Vhurifhi Ha Yakobo 4:1-17
4 Ndi ngani hu na nndwa na khani vhukati haṋu? Naa a zwi bvi kha nyemulo dzaṋu dzine na khou lwisana nadzo?+
2 Ni a tama, fhedzi a ni wani. Ni dzula ni tshi vhulaya na u emula, fhedzi a ni wani tshithu. Ni dzula ni tshi lwa na u ita khani.+ A ni na tshithu ngauri a ni humbeli.
3 Musi ni tshi humbela, a ni wani tshithu, ngauri ni humbela ni na zwiitisi zwi si zwavhuḓi, uri ni zwi shumisele nyemulo dzaṋu.
4 Inwi dziphombwe,* naa a ni zwi ḓivhi uri u konana na shango zwi ita uri ni vhe swina ḽa Mudzimu? Ane a konana na shango u vha a tshi khou ḓiita swina ḽa Mudzimu.+
5 Kani ni vhona u nga luṅwalo lwo sokou amba lu tshi ri: “Mbilu dzashu dzi ita uri ri vhe na vivho, zwa ita uri ri emule zwithu zwo fhambananaho”?+
6 Naho zwo ralo, Mudzimu u ri ṋea vhuthu vhuhulu vhune ha fhira zwoṱhe. Ndi ngazwo luṅwalo lu tshi ri: “Mudzimu u lwa na vhane vha ḓihudza,+ u ṋea vhuthu vhuhulu vhane vha ḓiṱukufhadza.”+
7 Ngauralo, ḓiṱukufhadzeni kha Mudzimu;+ fhedzi ni lwe na Diabolo,+ u ḓo ni shavha.+
8 Sendelani tsini na Mudzimu, na ene u ḓo sendela tsini na inwi.+ Ṱambani zwanḓa inwi vhaitazwivhi,+ ni kunakise mbilu dzaṋu,+ inwi vha timatimaho.
9 Ipfani vhuṱungu ni lile.+ Ni lile nṱhani ha u sea, ni ṱungufhale nṱhani ha u takala.
10 Ḓiṱukufhadzeni phanḓa ha Yehova,*+ u ḓo ni hulisa.+
11 Vhahashu, litshani u sasaladzana.+ Ane a sasaladza wahawe kana u mu haṱula, u lwa na mulayo na u u nyadza.* Arali u tshi nyadza mulayo, a u tevhedzi mulayo, fhedzi u muhaṱuli.
12 Muṋei wa Mulayo na Muhaṱuli ndi muthihi,+ ndi ene ane a kona u tshidza na u fhelisa.+ Fhedzi iwe u ḓiita nnyi u tshi haṱula muhura wau?+
13 Thetshelesani, inwi vhane na ri: “Ṋamusi kana matshelo ri ḓo ya kha uḽa muḓi, ra fhedza ṅwaha henengei, ri ḓo ita zwa mabindu, ra wana tshelede,”+
14 ngeno ni sa ḓivhi uri hu ḓo itea mini kha inwi matshelo.+ Ngauri ni khuli ine ya vha hone lwa tshifhinganyana, nga murahu ya balangana.+
15 Fhedzi ni tea uri: “Arali Yehova* a tshi zwi funa,+ ri ḓo tshila ra ita izwi kana zwiḽa.”
16 Fhedzi zwino ni a ḓihudza, ni tshi zuwa zwihulu. Honohu u zuwa ndi huvhi.
17 Ane a ḓivha zwo lugaho, fhedzi a si zwi ite, u khou ita tshivhi.+
