Kha Vharoma 10:1-21
10 Zwine nda zwi tama na zwine nda humbelela vhahashu kha Mudzimu ndi uri vha tshidzwe.+
2 Ndi a khwaṱhisedza uri vha shumela Mudzimu nga u fhisea,+ fhedzi hu si u ya nga nḓivho yo teaho.
3 A vha ḓivhi zwine zwa ita uri Mudzimu a dzhie muthu o luga.+ Vha ita zwine vha funa,+ vha tshi vhona zwo luga, fhedzi vha sa iti zwine Mudzimu a ri ndi zwone zwine zwa ita uri muthu a pfi o luga.+
4 Mulayo wo guma nga Kristo,+ uri ane a vha na lutendo a pfi o luga.+
5 Mushe o ri: “Ane a ita zwo lugaho a tshi tevhedza Mulayo u ḓo tshila.”+
6 Luṅwalo lukhethwa lu amba uri muthu u dzhiiwa sa o lugaho nga u vha na lutendo. Lwo ri: “U songo amba mbiluni yau+ wa ri, ‘Ndi nnyi ane a ḓo gonya ṱaḓulu?’+ zwine zwa amba u ya u dzhia Kristo,
7 kana, ‘Ndi nnyi ane a ḓo ya mugodini?’+ zwine zwa amba u ya u bvisa Kristo vhafuni.”
8 Fhedzi luṅwalo lu ri mini? Lu ri: “Mulaedza u tsini hau, u mulomoni wau na mbiluni yau”;+ ndi mulaedza une ra khou u huwelela, une wa ṱoḓa uri muthu a vhe na lutendo.
9 Arali u tshi amba uri Yesu ndi Murena,+ u tshi tenda nga mbilu uri Mudzimu o mu vusa vhafuni, u ḓo tshidzwa.
10 Ngauri muthu u tenda nga mbilu, a itwa o lugaho, a vhudza vhaṅwe zwine a zwi tenda,+ zwa ita uri a tshidzwe.
11 Luṅwalo lu ri: “Ane a mu tenda ha nga shoni.”+
12 Ngauri Muyuda na Mugerika vha a fana.+ Vha na Murena muthihi, ane a ṋea zwinzhi vhoṱhe vhane vha mu vhidzelela.
13 Ngauri “vhoṱhe vha vhidzelelaho dzina ḽa Yehova* vha ḓo tshidzwa.”+
14 Fhedzi vha nga vhidzelela hani we vha si mu tende? Vha nga mu tenda hani vha songo pfa a tshi ambiwa? Vha nga pfa hani hu si na we a huwelela khavho?
15 Vha nga huwelela hani arali vha songo rumiwa?+ Samusi ho ṅwaliwa u pfi: “Ndi yavhuḓi lungafhani milenzhe ya vhane vha ḓivhadza mafhungo maḓifha a zwithu zwavhuḓi!”+
16 Fhedzi a si vhoṱhe vho thetshelesaho mafhungo maḓifha. Ngauri Yesaya o ri: “Yehova,* ndi nnyi we a tenda zwe ra zwi amba?”+
17 Muthu u tenda zwe a pfa.+ Zwe a pfa ndi zwe zwa ambiwa musi a tshi khou funziwa nga ha Kristo.
18 Naa zwenezwi zwi amba uri a vho ngo pfa wonoyo mulaedza? Na khathihi, “mulaedza wo pfiwa ḽifhasini ḽoṱhe, wo pfiwa na nga vhane vha dzula magumoni a ḽifhasi.”+
19 Naa zwenezwi zwi amba uri Vhaisiraele a vho ngo zwi pfesesa?+ Na khathihi, vho zwi pfesesa. Mushe o ri: “Ndi ḓo ita uri ni vhe na vivho ndi tshi shumisa vhathu vha dziṅwe tshaka; nda ni sinyusa nga lushaka lwa matsilu.”+
20 Fhedzi Yesaya a amba nga tshivhindi a ri: “Ndo waniwa nga vha songo nṱoḓaho;+ nda ḓivhiwa nga vhane vha si vhudzise nga ha nṋe.”+
21 Fhedzi o amba nga ha Vhaisiraele a ri: “Ndo fhedza ḓuvha ḽoṱhe ndi tshi khou humbela vhathu vha sa thetshelesi vha re na tshikhuna uri vha vhuyelele kha nṋe.”+
