Kha vha ri vhudze nga ha vhutshilo havho.

Ndo bebelwa ngei United States nga 1979. Musi ndi na miṅwaha miraru, vhabebi vhanga vho mbo ḓi ṱalana. Mme anga vho nnyalusa nga nḓila ya Tshiyuda nahone ndo ya tshikoloni tsha Vhayuda. Musi ndi na miṅwaha ya sumbe, ro mbo ḓi pfulutshela Isiraele nahone nda dzhene tshikolo henefho tshine tsha pfi kibbutz. Nga murahu ha ṅwaha, nṋe na mme anga ro pfulutshela Mexico.

Naho ho vha hu si na sinagogo henefho, ndo bvela phanḓa na u ita zwa vhurereli ha Tshiyuda. Nga Savhatha, ndo vha ndi tshi funga makhanḓela, u vhala Torah na u rabela ndi tshi shumisa bugu ya thabelo ine ya pfi siddur. Tshikoloni, ndo vha ndi tshi vhudza vhane nda dzhena navho kiḽasini uri vhurereli hanga ndi hone ha vhukuma. Ndo vha ndi sa athu vhuya nda vhala Thestamennde Ntswa, ine ya livhisa ṱhogomelo kha vhuḓinḓa ha Yesu Kristo na zwe a zwi funza. Zwavhuḓi vhuḓi, ndi mme anga vhe vha mbudza uri ndi songo i vhala nga u shavha uri i ḓo ntshinya.

Ndi mini zwo itaho uri vha fhedze vho vhala Thestamennde Ntswa?

Musi ndi tshi khou ya u fara 17, ndo mbo ḓi humela United States uri ndi fhedzise tshikolo henengei. Muṅwe we nda vha ndo ḓowelana nae o vha e Mukriste, o mbudza uri vhutshilo hanga a ho ngo fhelela arali ndi sa ḓivhi Yesu.

Ndo mu fhindula nda ri: “Vhathu vhane vha tenda kha Yesu vho xela.”

A mbudzisa a ri: “Naa no no vhuya na vhala Thestamennde Ntswa?”

Nda ri “Hai.”

A ri: “Arali zwo ralo, ni nga hanedzana hani na zwithu zwine ni sa ḓivhe tshithu nga hazwo?”

Maipfi awe o nṱhavha mbilu, ngauri na nṋe ndo vha ndi tshi zwi dzhia zwi vhutsilu u sokou amba nga ha zwithu zwine u sa zwi ḓivhe. Ndo niwa nga ṱhoni, ndo mbo ḓi dzhia Bivhili yawe nda ṱuwa nayo hayani nda thoma u vhala kha Thestamennde Ntswa.

Zwe vha zwi vhala zwo vha kwama hani?

Ndo wanulusa uri vhaṅwali vha Thestamennde Ntswa vho vha vhe Vhayuda, zwo mmangadza vhukuma. Musi ndi tshi khou bvela phanḓa na u i vhala, ndo ṱhogomela uri Yesu o vha e Muyuda we a vha a tshi ḓiṱukufhadza, wa vhuthu, we a vha a tshi khou ṱoḓa u thusa vhathu hu si u vha shumisa. Ndo ya na ḽaiburari nda ṱoḓa bugu dzine dza amba nga hae. Naho zwo ralo, a hu na tsho itaho uri ndi tende uri Yesu ndi Messia. Dziṅwe bugu dzo amba na uri Yesu ndi Mudzimu, zwenezwi zwo vha zwi sa pfali kha nṋe. Arali e Mudzimu, naa o vha a tshi khou rabela ene muṋe? Zwiṅwe hafhu, Bivhili i amba uri Mudzimu ha fi, a fhedzi Yesu o fa.

Vho wana hani phindulo dza mbudziso dzavho?

Ngoho ndi ngoho a i ḓihanedzi, zwino ndo vha ndo ḓiimisela u wana ngoho. Lwa u tou thoma vhutshiloni hanga, ndo rabela zwi tshi bva mbiluni ndi tshi khou tsengisa na miṱodzi ndi sa khou shumisa na bugu ya thabelo. Ndi tshi tou fhedza u rabela, ndo mbo ḓipfa muṋangoni hu tshi khou khokhonyiwa. Ndi tshi vula nda wana hu Ṱhanzi dza Yehova mbili. Vho nṋea iṅwe ya bugu dzavho dza u guda Bivhili. Yeneyo bugu na zwe nda zwi haseledza navho, zwo ita uri ndi tende uri zwine vha tenda zwi bva Bivhilini. Sa tsumbo, Ṱhanzi dza Yehova dzo vha dzi sa dzhii Yesu sa Mudzimu, b dzo vha dzi tshi mu dzhia sa Murwa wa Mudzimu na muthu wa u thoma u sikwa nga Mudzimu. c

Ndo mbo ḓi humela Mexico. Ndo bvela phanḓa na u guda vhuporofita vhune ha sumbedza uri Yesu ndi Messia na Ṱhanzi Dza Yehova. Zwo mmangadza uri hu na vhuporofita vhunzhi vhune ha amba nga ha Messia. Naho zwo ralo, ndo vha ndi tshi kha ḓi timatima. Ndo ḓivhudzisa uri: ‘Naa Yesu ndi ene fhedzi we a vha a tshi nga vha Messia? Ndo dovha nda humbula uri khamusi Yesu o vha a tshi khou tou ḓiita u nga u Messia.’

Ndi mini tsho itaho uri vha tende uri Yesu ndi Messia?

Vhuporofita he Ṱhanzi Dza Yehova dza ntsumbedza, ho vha vhu nga si konwe nga muthu ane a khou tou ḓiitisa. Sa tsumbo, miṅwa ya 700 Yesu a sa athu bebiwa, muporofita Mika o amba uri Messia u ḓo bebwa Betlehema kha ḽa Yudea. d A hu na muthu ane a nga khetha uri u ḓo bebelwa ngafhi. Yesaya o ṅwala uri Messia o vha a tshi ḓo nyadziwa na u vhulawa sa ḽivemu, fhedzi o vha a tshi ḓo vhulungwa na vho pfumaho. e Zwenezwi zwithu zwiṱhe zwo itea kha Yesu.

Zwiṅwe zwe zwa ita uri ndi tende, ndi mafhungo a ambaho nga ha vhomakhulukuku vha Yesu. Bivhili yo amba uri Messia u ḓo vha muḓulu wa Khosi Davida. f Vhayuda vho vha vha tshi vhulunga mutevhe wa lushaka, arali Yesu o vha e si wa lushaka lwa Davida, maswina awe o vha a tshi ḓo zwi bvisela khagala. Fhedzi vho kundelwa u zwi ita ngauri zwo vha zwi khagala uri Yesu ndi muṅwe wa lushaka lwa Davida. Na vhathu vho vhuya vha mu vhidza uri ndi “Murwa wa Davida.” g

Nga 70 C.E. nga murahu ha miṅwa ya 37 Yesu o no lovha, mmbi ya Vharoma yo fhelisa Yerusalema. Khamusi mutevhe wa lushaka wo fheliswa nga tshenetsho tshifhinga. Nga zwenezwo, uri Yesu a vhonale uri ndi Messia ho sedzwa mutevhe wa lushaka o vha o tea u bvelela hu sa athu swika 70 C.E.

U wanulusa zwenezwi zwo vha kwama hani?

Kha Dotoronomio 18:18, 19 ho dzula ho ambiwa uri Mudzimu u ḓo vusa muporofita ane a nga Mushe. Mudzimu o ri: “Ndi ḓo sengisa ane a si thetshelese maipfi anga ane onoyo muporofita a ḓo a amba dzinani ḽanga.” U guda Bivhili yoṱhe nga vhuronwane zwo ita uri ndi tende uri Yesu wa Nazaretha o vha e onoyo muporofita.