Naa no no vhuya na pfa ni sa koni u thusa muthu ane a vha tsini na inwi o felwaho nga muthu ane a mu funa? Nga zwiṅwe zwifhinga, ri nga pfa ri sa ḓivhi zwine ra nga amba kana u ita, nga zwenezwo, ri fhedzisela ri songo amba kana u ita tshithu. Fhedzi hu na zwithu zwi shumaho na zwi thusaho zwine ra nga zwi ita.

Kanzhi zwine zwa ṱoḓea ndi u vha tsini nae na u mu vhudza maipfi ane a ri “Ndi lila na inwi.” Kha mvelele nnzhi, u kuvhatedza muthu kana u mu fara tshanḓa ndi nḓila i shumaho ya u sumbedza uri ni a mu funa. Arali muthu o felwaho a tshi ṱoḓa u amba, thetshelesani nga vhuronwane. Zwa khwine u fhira zwoṱhe, itelani muṱa wo felwaho zwiṅwe zwithu, khamusi u ita miṅwe mishumo ine wonoyo muṱa wa kundelwa u i ita, i nga ho u bika, u ṱhogomela vhana kana u thusa kha nzudzanyo dza mbulungo arali zwi tshi ṱoḓea. Zwenezwo zwi nga thusa vhukuma u fhira u sokou amba maipfi a khuthadzaho.

Nga u ya ha tshifhinga, ni nga ṱuṱuwedzea u amba nga ha muthu o faho, khamusi no livhisa ṱhogomelo kha pfaneleo dzavhuḓi kana tshenzhelo dzi takadzaho. Yeneyo nyambedzano i nga ita uri muthu o felwaho a ṅwethuwe. Sa tsumbo, Pam we a felwa nga munna wawe Ian miṅwahani ya rathi yo fhiraho, o ri: “Nga zwiṅwe zwifhinga vhathu vha mmbudza nga ha zwithu zwavhuḓi zwe Ian a zwi ita zwe nda vha ndi sa zwi ḓivhi nahone zwenezwo zwi ita uri ndi takale.”

 Vhaṱoḓisisi vho amba uri vhathu vhanzhi vho felwaho vha wana thuso musi vha tshi kha ḓi tou bva u felwa, fhedzi nga u ṱavhanya vhathu vha re tsini navho vha a farakanea nga mishumo yavho nahone vha hangwa nga ha muthu o felwaho. Nga zwenezwo, itani vhuḓidini ha u davhidzana tshifhinga tshoṱhe na khonani yo felwaho. * Vhathu vhanzhi vho felwaho vha a takalela zwenezwi ngauri zwi ita uri vha si tsha pfa vhuṱungu lwa tshifhinga tshilapfu.

Ṱhogomelani tsumbo ya Kaori, mufumakadzi wa Mudzhapani ane a kha ḓi vha muswa, we a pfa vhuṱungu vhukuma nge a felwa nga mme awe nahone nga murahu ha miṅwedzi ya 15 a felwa nga mukomana wawe. Zwi takadzaho ndi uri o wana thikhedzo tshifhinga tshoṱhe kha khonani dzi fulufhedzeaho. Muṅwe wavho o vha e Ritsuko we a vha e muhulwane vhukuma kha Kaori nahone o mu humbela uri a vhe khonani yawe ya tsini. Kaori o ri: “U tou amba ngoho ndo vha ndi songo takala. Ndo vha ndi sa ṱoḓi muthu a tshi dzhiela mme anga vhudzulo nahone ndo vha ndi sa humbuli uri hu nga vha na muthu ane a nga ita nga u ralo. Naho zwo ralo, nga nṱhani ha nḓila ye Mma Vho-Ritsuko vha mpfara ngayo, ndo thoma u pfa ndi tsini navho. Vhege iṅwe na iṅwe, ro ya roṱhe kha mushumo wa vhuevangeli na miṱanganoni ya Vhukriste. Vho nthamba u nwa navho tie, vha nḓisela zwiḽiwa nahone zwifhinga zwinzhi vho nṅwalela marifhi na dzigaraṱa. Mavhonele avhuḓi a Mma Vho-Ritsuko o vha na ṱhuṱhuwedzo yavhuḓi kha nṋe.”

Ho no fhira miṅwaha ya 12 mme a Kaori vho fa nahone ṋamusi ene na munna wawe ndi vhaevangeli vha tshifhinga tsho ḓalaho. Kaori o ri: “Mma Vho-Ritsuko vho bvela phanḓa vha tshi sumbedza u vha na dzangalelo. Musi ndi tshi ya hayani ndi dzula ndi tshi vha dalela nahone ndi takalela vhukonani vhu fhaṱaho.”

Iṅwe tsumbo ya muṅwe we a vhuyelwa nga u tikedzwa tshifhinga tshoṱhe, ndi muṅwe wa Ṱhanzi dza Yehova wa ngei Cyprus ane a pfi Poli. Poli o vha e na munna a re na mafunda ane a pfi Sozos, we a vha e tsumbo yavhuḓi sa mulisa wa Mukriste nga u dzula a tshi ramba tsiwana na dzitshilikadzi hayani havho u itela u vha na vhukonani na u ḽa zwiḽiwa. (Yakobo 1:27) Zwi ṱungufhadzaho ndi uri musi Sozos e na miṅwaha ya 53, o fa nge a vha o bva bundu kha vhuluvhi. Poli o ri: “Ndo felwa nga munna wanga a fulufhedzeaho we nda fhedza nae miṅwaha ya 33 ri mbinganoni.”

Nga murahu ha mbulungo, Poli o pfulutshela Canada na murwa wawe muṱuku ane a pfi Daniel a re na miṅwaha ya 15. Musi vhe henefho, vho thoma u konana na tshivhidzo tsha Ṱhanzi dza Yehova. Poli o ri: “Khonani dzanga dza tshivhidzo tshiswa dzo vha dzi sa ḓivhi zwe zwa itea kha riṋe na vhuimo hashu vhu konḓaho. Fhedzi zwenezwo a zwo ngo vha thivhela uri vha ḓe kha riṋe na u ri khuthadza nga maipfi avho a vhuthu na thuso i shumaho. Yeneyo thuso yo vha i ya ndeme vhukuma, zwihuluhulu nga tshenetsho tshifhinga tshe murwa wanga a vha a tshi ṱoḓa khotsi awe! Vhane vha ranga phanḓa tshivhidzoni vho sumbedza u vha na dzangalelo kha Daniel. Muṅwe muhulwane o ita vhungoho ha uri u katela Daniel musi a tshi ḓiphina na dzikhonani kana musi vha tshi ya u tamba bola.” Vhuvhili havho vha khou bvela phanḓa zwavhuḓi.

Hu na nḓila nnzhi dzine ra nga ṋea ngadzo vho felwaho thuso na khuthadzo zwi shumaho. Bivhili i dovha ya ri khuthadza nga fulufhelo ḽi takadzaho ḽa vhumatshelo.