Ngei Siria, ho vha hu na musidzana muṱuku wa Muisiraele we a vha e kule na hayani ha hawe. O vha o dzhiiwa muṱani wa hawe nga mmbi ya Vhasiria nahone zwino o vha e mushumeli wa mufumakadzi wa mulangammbi ane a pfi Naemani. Onoyu musidzana muṱuku o vha a tshi rabela Yehova, naho o vha o tangiwa nga vhathu vha sa mu rabeli.

Naemani o vha e na vhulwadze vhu shavhisaho ha lukanda, nahone o vha a tshi dzulela u pfa vhuṱungu. Musidzana muṱuku o vha a tshi ṱoḓa u mu thusa. O vhudza mufumakadzi wa Naemani a ri: ‘Ndi a ḓivha muthu ane a nga ita uri munna wavho a vhe khwine. Ngei Isiraele, hu na muporofita wa Yehova ane a pfi Elisa. A nga fhodza munna wavho.’

Mufumakadzi wa Naemani a vhudza Naemani zwe musidzana a amba zwone. O vha o ḓiimisela u lingedza tshiṅwe na tshiṅwe, nga zwenezwo a ya nḓuni ya Elisa ngei Isiraele. Naemani o vha o lavhelela uri Elisa u ḓo mu ṱanganedza sa muthu wa vhuimo ha nṱha. Fhedzi nṱhani ha u amba nae ene muṋe, Elisa o rumela mushumeli wawe u yo lumelisa Naemani na u mu fha hoyu mulaedza: ‘Tshimbilani ni yo  ṱamba lwa sumbe Mulamboni wa Yorodane. Nga murahu ni ḓo fhola.’

Zwenezwi zwo sinyusa Naemani. O ri: ‘Ndo vha ndi tshi khou humbula uri hoyu muporofita u ḓo mphodza nga u vhidzelela Mudzimu wawe nahone a dzungudza tshanḓa tshawe kha nṋe. Nṱhani hazwo, u mmbudza uri ndi ye mulamboni wa Isiraele. Ri na milambo yavhuḓi Siria. Ndi ngani ndi sa yi kha yeneyo? Naemani a sinyuwa vhukuma, nahone a ṱuwa nḓuni ya Elisa.

Vhashumeli vha Naemani vha mu thusa u humbula zwavhuḓi. Vha ri khae: ‘Naa ni nga si ite naho tshi tshini u itela u fhola? Zwe hoyu muporofita a ri ni zwi ite a zwi konḓi. Ndi ngani ni sa sokou zwi ita?’ Naemani a vha thetshelesa. A ya Mulamboni wa Yorodane nahone a dzhena maḓini lwa sumbe. Nga lwa vhusumbe, Naemani o bva maḓini o fhola tshoṱhe. O vha o takala vhukuma, nahone a huma a yo livhuha Elisa. Naemani a ri: ‘Zwino ndi a zwi ḓivha uri Yehova ndi Mudzimu wa ngoho.’ Ni humbula uri musidzana wa Muisiraele o ḓi pfa hani musi Naemani a tshi vhuya o fhola?