1. Ndi mini tshe tsha thivhela muṱa wa Adamu na Eva uri u sa kone u dzhena tsimuni ya Edeni, nahone Abele o vha a tshi ṱoḓa mini nga maṱo matswuku?

 ABELE o lavhelesa sambi ḽawe ḽa nngu dzine dza khou fula tshikwarani. Khamusi nga murahu ha zwenezwo o mbo ḓi dovha a lavhelesa kulenyana he a vhona tshithu tshine tsha khou penya. O vha a tshi zwi ḓivha uri he a lavhelesa hone ho vha hu na banga ḽi dugaho mulilo ḽe ḽa vha ḽi tshi dzula ḽi tshi khou mona, u itela u thivha nḓila i yaho tsimuni ya Edeni. Vhabebi vhawe vho vhuya vha dzula henefho, fhedzi vhone u katela na vhana vhavho, vho vha vha songo tsha tendelwa u dzhena henefho. Edzani u humbula hu nga tshitheu hu tshi khou vhudzula lumuya lu rotholelaho, lu tshi khou vhudzula mavhudzi a Abele musi o lilala nahone a tshi khou elekanya nga ha Musiki wawe. Naa vhushaka ho tshinyalaho vhukati ha vhathu na Mudzimu ho vha vhu tshi ḓo vhuya ha dzudzanywa? Abele o vha a tshi ṱoḓa nga maṱo matswuku uri zwi vhe nga u ralo.

2-4. Abele u amba na riṋe nga muhumbulo ufhio ṋamusi?

² Abele u a amba na inwi na ṋamusi. Naa ni khou mu pfa? Ni nga kha ḓi amba uri zwithu zwo raloho a zwi konadzei. Hafhu onoyo murwa wa vhuvhili wa Adamu o fa kale. Muvhili wawe wo sina kale, o no tou vha mavu. Musi Bivhili i tshi amba nga ha vhafu, i ri: “A vha na tshine vha tshi ḓivha.” (Muh. 9:5, 10) Zwiṅwe hafhu, a hu na ipfi na ḽithihi zwaḽo ḽo bulwaho nga Abele ḽo ṅwalwaho Bivhilini. Nga zwenezwo, a nga amba hani na riṋe?

³ Muapostola Paulo o hevhedzwa uri a ambe zwi tevhelaho nga ha Abele: “Naho o fa, nga lutendo lwawe u kha ḓi amba.” (Vhalani Vhaheberu 11:4.) Abele u amba hani na riṋe? Nga lutendo. Abele ndi muthu wa u thoma we a vha na yeneyo pfaneleo yavhuḓi vhukuma. O vhea tsumbo yavhuḓi vhukuma ya lutendo ine ra nga i edzisa ṋamusi. Arali ra guda kha lutendo lwawe nahone ra lwela u mu edzisa, zwi ḓo tou nga Abele u khou amba na riṋe nga nḓila yo livhaho vhukuma na i shumaho.

⁴ Ri nga guda mini kha Abele na kha lutendo lwawe ngeno Bivhili yo amba zwithu zwi si gathi nga hae? Kha ri vhone.

5. Maipfi o ambiwaho nga Yesu ane a sumbedza uri Abele o tshila tshifhingani tsha ‘u sikwa ha shango’ a amba mini? (Sedzani ṱhaluso i re magumoni a siaṱari.)

⁵ Abele o bebwa hu sa athu vha na vhathu vhanzhi shangoni. Nga  murahu, Yesu o amba uri Abele o tshila tshifhingani tsha ‘u sikwa ha shango.’ (Vhalani Luka 11:50, 51.) Zwi vhonala uri Yesu o vha a tshi khou amba nga ha shango ḽa vhathu vhane vha nga rengululwa kha tshivhi. Naho Abele o vha e muthu wa vhuṋa shangoni, zwi vhonala uri ndi ene wa u thoma we Mudzimu a vhona a tshi nga rengululea. a Zwi tou vha khagala uri Abele o alutshela vhukati ha vhathu vhe vha vha vha si na ṱhuṱhuwedzo yavhuḓi khae.

6. Abele o vha e na vhabebi vha mufuda-ḓe?

⁶ Naho vhathu vho vha vha sa athu tshila tshifhinga tshilapfu shangoni, vho vha vho no ḓi sedzana na zwiimo zwi ṱungufhadzaho vhukuma. Zwi vhonala uri vhabebi vha Abele, Adamu na Eva, vho vha vhe vhathu vho nakaho vhukuma, vha re na maanḓa. Fhedzi vho vha vho ita vhukhakhi vhuhulwane vhutshiloni havho, nahone vho vha vha tshi zwi ḓivha. U thomani vho vha vhe vhathu vho fhelelaho, vhe na tshilavhelelwa tsha u tshila nga hu sa fheli. Vho shandukela Yehova Mudzimu nahone vha pandelwa hayani havho ha Paradiso tsimuni ya Edeni. Nge vha rangisa madzangalelo avho u fhira zwithu zwoṱhe—u katela na zwishaiwa zwa vhana vhavho—vho mbo ḓi xelelwa nga u fhelela na vhutshilo vhu sa fheli.—Gen. 2:15–3:24.

7, 8. Eva o ri mini musi hu tshi bebwa Kaini, nahone a nga vha o vha a tshi khou humbula mini?

⁷ Vhutshilo ho vha vhu tshi vho konḓela Adamu na Eva nge vha pandelwa tsimuni. Fhedzi musi ṅwana wavho wa tanzhe a tshi bebwa, vho mu ira ḽa Kaini, zwine zwa amba “Tshithu tsho Bveledzwaho,” nahone Eva a ri: “Ndo wana munna nga Yehova.” Maipfi awe a sumbedza uri a nga vha o vha a tshi khou humbula nga ha fulufhedziso ḽe Yehova a ḽi ita  tsimuni, musi a tshi amba hu tshee nga phanḓa uri hu na muṅwe mufumakadzi ane a ḓo bveledza “mbeu” kana ṅwana, ane a ḓo fhelisa muvhi we a pambusa Adamu na Eva. (Gen. 3:15; 4:1) Naa Eva o humbula uri ndi ene musadzi o bulwaho kha honoho vhuporofita na uri Kaini o vha e ene “mbeu” yo fulufhedziswaho?

⁸ O vha a tshi ḓo vha o khakha vhukuma ngavhe a humbule nga u ralo. Zwiṅwe hafhu, arali ene na Adamu vho vhudza Kaini eneo mafhungo musi a tshi khou ḓi aluwa, vhukuma zwenezwo zwi nga vha zwo ita uri a ḓikukumuse. Nga u ya ha tshifhinga, Eva a beba murwa wa vhuvhili, fhedzi ho ngo amba maipfi ane a ita uri onoyo ṅwana a ḓihudze. Vho mu ira ḽa Abele, zwine zwa nga vha zwi tshi amba “Mufemo” kana “Mahandana.” (Gen. 4:2) Naa u irwa hawe ḽeneḽo dzina zwi sumbedza uri vho vha vha tshi dzhia Kaini e wa ndeme u fhira Abele? Khamusi zwo vha zwo ralo, fhedzi a ri na vhuṱanzi.

9. Vhabebi vha nga guda mini ṋamusi kha vhabebi vhashu vha u thoma?

⁹ Vhabebi ṋamusi vha nga guda zwinzhi kha vhenevho vhabebi vha u thoma. Zwine na zwi amba na u zwi ita, zwi nga ita uri vhana vhaṋu vha ḓihudze, vha vhe na vhuhovheleli na tseḓa. Kha ḽiṅwe sia, ni nga funza vhana vhaṋu uri vha fune Yehova Mudzimu na u vhumba vhukonani nae. Zwi ṱungufhadzaho ndi uri vhabebi vha u thoma vho kundwa u hwala vhuḓifhinduleli havho kha enea mafhungo. Fhedzi vhana vhavho vho vha vha tshi kha ḓi vha na fulufhelo.

10, 11. Ndi mushumo ufhio wo itwaho nga Kaini na Abele, fhedzi ndi pfaneleo ifhio ye Abele a i ṱahulela?

¹⁰ Musi vhenevho vhatukana vhavhili vha tshi khou ḓi aluwa, zwi vhonala uri Adamu o vha gudisa u ita mushumo we wa vha u tshi tea u itwa u itela u ṱhogomela muṱa. Kaini o vha mulimi; Abele a vha mulisa.

¹¹ Naho zwo ralo, Abele o ita zwiṅwe zwithu zwa ndeme vhukuma. Musi miṅwaha i tshi khou ḓi ṱanḓulukana, o ṱahulela lutendo—lune lwa vha pfaneleo yavhuḓi ye Paulo a ṅwala ngayo nga murahu. Edzani u humbula nga ha zwenezwo! Ho vha hu si na muthu we Abele a vha a tshi nga edzisa tsumbo yawe. Nga zwenezwo-ha, o ṱahulela hani lutendo kha Yehova Mudzimu? Ṱhogomelani zwithu zwiraru zwine zwa nga vha zwo thusa Abele uri a ṱahulele lutendo lwo khwaṱhaho.

12, 13. U lavhelesa tsiko ya Yehova zwi nga vha zwo khwaṱhisa hani lutendo lwa Abele?

¹² Tsiko ya Yehova. Ndi ngoho uri Yehova o sema mavu, a ita uri a medze mipfa na tsheṋe zwe zwa pwanyeledza zwiliṅwa. Naho zwo ralo, mavu o bveledza zwinzhi zwe zwa ita uri muṱa wa ha Abele u bvele phanḓa u tshi tshila. Zwifuwo zwo vha zwi songo semiwa, u katela na zwiṋoni na khovhe; dzithavha, madzivha, milambo na maḓanzhe; u katela na lutombo, makole, ḓuvha, ṅwedzi na dziṋaledzi. Hoṱhe he Abele a lavhelesa hone, o vhona vhuṱanzi ha uri Yehova Mudzimu ndi musiki wa zwithu zwoṱhe wa lufuno, vhuṱali, na vhulenda. (Vhalani Vharoma 1:20.)  A zwi timatimisi uri u elekanya nga ha zwenezwo zwithu zwo khwaṱhisa lutendo lwawe.

¹³ Vhukuma Abele o ḓiṋea tshifhinga tsha u elekanya nga ha zwithu zwa muya. Mu vhoneni nga maṱo a muhumbulo a tshi khou lisa sambi ḽawe. Mulisa o vha a tshi anzela u tshimbila tshikhala tshilapfu. O vha a tshi lisa zwenezwi zwifuwo zwo vuḓaho mivhunduni, magovhani, a tshi wela milambo—a tshi ṱoḓa pfulo yo nonaho, maḓi avhuḓi na vhukhudo ho teaho. Kha zwivhumbiwa zwoṱhe zwa Mudzimu, zwi vhonala u nga nngu ndi dzone dzi sa koni u ḓitsireledza, zwa tou nga dzo vhumbelwa uri dzi livhiswe na u tsireledzwa nga vhathu. Naa na Abele o zwi ṱhogomela uri o vha a tshi ṱoḓa u livhiswa, u tsireledzwa na u ṱhogomelwa nga Mudzimu o ṱalifhaho na a re na maanḓa u fhira muthu naho e ufhio? A zwi timatimisi uri o amba nga ha zwenezwo zwithu thabeloni yawe nahone zwenezwo zwa khwaṱhisa lutendo lwawe.

14, 15. Mafulufhedziso a Yehova o ita uri Abele a elekanye nga ha mini?

¹⁴ Mafulufhedziso a Yehova. Adamu na Eva vha nga vha vho anetshela vhana vhavho zwe zwa ita uri vha pandelwe tsimuni ya Edeni. Nga zwenezwo, Abele o vha e na zwithu zwinzhi zwine a nga elekanya nga hazwo.

¹⁵ Yehova o amba uri mavu a ḓo semiwa. Abele o vhona mipfa na tsheṋe zwe zwa mela, hu tshi ḓadzea eneo maipfi. Yehova o dovha a vhudza Eva hu tshee nga phanḓa uri o vha a tshi ḓo pfa vhuṱungu musi o vhifha muvhilini na musi a tshi beba. A zwi timatimisi uri Abele o vhona u ḓadzea ha eneo maipfi musi hu tshi bebwa vharathu vhawe. Yehova o zwi vhona hu tshee nga phanḓa uri Eva o vha a tshi ḓo ṱoḓa u funwa na u ṱhogomelwa nga munna wawe Adamu nga nḓila yo kalulaho na uri Adamu o vha a tshi ḓo mu vhusa. Abele o vhona zwenezwo zwithu zwi ṱungufhadzaho zwi tshi itea phanḓa hawe. Abele o vhona uri zwo ambiwaho nga Yehova zwi nga fulufhelwa tshoṱhe. Nga zwenezwo, Abele o vha e na zwiitisi zwi pfalaho zwa u vha na lutendo kha fulufhedziso ḽa Mudzimu nga ha “mbeu” kana ṅwana, we ḽiṅwe ḓuvha a vha a tshi ḓo dzudzanya vhukhakhi hoṱhe he ha thoma tsimuni ya Edeni.—Gen. 3:15-19.

16, 17. Abele a nga vha o guda mini kha vhakerube vha Yehova?

¹⁶ Vhashumeli vha Yehova. Naho ho vha hu si na vhathu vhane vha  nga vhetshela Abele tsumbo yavhuḓi, vhathu vho vha vhe si vhone fhedzi zwivhumbiwa zwi re na vhuṱali kha ḽifhasi nga tshenetsho tshifhinga. Musi Adamu na Eva vha tshi pandelwa tsimuni, Yehova o ita vhungoho ha uri vhone na vhana vhavho vha si dzhene kha yeneyo Paradiso kha ḽifhasi. U itela u linda khoro dzayo, Yehova o vhea vhakerube—vharuṅwa vha vhuimo ha nṱha vhukuma—khathihi na banga ḽi dugaho mulilo ḽe ḽa vha ḽi tshi dzulela u mona.—Vhalani Genesi 3:24.

¹⁷ Edzani u humbula nḓila ye Abele a ḓipfa ngayo a tshee mutukana musi a tshi vhona vhenevho vhakerube. Samusi vho vha vhe na mivhili ya ṋama, vho vhonala vhe na maanḓa vhukuma. Ḽeneḽo “banga” ḽe ḽa vha ḽi tshi dzula ḽi tshi duga mulilo, ḽi tshi mona tshifhinga tshoṱhe, ḽi tea u vha ḽo mu mangadza vhukuma. Musi Abele a tshi khou ḓi aluwa, naa o vhuya a ṱhogomela uri vhenevho vhakerube vho netiswa nga mushumo wavho nahone vha u ṱutshela? Hai. Zwenezwo zwivhumbiwa zwo ṱalifhaho, zwi re na maanḓa zwo ima henefho vhusiku na masiari, ṅwaha muṅwe na muṅwe, mahumi a miṅwaha a tshi khou ḓi ṱanḓulukana, zwi tshi khou ita mushumo wazwo. Nga zwenezwo, Abele o guda uri Yehova Mudzimu u na vhashumeli vho lugaho, vha fulufhedzeaho. Abele o vhona uri vhenevho vhakerube vha a fulufhedzea na u thetshelesa Yehova nahone a vha fani na miraḓo ya muṱani wa hawe. A zwi timatimisi uri yeneyo tsumbo ya vharuṅwa yo khwaṱhisa lutendo lwawe.

18. Ri na mutheo ufhio wo khwaṱhaho wa u fhaṱa lutendo lwashu ṋamusi?

¹⁸ Lutendo lwa Abele lwo khwaṱha vhukuma musi a tshi elekanya nga ha zwoṱhe zwe Yehova a zwi dzumbulula nga ha ene muṋe nga tsiko, mafulufhedziso awe na tsumbo dza vhashumeli vhawe vha vharuṅwa. Zwi tou vha khagala uri ri nga guda zwinzhi kha tsumbo yawe.  Zwihuluhulu vhaswa vha nga ṱuṱuwedzea musi vha tshi ṱhogomela uri vha nga vha na lutendo lwa vhukuma kha Yehova Mudzimu, naho hu si na tsumbo dzavhuḓi muṱani wa havho. Ṋamusi ri na mutheo wo khwaṱhaho wa u fhaṱa lutendo lwashu samusi ro tangwa nga tsiko i mangadzaho nahone ri na Bivhili yo fhelelaho, kathihi na tsumbo nnzhi dza vhathu vha re na lutendo.

19. Ndi ifhio ngoho ya ndeme ye Abele a i pfesesa nga u ya tshifhinga?

¹⁹ Musi lutendo lwa Abele lu tshi khou ḓi khwaṱha, o ṱoḓa nḓila ya u lu sumbedza nga mishumo. Fhedzi ndi mini zwe muthu zwawe a vha a tshi nga zwi ṋea Musiki wa fhethu hoṱhe? Zwi tou vha khagala uri Mudzimu ha ṱoḓi tshifhiwa kana thuso naho i ifhio i bvaho kha vhathu. Nga u ya ha tshifhinga, Abele o pfesesa ngoho i tevhelaho ya ndeme: Yehova, Khotsi awe wa lufuno o vha a tshi ḓo takala, arali a mu ṋekedza zwi re maanḓani awe, e na zwiṱuṱuwedzi zwavhuḓi.

20, 21. Kaini na Abele vho ṋekedza Yehova mini, nahone o aravha hani?

²⁰ Abele a lugiselela u ṋekedza dziṅwe dza nngu dza sambi ḽawe. O khetha nngu dzavhuḓi vhukuma, dza matanzhe nahone kha tshiṱhavhelo tshawe a katela na zwipiḓa zwe a zwi dzhia zwi zwavhuḓi vhukuma. Na Kaini o ṱoḓa u fhaṱutshedzwa na u tondwa nga Mudzimu, a dzudzanya u ṋekedza zwiṅwe zwa zwiliṅwa zwawe. Fhedzi zwiṱuṱuwedzi zwawe zwo vha zwi sa fani na zwa Abele. Phambano vhukati havho yo vhonala musi vha tshi ṋekedza zwiṱhavhelo zwavho.

²¹ Vhenevha vharwa vha Adamu vha nga kha ḓi vha vho shumisa aletare na mulilo musi vha tshi ṋekedza zwiṱhavhelo zwavho, khamusi vha tshi vhonwa nga vhakerube, samusi vho vha vhe vhone vhaimeli vha Yehova kha ḽifhasi nga tshenetsho tshifhinga. Yehova o aravha! Ri a vhala: “Yehova a takalela Abele na tshidzimu tshawe.” (Gen. 4:4) Bivhili a i buli uri Yehova o sumbedza hani uri u takalela tshenetsho tshiṱhavhelo.

22, 23. Ndi ngani Yehova o takalela tshiṱhavhelo tsha Abele?

²² Ndi ngani Mudzimu o ṱanganedza tshiṱhavhelo tsha Abele? Naa o vha o takadzwa nga tshiṱhavhelo tshe a tshi ṋekedza? Abele o ṋekedza tshifuwo tshi tshilaho, a shulula malofha atsho a ndeme. Naa Abele o vha a tshi zwi ḓivha uri tshiṱhavhelo tsho raloho ndi tsha ndeme lungafhani? Maḓanani manzhi a miṅwaha musi Abele o no fa, Mudzimu o shumisa tshiṱhavhelo tsha ngwana i sa solei u fanyisela tshiṱhavhelo tsha Murwa wawe o fhelelaho, “Ngwana ya Mudzimu,” ye malofha ayo a si na mulandu a shululwa. (Yoh. 1:29; Ek. 12:5-7) Naho zwo ralo, zwi tou vha khagala uri hu na zwithu zwinzhi zwe Abele a vha a sa zwi ḓivhi kana u zwi pfesesa.

²³ Zwine ra zwi ḓivha zwa vhukuma ndi uri Abele o ṋekedza zwithu zwavhuḓi vhukuma zwe a vha e nazwo. Yehova o takalela tshiṱhavhelo kathihi na muthu we a tshi ṋekedza. Yehova o takala nga ṅwambo wa uri Abele o ṋekedza tshiṱhavhelo o ṱuṱuwedzwa nga u funa hawe Yehova na u tenda khae.

24. (a) Ndi ngani ri tshi amba uri tshiṱhavhelo tsha Kaini tsho vha tshi songo khakhea? (b) Kaini u fana hani na vhathu vhanzhi ṋamusi?

 ²⁴ A zwo ngo ralo kha Kaini. Yehova ho ngo takalela “Kaini na tshidzimu tshawe.” (Gen. 4:5) A si uri tshiṱhavhelo tsha Kaini tsho vha tsho khakhea; nga murahu Mulayo wa Mudzimu wo vha u tshi tendela musumo wa zwiliṅwa. (Lev. 6:7, 8) Fhedzi musi Bivhili i tshi amba nga ha Kaini i ri “mishumo yawe yo vha i mivhi.” (Vhalani 1 Yohane 3:12.) U fana na vhathu vhanzhi ṋamusi, zwi vhonala uri Kaini o humbula uri zwo vha zwo eḓana u ḓikumedza kha Mudzimu u itela uri u vhonwe nga vhaṅwe. Zwe a zwi ita zwo sumbedza nga u ṱavhanya uri o vha a si na lutendo lwa vhukuma nahone o vha a sa funi Yehova.

25, 26. Yehova o ṋea Kaini tsevho ifhio, fhedzi ndi mini zwe Kaini a zwi ita?

²⁵ Musi Kaini a tshi ṱhogomela uri ho ngo tondiwa nga Yehova, naa o ṱoḓa u guda kha tsumbo ya Abele? Hai. O mbo ḓi fhihamelwa nga vengo, a vho thoma u vhenga murathu wawe. Yehova o vhona zwi re mbiluni ya Kaini nahone a ambedzana nae a sa mu fheleli mbilu. O sevha Kaini uri buḓo ḽe a ḽi fara ḽi ḓo mu livhisa kha tshivhi tshihulwane, nahone a mu vhudza uri ‘khofheni hawe hu ḓo tsha’ arali fhedzi a shandula nḓila dzawe.—Gen. 4:6, 7.

²⁶ Kaini ho ngo thetshelesa tsevho ya Mudzimu. O humbela murathu wawe we a vha a tshi mu fulufhela uri a ṱuwe nae tsimuni. Musi vhe henengei Kaini a vutshela Abele nahone a mu vhulaha. (Gen. 4:8) Nga maṅwe maipfi ri nga amba uri Abele o vha muthu wa u thoma we a tovholelwa vhurereli, a vhulahelwa lutendo lwawe. Naho o vha o fa, mafhungo awe ho ngo fhelela henefho.

27. (a) Ndi ngani ri tshi nga vha na vhungoho ha uri Abele u ḓo vuswa? (b) Ri nga vha hani na vhungoho ha uri ḽiṅwe ḓuvha ri ḓo vhona Abele?

²⁷ Nga lwa pfanyisedzo, malofha a Abele o ṱavhela mukosi Yehova Mudzimu uri a lifhedze kana a ite khaṱulokwayo. Mudzimu o ita vhungoho ha uri hu itwe khaṱulokwayo, a ṱarafa Kaini muvhi nga nṱhani ha vhuvemu hawe. (Gen. 4:9-12) Zwa ndeme vhukuma ndi uri mafhungo a lutendo lwa Abele a na zwine a ri gudisa zwone ṋamusi. Miṅwaha ye a i tshila—khamusi ya ḓana—yo vha miṱuku musi i tshi vhambedzwa na ya vhathu vha misini yeneyo, fhedzi Abele o tshila nga nḓila i takadzaho Mudzimu. O fa a tshi zwi ḓivha uri Yehova, Khotsi awe wa ṱaḓulu u a mu funa na u mu takalela. (Vhaheb. 11:4) Nga zwenezwo, ri nga vha na vhungoho ha uri Yehova a nga si vhuye a mu hangwa nahone u ḓo mu vusa a tshila kha ḽifhasi ḽa paradiso. (Yoh. 5:28, 29) Naa ni nga takalela u mu vhona? Zwi nga konadzea arali na ḓiimisela u thetshelesa musi Abele a tshi amba na u edzisa lutendo lwawe lu swayeaho.