MAḒANANI a miṅwaha musi Vhaisiraele vha sa athu dzhena Kanana, Yehova o vha o fulufhedzisa vhaḓuhulu vha Abrahamu ḽeneḽo shango. Zwino nga fhasi ha vhurangaphanḓa ha Yoshua, Vhaisiraele vho vha vho lugela u dzhena Shangoni ḽo Fulufhedziswaho.

Mudzimu o haṱulela uri Vhakanana vha fheliswe. Shango ḽavho ḽo vha ḽo ḓala nga zwiito zwa u ḓifara luvhi nga zwa vhudzekani na u shulula malofha nga nḓila ya tshiṱuhu. Nga zwenezwo, miḓi ya Vhakanana yo thubwaho nga Vhaisiraele yo vha i tshi ḓo fheliswa tshoṱhe.

Naho zwo ralo, musi vha sa athu dzhena kha ḽeneḽo shango, Yoshua o ruma ṱholi mbili, dze dza swika dza dzula muḓini wa Yeriko na mufumakadzi ane a pfi Rahaba. Onoyu mufumakadzi o ṱanganedza dzenedzo ṱholi muḓini wawe nahone a dzi tsireledza naho o vha a tshi ḓivha uri ndi Vhaisiraele. Rahaba o vha e na lutendo kha Mudzimu wa Vhaisiraele, ngauri o vha o no pfa nga ha mishumo ya Yehova ya u tshidza vhathu vhawe. O anisa ṱholi mbili uri ene na vha muṱa wawe vha songo vhulahwa.

Nga murahu musi Vhaisiraele vha tshi dzhena Kanana na u lwa na muḓi wa Yeriko, Yehova o wisa mbondo dza Yeriko nga lwa vhuṱolo. Yoshua o dzhena nga u ṱavhanya a fhelisa wonoyo muḓi, fhedzi a vho ngo fhelisa Rahaba na muṱa wawe. Nga zwenezwo, kha ḽeneḽo fulo ḽa nndwa ye ya fhedza miṅwaha ya rathi, Yoshua o vha o no thuba tshipiḓa tshihulwane tsha Shango ḽo Fulufhedziswaho. Nga murahu ha zwenezwo, ḽeneḽo shango ḽo mbo ḓi kovhekanywa u ya nga tshakha dza Isiraele.

Musi e tsini na u fa, Yoshua o kuvhanganya vhathu. O vha humbudza nga ha nḓila ye Yehova a shumisana ngayo na vhomakhulukuku wavho nahone a vha ṱuṱuwedza uri vha shumele Yehova. Naho zwo ralo, nga murahu ha musi Yoshua na vhanna vhe a vha a tshi shumisana navho vho no fa, Vhaisiraele vho mbo ḓi ṱutshela Yehova nahone vha shumela midzimu i sili. Lwa miṅwaha ya 300, lwonolwo lushaka a lwo ngo dzula lu tshi thetshelesa milayo ya Yehova. Nga tshenetsho tshifhinga, Yehova o tendela maswina a Vhaisiraele, a ngaho sa Vhafilisita uri a vha tsikeledze. Fhedzi musi Vhaisiraele vha tshi humbela Yehova uri a vha thuse, o vha vhetshela vhahaṱuli—vha 12—u itela u vha thusa.

Tshifhinga tsha vhahaṱuli tsho ṱaluswaho kha bugu ya Vhahaṱuli tsho thoma nga Othiniele tsha guma nga Simisoni, munna wa maanḓa we a vhuya a tshila. Mafhungo-ngoho a mutheo e ha ambiwa nga hao lunzhi-lunzhi a takadzaho o ṅwalwaho Bivhilini kha bugu ya Vhahaṱuli ndi haya: U thetshelesa Yehova zwi ita uri ni fhaṱutshedzwe, u sa thetshelesa zwi ḓisa maṱungu.

—Enea mafhungo a wanala kha bugu ya Yoshua; Vhahaṱuli; Levitiko 18:24, 25.