Thabelo I Nga Ni Thusa Hani?

TAMBANI

Musi Pamela o farwa nga vhulwadze vhu shushaho, o ya u ṱoḓa thuso kha madokotela. Naho zwo ralo, o ita na u rabela Mudzimu uri a mu fhe nungo dza u konḓelela vhulwadze hawe. Naa thabelo yo mu thusa?

Pamela u ri: “Ndo vha ndi tshi ofha vhukuma musi ndi tshi khou lafhiwa khentsara. Fhedzi musi ndi tshi amba na Yehova Mudzimu nga thabelo, ndo vha ndi tshi pfa ndo dzika nahone ndi tshi kona u konḓelela vhuṱungu hanga. Ndi kha ḓi pfa vhuṱungu vhunzhi, fhedzi thabelo i nthusa uri ndi vhe na mavhonele avhuḓi. Musi vhathu vha tshi mmbudzisa uri ndo vuwa hani ndi ri: ‘A tho ngo vuwa zwavhuḓi, fhedzi ndo takala.’”

A si uri ri tea u rabela fhedzi musi ro sedzana na vhulwadze vhuhulwane kana thaidzo khulwane. Roṱhe ri a sedzana na thaidzo khulwane kana ṱhukhu nahone kanzhi ri a ṱoḓa u thusiwa uri ri imedzane nadzo. Naa thabelo i nga thusa?

Bivhili i ri: “Kumedzela Yehova muhwalo wau, ene u ḓo u ṱhaḓula. Ha nga litshi muvhuya a tshi wa.” (Phisalema 55:22) Ndi maipfi a khuthadzaho vhukuma. U rabela zwi nga ni thusa hani? Musi ni tshi rabela Mudzimu nga nḓila yo teaho, u ḓo ni fha zwine na zwi ṱoḓa uri ni imedzane na thaidzo dzaṋu.—Vhalani bogisi “ U Rabela Zwi Nga Ni Thusa Hani?”

U Rabela Zwi Nga Ni Thusa Hani?

Mulalo

‘Ni vhudze Mudzimu zwoṱhe nga thabelo; Mudzimu a tshi shumisa Kristo Yesu u ḓo ni ṋea mulalo une vhathu vha si kone u u pfesesa, wa tsireledza mbilu dzaṋu na mihumbulo yaṋu.’ (Vhafilipi 4:6, 7) Musi ni tshi vhudza Mudzimu thaidzo dzaṋu, u ḓo ni thusa uri ni dzule no dzika na uri ni ite zwithu nga vhuṱali musi ni na mutsiko.

Vhuṱali vhu bvaho kha Mudzimu

“Ane a shaya vhuṱali, nga a dzule a tshi humbela Mudzimu, u ḓo mu ṋea, ngauri u ṋea vhoṱhe nga mbilu yoṱhe a sa gunguli.” (Yakobo 1:5) Nga zwiṅwe zwifhinga, ri dzhia phetho dzi si dzavhuḓi musi ri na mutsiko. Arali na rabela uri Mudzimu a ni fhe vhuṱali, a nga ni humbudza zwithu zwinzhi zwi thusaho zwo ṅwalwaho Ipfini ḽawe Bivhili.

Nungo na khuthadzo

“Ngauri zwoṱhe ndi zwi koniswa nga ane a nṋea maanḓa.” (Vhafilipi 4:13) Samusi Yehova e Mudzimu Ramaanḓaoṱhe, a nga ni ṋea nungo dza u imedzana na dzithaidzo kana dza u ni tikedza kha milingo. (Yesaya 40:29) Bivhili i dovha ya ri Yehova ndi “Mudzimu wa u khuthadza hoṱhe.” A nga ri khuthadza “kha milingo yoṱhe.”—2 Vhakorinta 1:3, 4.

NAA NI ḒO VHUYELWA NGA U RABELA?

Yehova ha ni kombetshedzi u rabela, fhedzi u ṱoḓa ni tshi mu rabela. (Yeremia 29:11, 12) Hu pfi mini arali no vha ni tshi vhona u nga Yehova ha fhinduli thabelo dzaṋu? Ni songo ṱungufhala na litsha u rabela. Sa tsumbo, musi vhana vha tshi humbela thuso kha vhabebi, zwi nga itea uri vhenevho vhabebi vhane vha funa vhana vhavho vha si vha thuse nga nḓila ye vhana vhavho vha vha vho lavhelela u thuswa ngayo. Zwi nga dovha zwa itea uri vha si vha thuse na nga tshifhinga tshe vha vha vho lavhelela u thuswa ngatsho. Khamusi vhabebi vha nga vha vhe na nḓila ya khwine ya u thusa vhana vhavho. Fhedzi zwine ra zwi ḓivha ndi hezwi: Vhabebi vhane vha funa vhana vhavho vha a vha thusa.

A hu na khotsi a funaho vhana vhawe u fhira Yehova Mudzimu nahone na inwi u ṱoḓa u ni thusa. Arali na ita zwoṱhe zwine na nga kona uri ni ite zwithu zwoṱhe zwe ra amba nga hazwo kha hoyu magazini zwi bvaho Bivhilini, Mudzimu u ḓo fhindula thabelo dzaṋu nga nḓila ya khwinesa!—Phisalema 34:15; Mateo 7:7-11.

Ṱhanzi dza Yehova

Thabelo I Nga Ni Thusa Hani?

You May Also Like

Naa Thabelo I Nga Ri Thusa?

Thabelo I Nga Ni Thusa Hani?

NḒILA DZA U DOWNLOUDA

You May Also Like

NḒILA DZA U DOWNLOUDA

Khethani Luambo Lwaṋu

Sherani