Ndanguloni yashu a ri na mufunzi ane a badelwa. Nṱhani hazwo, u fana na zwe zwa vha zwi tshi itwa musi tshivhidzo tsha Vhukriste tshi tshi thoma, vhalavhelesi vha faneleaho vha a vhewa uri vha “lise tshivhidzo tsha Mudzimu.” (Mishumo 20:28) Vhenevha vhahulwane ndi vhanna vho vhibvaho muyani, vhane vha ranga phanḓa tshivhidzo na u tshi lisa ‘hú si nga u tou kombetshedzwa, fhedzi nga u zwi funa, hú si nga u ṱoḓa bindu ngazwo’; fhedzi nga u ḓifhelwa ngazwo.’ (1 Petro 5:1-3) Ndi mushumo ufhio une vha ri itela wone?

Vha a ri ṱhogomela na u ri tsireledza. Vhahulwane vha livhisa tshivhidzo na u thusa u tshi tsireledza nga lwa muya. Samusi vhahulwane vha tshi zwi ḓivha uri Mudzimu o vha ṋea wonoyu mushumo wa ndeme, a vha vhusi vhathu vhawe, nṱhani hazwo, vha ri thusa uri ri takale. (2 Vha-Korinta 1:24) Samusi mulisa a tshi ṱhogomela nga vhuronwane nngu iṅwe na iṅwe yawe, vhahulwane vha lingedza u ḓivha muraḓo muṅwe na muṅwe wa tshivhidzo.—Mirero 27:23.

Vha ri funza u ita zwi funwaho nga Mudzimu. Vhege iṅwe na iṅwe, vhahulwane vha ranga phanḓa miṱangano ya tshivhidzo u itela u khwaṱhisa lutendo lwashu. (Mishumo 15:32) Vhenevha vhanna vha ḓikumedzaho vha dovha vha ranga phanḓa mushumo wa u huwelela, u shuma na riṋe na u ri gudisa kha masia oṱhe a vhuḓinḓa.

Vha a ri ṱuṱuwedza nga muthihi nga muthihi. U itela u ṱhogomela zwishaiwa zwashu zwa muya, vhahulwane vha tshivhidzo vha nga ri dalela mahayani kana u amba na riṋe Holoni ya Muvhuso u itela u ri thusa na u ri khuthadza nga Maṅwalo.—Yakobo 5:14, 15.

Nga nnḓa ha mishumo yavho ya tshivhidzo, vhahulwane vhanzhi vha dovha vha vha na mishumo ya u ḓitshidza na vhuḓifhinduleli ha muṱa vhune ha ṱoḓa tshifhinga tshavho na ṱhogomelo. Ri fanela u ṱhonifha vhenevha vhahashu vha shumaho vhukuma.—1 Vha-Thesalonika 5:12, 13.

• Ndi ufhio mushumo wa vhahulwane vha tshivhidzo?

• Vhahulwane vha sumbedza hani uri vha na dzangalelo kha riṋe nga muthihi nga muthihi?