SAMUSI Yehova o dzula o amba, Isiraele wo fhandekana nga murahu ha musi Salomo o ṱutshela vhurabeli ha ngoho. Murwa wawe Rehabeamu o vha ho khosi nga murahu hawe o vha e na tshiṱuhu. Nga zwenezwo, tshaka dza fumi dza Isiraele dzo mbo ḓi vusa mufhiri-fhiri nahone dza thoma muṅwe muvhuso wa devhula wa Isiraele. Tshaka mbili dzo dzula dzi tshi fulufhedzea kha muvhuso wa vhuhosi ha Davida wa Yerusalema, dza mbo ḓi vha muvhuso wa tshipembe wa Yuda.

Mivhuso yoṱhe yo vha i songo khwaṱha nahone i na vhuleme vhunzhi, nga ṅwambo wa uri yo vha i na khosi dzi si na lutendo na dzi sa thetshelesi. Muvhuso wa devhula wa Isiraele wo vha u na vhuleme vhunzhi u fhira Yuda, ngauri khosi dzawo dzo vha dzi tshi ṱuṱuwedza vhurabeli ha mazwifhi u bva mathomoni. Hu sa londwi mishumo i mangadzaho ya vhaporofita vha ngaho Elia na Elisa​—⁠vhe vha vusa na vhafu​—⁠Vhaisiraele vho mbo ḓi humela kha mishumo mivhi ya kale. Mafheleloni, Mudzimu o tendela muvhuso wa devhula u tshi fheliswa nga Vhaasuri.

Muvhuso wa Yuda wo fhedza tshifhinga tshilapfu u fhira wa Isiraele, fhedzi na wone wo ṱarafiwa nga Mudzimu. Ndi khosi dzi si gathi dza Yudea dze dza thetshelesa tsevho dze dza ṋewa nga vhaporofita vha Mudzimu nahone dza lingedza u ita uri lushaka lu vhuyelele kha Yehova. Sa tsumbo, khosi Yosia o mbo ḓi thoma u kunakisa Yuda kha vhurabeli ha mazwifhi nahone a vusulusa thembele ya Yehova. Musi bugu ya Mulayo wa Mudzimu wo ṋewaho hu tshi shumiswa Mushe i tshi wanala, Yosia o vha o kwamea nga maanḓa nahone a ita uri hu vhe na fulo ḽa u kunakisa.

Zwi pfisaho vhuṱungu ndi uri vhe vha vhusa nga murahu ha Yosia a vho ngo tevhela tsumbo yavhuḓi ya yeneyo khosi. Nga zwenezwo, Yehova o tendela lushaka lwa Babele lu tshi kunda Yuda, lwa fhelisa Yerusalema na thembele yayo. Vhe vha ponyoka vho iswa vhuthubwani ngei Babele. Mudzimu o vha o dzula o amba uri vha ḓo dzula vhuthubwani miṅwaha ya 70. Yuda u ḓo dzula u shubi​—⁠u swikela lwonolwo lushaka lu tshi vhuyelela Yerusalema samusi zwo fulufhedziswa.

Naho zwo ralo, ho vha hu si tsha ḓo vha na khosi dzine dza ḓo vhusa kha mutevhe wa Davida u swikela hu tshi vhusa Muvhofhololi o fulufhedziswaho, Messia we ha dzulwa ho ambiwa nga hae. Vhunzhi ha mahosi e a vhusa kha khuluṋoni ya Davida ngei Yerusalema vho sumbedza uri vhathu vha songo fhelelaho vha nga si kone u vhusa. Ndi Messia fhedzi we a vha a tshi nga fanelea. Nga zwenezwo, Yehova o vhudza khosi ya u fhedzisela ya vhuhosini ha Davida uri: “Bvula dzánga ḽa vhuhosi. . . . Hu ḓo vhuya ha ḓa we ḽa mu fanela, nda ḽi ṋea onoyo.”​—⁠Hesekiele 21:​31, 32.

—Enea mafhungo a wanala kha Dzikhosi 1; Dzikhosi 2; 2 Koronika dzindima 10 u swika kha 36; Yeremia 25:8-11.