi aṋu wa ṱaḓulu,+ samusi a tshi ṱavhisela ḓuvha vhavhi na vhavhuya na u nisela mvula vho lugaho na vha songo lugaho.+
46 Arali ni tshi funa vhane vha ni funa, ni vhuyelwa nga mini?+ Naa a si zwine zwa itwa nga vhathelisi?
47 Arali ni tshi lumelisa vhahaṋu fhedzi, naa ni khou ita zwa khwine? Naa a si zwine zwa itwa na nga vha dziṅwe tshaka?
48 Ivhani vho fhelelaho samusi na Khotsi aṋu wa ṱaḓulu o fhelela.+
Ṱhaluso dzi re magumoni a siaṱari
^ Thevhedz., “nḓala na ḓora.”
^ Thevhedz., “vharwa.”
^ Ndi fhethu hune ha fhiselwa hone mathukhwi nnḓa ha Yerusalema. Sedzani Mutevhe Wa Ṱhalutshedzo Ya Maipfi.
^ Thevhedz., “khwadirani ya u fhedzisela.” Sedzani Ṱhume. B14.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Kana “uri a dzhie tshiambaro tshaṋu tsha nga ngomu, mu ṋeeni na tshiambaro tshaṋu tsha nga nnḓa.”
^ Ndi u hadzima hu si na nzwalelo.
