Vhahashu Vha Funwaho:

U thoma nga khandiso yawo ya u thoma ya ḽa 1 January, 2008, magazini wa tsimuni wa Tshiingamo wo vha na mutevhe wa thero ntswa dzi takadzaho dzi re na tshiṱoho tshine tsha ri “Edzisani Lutendo Lwavho.” U bva tsheetsho, ho mbo ḓi gandiswa thero dzo vhalaho dzi re na zwenezwo zwiṱoho. Zwenezwo zwo ri takadza vhukuma!

Vhathu vho ḓipfa hani nga dzenedzo thero? Musi muṅwe muvhali o no fhedza u vhala thero ine ya amba nga ha Marita, o ṅwala a ri: “Ndo sea musi ndi tshi vhala yeneyo thero nga ṅwambo wa uri ndi fana nae—tshifhinga tshoṱhe ndo vha ndi tshi ṱoḓa uri vhaeni vhanga vha ḓipfe vho ṱanganedzea nahone zwenezwo zwo vha zwi tshi ita uri ndi dzule ndo farakanea vhukuma, fhedzi nga zwiṅwe zwifhinga ndo vha ndi tshi hangwa uri ndi tea u dzula fhasi u itela u ḓiphina nga vhukonani na vhaeni vhanga.” Muṅwe muswa a re miṅwahani ya vhufumi o amba mafhungo a takadzaho nga murahu ha u vhala nganea ya Esitere, o ri: “Ndo zwi ṱhogomela uri zwi a leluwa uri ri dzule ri tshi humbula nga zwiambaro na fesheni dza tshizwino-zwino. Ri tea u ambara nga nḓila yavhuḓi; fhedzi a ro ngo tea u kaludza zwithu.” O engedza a ri: “Yehova u na dzangalelo kha zwine ra vha zwone mbiluni.” Thero ine ya amba nga ha muapostola Petro yo ita uri muṅwe wahashu wa tshisadzini wa Mukriste a ambe nga u fhisea, a ri: “Ndo futelela tshoṱhe kha eneo mafhungo musi ndi tshi khou a vhala. Zwo tou nga ndi henefho! Ndo vhona nga maṱo a muhumbulo na u pfa zwithu zwe eneo mafhungo a vha a tshi khou amba nga hazwo.”

Vhenevha vhavhali—na vhaṅwe vhanzhi vhe vha ṅwala u itela u livhuha dzenedzo thero—vho khwaṱhisa zwe muapostola Paulo a zwi ṅwala kale, musi a tshi ri: “Zwithu zwoṱhe zwo ṅwalwaho kale zwo ṅwalelwa u ri funza.” (Vharoma 15:4) Vhukuma, Yehova o ita uri eneo mafhungo a ṅwalwe Bivhilini u itela u ri funza ngudo dza ndeme. Roṱhe ri nga vhuyelwa nga eneo mafhungo, hu sa londwi miṅwaha ye ra i fhedza ri ngohoni.

Ri ni ṱuṱuwedza nga lufuno uri ni vhale yeneyi bugu musi ni tshi tou i wana. I vhaleni musi ni tshi ita Vhurabeli ha vhoiwe ha Muṱa—vhana vha ḓo i takalela vhukuma! Musi tshivhidzo tshi tshi i guda Pfunzoni ya Bivhili ya Tshivhidzo, ni songo pfukwa nga pfunzo na nthihi zwayo! I vhaleni nga vhuronwane; ni songo sokou pfukisa maṱo nga nṱha. Elekanyani nga zwine na khou zwi vhala; ni ḓivhone ni henefho. Lingedzani u pfa zwe vhenevho vhabvumbedzwa vha Bivhili vha zwi pfa, vhonani zwe vha zwi vhona. Vhambedzani nḓila ye vha aravha ngayo musi zwithu zwi tshi itea khavho na nḓila ye khamusi na vha ni tshi ḓo vha no aravha ngayo.

Ri takalela vhukuma u vhala yeneyi bugu na inwi. U nga ri i nga ni vhuyedza khathihi na muṱa waṋu. Ri a ni funa nahone ri ni tamela zwivhuya,

Tshigwada tshi Langaho tsha Ṱhanzi dza Yehova