Ndi Muvhuso u re ṱaḓulu. U ḓo dzhiela vhudzulo miṅwe mivhuso yoṱhe, wa ita uri hu itwe zwi funwaho nga Mudzimu ṱaḓulu na kha ḽifhasi. Zwi a takadza uri Mudzimu u ḓo shumisa Muvhuso wawe nga yeneyi nḓila. Hu si kale Muvhuso wa Mudzimu u ḓo ita uri vhathu vha wane zwoṱhe zwine vha ṱoḓa muvhuso wavhuḓi u tshi vha itela zwone. U ḓo ita uri vhathu vhoṱhe vha tshilisane nga vhuthihi kha ḽifhasi.​—Vhalani Daniele 2:44; Mateo 6:9, 10; 24:14.

Muvhuso u fanela u vha na khosi. Yehova o vhea Murwa wawe Yesu Kristo uri a vhe Khosi ya Muvhuso Wawe.​—Vhalani Nzumbululo 11:15.

Ṱalelani vidio ine ya ri, Muvhuso Wa Mudzimu Ndi Mini?

Murwa wa Mudzimu u a fanelea u vha Khosi ngauri u na vhuthu nahone u imelela zwo lugaho o khwaṱha. (Mateo 11:28-30) U dovha a vha na maanḓa a u thusa vhathu ngauri u ḓo vhusa ḽifhasi e ṱaḓulu. Musi o no vuswa vhafuni, o gonya ṱaḓulu, a swika a dzula a lindela e thungo ya tshanḓa tsha u ḽa tsha Yehova. (Vhahevheru 10:12, 13) Mudzimu o fheleledza o ṋea Yesu maanḓa uri a thome u vhusa.​—Vhalani Daniele 7:13, 14.

Tshigwada tshine tsha vhidzwa “vhakhethwa” tshi ḓo vhusa na Yesu ṱaḓulu. (Daniele 7:27) Vhakhethwa vha u thoma vhe vha nangiwa vho vha vhe vhaapostola vha fhulufhedzeaho  vha Yesu. Yehova o bvela phanḓa a tshi khetha vhanna na vhafumakadzi vha fhulufhedzeaho u swika na zwino. Vha vuswa vhe na mivhili ya muya u fana na Yesu.​—Vhalani Yohane 14:1-3; 1 Vhakorinta 15:42-44.

Ndi vhangana vhathu vhane vha ya ṱaḓulu? Yesu o vha vhidza “sambi ḽiṱuku.” (Luka 12:32) Vha ḓo fheleledza vho swika 144 000. Vha ḓo vhusa ḽifhasi na Yesu.​—Vhalani Nzumbululo 14:1.

Muvhuso wa Mudzimu wo thoma u vhusa nga 1914. * Tshithu tsha u thoma tshe Yesu a tshi ita musi a tshi vha Khosi ndi u posela Saṱhane na madimoni awe kha ḽifhasi. Saṱhane o sinyuwa, a thoma u vusa khakhathi kha ḽifhasi. (Nzumbululo 12:7-10, 12) U bva nga tshenetsho tshifhinga, khombo dze dza wela vhathu dzo ṋaṋa vhukuma. Dzinndwa, nḓala, malwadze na midzinginyo, zwoṱhe ndi tshipiḓa tsha “tshiga” tsha uri hu si kale Muvhuso wa Mudzimu u ḓo langa zwithu zwoṱhe kha ḽifhasi.​—Vhalani Luka 21:7, 10, 11, 31.

Muvhuso wa Mudzimu u khou ita uri hu huwelelwe shangoni ḽoṱhe u itela u kuvhanganya vhathu vhanzhi vha bvaho kha tshaka dzoṱhe. Vhathu vha dzimilioni vha ḓiṱukufhadzaho vha khou vhuswa nga Yesu. Muvhuso wa Mudzimu u ḓo vha tsireledza musi u tshi fhelisa zwithu zwivhi zwine zwa khou itea kha ḽifhasi. Vhoṱhe vhane vha ṱoḓa u vhuyelwa nga Muvhuso wa Mudzimu vha tea u guda u thetshelesa Yesu.​—Vhalani Nzumbululo 7:9, 14, 16, 17.

Kha yeneyo miṅwaha ya 1 000, wonoyo Muvhuso u ḓo ita uri vhathu vha tshile nga nḓila ye Mudzimu a vha a tshi ṱoḓa vha tshi tshila ngayo u bva mathomoni. Ḽifhasi ḽoṱhe ḽi ḓo vha pharadiso. Yesu u ḓo fheleledza o humisela Muvhuso kha Khotsi awe. (1 Vhakorinta 15:24-26) Naa hu na muthu ane na ṱoḓa u mu vhudza nga ha Muvhuso wa Mudzimu?​—Vhalani Phisalema 37:10, 11, 29.