1-3. (a) Vhakriste vho sumbedza hani u dzhiela nṱha u ya miṱanganoni? (Sedzani tshifanyiso tsha u thoma.) (b) Ndi mini zwine ra ḓo zwi haseledza kha ino thero?

MUSI Corinna e na miṅwaha ya 17, mme awe vho farwa nahone vha iswa gammbani. Nga murahu, Corinna o thubiwa a ya Siberia kule na hayani. Musi e henengei, o shuma bulasini nahone o farwa sa phuli. Nga zwiṅwe zwifhinga o vha a tshi kombetshedzwa u shuma nnḓa phephoni a songo ambara zwi dudelaho. Naho zwo ralo, Corinna na muṅwe wahashu wa tshisadzini vho ita muano wa u ita zwoṱhe zwine vha nga kona u itela uri vha ṋenge bulasini nahone vha ye miṱanganoni ya tshivhidzo.

² Corinna o ri: “Ro vha ri tshi bva mushumoni nga madekwana nahone ra tshimbila lwendo lwa khilomithara dza 25 u ya tshiṱitshini tsha tshidimela. Tshidimela tsho vha tshi tshi takuwa nga iri ya vhuvhili nga matsheloni, tsho vha tshi tshi tshimbila awara dza rathi, nga murahu ra kona u tshimbila khilomithara dza fumi u ya fhethu he ha vha hu tshi farelwa hone miṱangano.” Corinna o vha a sa ḓisoli nge a ya henefho fhethu. O amba uri: “Musi ri muṱanganoni, ro guda  Tshiingamo nahone ra imba nyimbo dza Muvhuso. Zwenezwo zwo vha zwi tshi khwaṱhisa na u ri fhaṱa.” Vhenevho vhahashu vha tshisadzini vhavhili vho vha vha tshi humela bulasini nga murahu ha maḓuvha mararu, fhedzi rabulasi o vha a sa zwi ṱhogomeli uri vho vha vhe siho.

³ Ndi kale vhathu vha Yehova vha tshi lavhelela u ṱangana. Sa tsumbo, Vhakriste vha u thoma vho ṱulutshelwa u kuvhangana u itela vhurabeli ha Yehova na u guda nga hae. (Mishumo 2:42) Zwi tou vha khagala uri na inwi ni a lavhelela miṱangano nga maṱo matswuku. Fhedzi u fana na vhaṅwe vhahashu, ni nga wana zwi tshi ni konḓela u vha hone miṱanganoni tshifhinga tshoṱhe. Khamusi ni shuma awara dzo engedzeaho kana mushumo wo ḓalesa kana ni dzula no neta. Nga zwenezwo, ndi mini zwine zwa ḓo ri thusa uri ri ite zwoṱhe zwi re maanḓani ashu u itela uri ri vhe hone miṱanganoni? ^[1] (Sedzani notsi dza u fhedzisela.) Ri nga ṱuṱuwedza hani pfunzo dzashu dza Bivhili na vhaṅwe vhathu uri vha vhe hone miṱanganoni tshifhinga tshoṱhe? Heyi thero i ḓo bvisela khagala uri ndi ngani u vha hone miṱanganoni (1) zwi tshi ri vhuyedza, (2) zwi tshi vhuyedza vhaṅwe, na (3) u takadza Yehova. ^[2]—Sedzani notsi dza u fhedzisela.

4. U kuvhangana hashu zwi ri thusa hani u guda nga ha Yehova?

⁴ Miṱangano i a ri funza. Muṱangano muṅwe na muṅwe u ri thusa u guda zwo engedzeaho nga ha Yehova. Sa tsumbo, zwenezwino zwivhidzo zwinzhi zwo guda bugu Sendelani Tsini na Yehova Pfunzoni ya Bivhili ya Tshivhidzo. No ḓipfa hani musi ri tshi haseledza pfaneleo dza Yehova na musi ni tshi pfa phindulo dzi sumbedzaho nḓila ine vhahashu vha ḓipfa ngayo nga hae? A zwi timatimisi uri lufuno lwaṋu kha Yehova lwo engedzea. Miṱanganoni ri dovha ra guda zwinzhi nga ha Bivhili nga u thetshelesa nyambo, misumbedzo na musi hu tshi khou vhalwa Bivhili. (Nehemia 8:8) Humbulani nga ha zwithu zwinzhi zwine ra zwi tumbula musi ri tshi khou lugiselela muvhalo wa Bivhili na u thetshelesa zwe vhaṅwe vha zwi tumbula-vho.

5. Miṱangano yo ni thusa hani u shumisa zwe na zwi guda Bivhilini na u khwinisa nḓila ine na huwelela ngayo?

⁵ Miṱangano i ri gudisa u shumisa vhutshiloni hashu zwine ra zwi guda Bivhilini. (1 Vhathesalonika 4:9, 10) Sa tsumbo, naa no no vhuya na ṱanganela kha Pfunzo ya Tshiingamo ye ya ni ṱuṱuwedza uri ni ṱoḓe u ita zwo engedzeaho tshumeloni ya Yehova, u khwinisa nḓila ine na rabela ngayo kana u hangwela vhahashu? Miṱangano ine ra i fara vhukati ha vhege i nga ri gudisa nḓila ya u huwelela mafhungo maḓifha na nḓila ya u thusa vhaṅwe u pfesesa ngoho i bvaho Bivhilini.—Mateo 28:19, 20.

6. Miṱangano i ri ṱuṱuwedza na u ri khwaṱhisa nga nḓila-ḓe?

⁶ Miṱangano i a ri ṱuṱuwedza. Shango  ḽa Sathane ḽi a lingedza u fhungudza lutendo lwashu nahone ḽi nga ita uri ri pfe ro tsikeledzea na u kulea nungo. Fhedzi miṱangano yashu i a ri ṱuṱuwedza na u ri ṋea nungo dza u bvela phanḓa ri tshi shumela Yehova. (Vhalani Mishumo 15:30-32.) Kanzhi ri haseledza nḓila ye vhuporofita ha Bivhilini ha ḓadzea ngayo. Zwenezwo zwi ri khwaṱhisedza uri Yehova u ḓo ḓadzisa mafulufhedziso awe a tshifhingani tshi ḓaho. Vhahashu a vha ri ṱuṱuwedzi fhedzi nga nyambo dzavho, vha dovha vha ri ṱuṱuwedza nga phindulo na u imbela Yehova zwi tshi bva mbiluni. (1 Vhakorinta 14:26) Nahone musi ri tshi fara nyambedzano navho miṱangano i sa athu u thoma na musi i tshi fhela, ri pfa ro homoloswa ngauri ri ṱhogomela uri ri na khonani nnzhi dzine dza ri funa zwi tshi bva mbiluni.—1 Vhakorinta 16:17, 18.

7. Ndi ngani zwi zwa ndeme uri ri vhe hone miṱanganoni?

⁷ Miṱanganoni ri wana muya mukhethwa wa Mudzimu. Yesu u shumisa wonoyu muya mukhethwa u itela u ranga phanḓa zwivhidzo. O ita na u ri vhudza uri ri fanela u ‘pfa zwine muya wa vhudza zwivhidzo.’ (Nzumbululo 2:7) Muya mukhethwa u ri thusa u lwisana na milingo na u huwelela nga tshivhindi. U dovha wa ri thusa uri ri dzhie phetho dza vhuṱali. Ndi ngazwo ri tshi fanela u ita zwoṱhe zwine ra nga kona uri ri vhe hone miṱanganoni ri kone u wana muya mukhethwa wa Mudzimu.

8. U vha hone hashu, phindulo dzashu, na u imba miṱanganoni ya tshivhidzo zwi thusa hani vhahashu? (Dovhani ni sedze bogisi “ U A Homolowa Nga Murahu Ha Miṱangano.”)

⁸ Musi ri miṱanganoni ri vha na zwibuli zwa u sumbedza vhahashu uri ri a vha funa. Vhanzhi tshivhidzoni vha sedzana na zwiimo zwi konḓaho vhukuma. Muapostola Paulo o ṅwala uri: “Kha ri ṱhogomelane.” (Vhaheberu 10:24, 25) Ri nga sumbedza uri ri funa vhahashu musi ri tshi kuvhangana u itela u ṱuṱuwedzana. Musi ri tshi vha hone miṱanganoni, ri sumbedza vhahashu uri ri ṱoḓa u vha navho, u amba navho nahone ri na dzangalelo kha nḓila ine vha ḓipfa ngayo. Ri dovha ra vha ṱuṱuwedza nga phindulo dzashu na u imba zwi tshi bva mbiluni.—Vhakolosa 3:16.

9, 10. (a) Ṱalutshedzani nḓila ine maipfi a Yesu a re kha Yohane 10:16 a ri ṱuṱuwedza ngayo u kuvhangana na vhahashu. (b) U vha hone hashu miṱanganoni tshifhinga tshoṱhe zwi kwama hani vhaṅwe tshivhidzoni?

 ⁹ U vha hone miṱanganoni zwi ita uri tshivhidzo tshi vhe na vhuthihi. (Vhalani Yohane 10:16.) Yesu o ḓifanyisa na mulisa nahone vhatevheli vhawe a vha fanyisa na sambi ḽa nngu. Sa tsumbo: Arali nngu mbili dzi tshikwarani, dziṅwe mbili dzi govhani, iṅwe i huṅwe fhethu, naa dzenedzo nngu ndi sambi? Hai, ngauri sambi ḽa nngu ḽi kuvhangana fhethu huthihi nahone ḽi tevhela mulisa. Nga nḓila i fanaho, a ro ngo fanela u vha kule na vhahashu nga u sa vha hone miṱanganoni. Ri fanela u kuvhangana uri ri vhe “sambi ḽithihi” nahone ri tevhele “mulisa muthihi.”

¹⁰ Miṱangano yashu i ita uri ri vhe na vhuthihi sa muṱa u re na lufuno. (Psalme ya 133:1) Vhaṅwe tshivhidzoni vho landulwa nga miṱa yavho, vhabebi kana vharathu, vhakomana kana khaladzi dzavho. Fhedzi Yesu o vha fulufhedzisa muṱa we wa vha u tshi ḓo vha funa na u vha ṱhogomela. (Marko 10:29, 30) Arali na vha hone miṱanganoni tshifhinga tshoṱhe, ni nga vha khotsi, mme, mukomana, murathu kana khaladzi ya muṅwe tshivhidzoni. Zwenezwo zwi fanela u ri ṱuṱuwedzela u ita zwoṱhe zwine ra nga kona uri ri vhe hone miṱanganoni tshifhinga tshoṱhe.

11. U vha hone miṱanganoni zwi ri thusa hani u ṋea Yehova zwo mu fanelaho?

¹¹ Musi ri miṱanganoni ri ṋea Yehova zwo mu fanelaho. Samusi e Musiki washu, ri fanela u mu livhuha, u mu hulisa  na u mu renda. (Vhalani Nzumbululo 7:12.) Zwenezwi ri nga zwi ita miṱanganoni musi ri tshi rabela Yehova, u mu imbela na u amba nga hae. Ri na tshibuli tshavhuḓi lungafhani tsha u gwadamela Yehova vhege iṅwe na iṅwe!

12. U thetshelesa hashu ndaela ya Yehova ya u vha hone miṱanganoni i mu kwama hani?

¹² Yehova o ri sika, ri fanela u mu thetshelesa. O ri ṋea ndaela ya uri ri fanela u kuvhangana, zwihuluhulu samusi ri tshi khou sendela tsini na vhufhelo. Musi ri tshi thetshelesa yeneyo ndaela, Yehova u a takala. (1 Yohane 3:22) U a zwi ṱhogomela uri ri ṱoḓa u vha hone miṱanganoni nahone u dzhiela nṱha vhuḓidini vhune ra vhu ita uri ri vhe hone.—Vhaheberu 6:10.

13, 14. Ri sendela hani tsini na Yehova na Yesu miṱanganoni?

¹³ Musi ri tshi vha hone miṱanganoni, ri sumbedza Yehova uri ri ṱoḓa u sendela tsini nae na Murwa wawe. Musi ri miṱanganoni, ri guda Bivhili na u gudiswa nga Yehova zwine ra fanela u zwi ita na nḓila ine ra fanela u tshila ngayo. (Yesaya 30:20, 21) Na vhathu vha sa shumeli Yehova, musi vha tshi ḓa miṱanganoni vha a zwi ṱhogomela uri ri livhiswa nga Mudzimu. (1 Vhakorinta 14:23-25) Yehova u khou livhisa miṱangano yashu nga muya wawe mukhethwa nahone zwine ra zwi guda zwi bva khae. Nga zwenezwo, musi ri tshi ya miṱanganoni, ri thetshelesa zwine Yehova a ri vhudza zwone, ra pfa nḓila ine a ri funa ngayo nahone ri sendela tsini nae.

¹⁴ Yesu, Ṱhoho ya tshivhidzo o amba uri: “Hune ha kuvhangana vhavhili kana vhararu nga dzina ḽanga, na nṋe ndi vhukati havho.” (Mateo 18:20) Bivhili i dovha ya amba uri Yesu u “tshimbila vhukati” ha zwivhidzo. (Nzumbululo 1:20–2:1) Zwi tou vha khagala uri Yehova na Yesu vha vhukati hashu nahone vha khou ri khwaṱhisa miṱanganoni yashu. Yehova u ḓipfa hani musi a tshi vhona ni tshi khou ita zwoṱhe zwine na nga kona u itela u sendela tsini nae na Murwa wawe?

15. U vha hone hashu miṱanganoni zwi sumbedza hani uri ri ṱoḓa u thetshelesa Mudzimu?

¹⁵ U vha hone hashu miṱanganoni zwi sumbedza uri ri ṱoḓa u thetshelesa Yehova. Yehova ha ri kombetshedzi u ita zwine a zwi funa. (Yesaya 43:23) Nga zwenezwo, musi ri tshi thetshelesa ndaela yawe ya u vha hone miṱanganoni ri vha ri tshi khou sumbedza uri ri a mu funa nahone ri tenda uri u na ndugelo ya u ri vhudza zwine ra fanela u ita. (Vharoma 6:17) Sa tsumbo, ni nga ita mini arali mutholi waṋu a tshi lavhelela uri ni shume nga maanḓa lune na sa ḓo kona u vha hone miṱanganoni tshifhinga tshoṱhe? Khamusi muvhuso wa shangoni ḽa haṋu wo vhea mulayo wa uri arali ni mugwadameli wa Yehova ni ḓo lifhiswa, u iswa dzhele kana u ṱarafiwa nga iṅwe nḓila. Kana nga zwiṅwe zwifhinga ni nga kha ḓi takalela u ita zwiṅwe zwithu  nṱhani ha u ya miṱanganoni. Kha zwenezwi zwiimo zwoṱhe, ri fanela u ḓidzhiela phetho. (Mishumo 5:29) Fhedzi arali tshifhinga tshoṱhe ri tshi thetshelesa Yehova ri vha ri tshi khou mu takadza.—Mirero 27:11.

16, 17. (a) Ri zwi ḓivha hani uri u vha hone miṱanganoni zwo vha zwi zwa ndeme kha Vhakriste vha ḓanani ḽa u thoma? (b) Wahashu George Gangas o ḓipfa hani nga miṱangano ya Vhukriste?

¹⁶ Nga murahu ha musi Vhakriste vha tshi kuvhangana nga Pentekoste ya 33, vho bvela phanḓa vha tshi rabela Yehova misi yoṱhe. Vho “bvela phanḓa vha tshi ḓiṋekedzela pfunzo ya vhaapostola, vhe na vhuthihi, vha tshi ḽa, na u rabela vhoṱhe.” (Mishumo 2:42) Nahone a vho ngo litsha u kuvhangana naho vho vha vha tshi khou tovholwa nga muvhuso wa Vharoma u katela na vharangaphanḓa vha vhurereli ha Tshiyuda. Naho zwo vha zwi songo leluwa, vho bvela phanḓa vha tshi ita zwoṱhe zwine vha kona u itela u kuvhangana.

¹⁷ Na ṋamusi, vhashumeli vha Yehova vha dzhiela nṱha vhukuma miṱangano nahone vha a ḓiphina vhukuma musi vhe miṱanganoni. George Gangas, we a vha e muraḓo wa Tshigwada tshi Langaho lwa miṅwaha i fhiraho 22 o ri: “U kuvhangana na vhahashu muṱanganoni zwi a ntakadza vhukuma nahone zwi tou vha tshisima tsha ṱhuṱhuwedzo. Ndi takalela vhukuma u vha wa u thoma u swika Holoni ya Muvhuso nahone ndi vha wa u fhedza u ṱuwa arali zwi tshi konadzea. Ndi pfa ndi na dakalo musi ndo fara nyambedzano na vhathu vha Mudzimu. Musi ndi vhukati ha vhahashu ndi pfa u nga ndi na muṱa wanga paradisoni ya lwa muya.” O engedza nga uri: “Tshifhinga tshoṱhe ndi na lutamo luhulwane lwa u vha hone miṱanganoni.”

18. Ni ḓipfa hani nga miṱangano yashu, nahone no ḓiimisela u ita mini?

¹⁸ Naa na inwi ni ḓipfa nga yeneyo nḓila musi zwi tshi ḓa kha u gwadamela Yehova? Arali zwo ralo, bvelani phanḓa ni tshi ita zwine na nga kona u itela u vha hone miṱanganoni naho zwi tshi konḓa. Sumbedzani Yehova uri ni ḓipfa nga nḓila ye Khosi Davida a ḓipfa ngayo musi a tshi ri: “Yehova, vhushavhelo ha nḓuni yau ndi a vhu funa.”—Psalme ya 26:8.