U pfela vhuṱungu zwi amba u vha na vhukoni ha u kona u pfesesa nḓila ine vhaṅwe vha ḓipfa ngayo kana u ḓivhea kha vhuimo ha onoyo muthu. Dokotela Rick Hanson ane a vha makone kha zwa muhumbulo o amba uri “zwi tou vha malofhani u pfela vhuṱungu.”

ṰHOGOMELANI HEZWI: Ndi ngani hu vhathu fhedzi vhane vha vha na vhukoni ha u pfela vhuṱungu? Bivhili i amba uri Mudzimu o sika vhathu a tshi ḓifanyisa. (Genesi 1:26) Nga nṱhani ha u ri ro sikwa nga tshifanyiso tsha Mudzimu, ri a kona u edzisa pfaneleo yawe. Nga zwenezwo, musi vhathu vha tshi pfela vhaṅwe vhathu vhuṱungu, vha vha vha tshi khou sumbedza nḓila ine Musiki washu Yehova Mudzimu a pfela ngayo vhuṱungu.—Mirero 14:31.

Mudzimu u a ri pfela vhuṱungu nahone u a zwi vhenga musi a tshi ri vhona ri tshi tambula. Musi Bivhili i tshi amba nga ha Vhaisiraele vhe vha konḓelela u vha phuli ngei Egipita nahone nga murahu vha ṱangana na zwiimo zwi konḓaho lwa miṅwaha ya 40 vhe sogani, i ri: “Hoṱhe he vha vhaisala, o pfa a tshi vhaisala-vho.” (Yesaya 63:9) Mudzimu o pfa vhuṱungu musi a tshi vhona Vhaisiraele vha tshi ṱhuphea. Mudzimu u ri: “Maṱhupho avho ndi a a ḓivha.” (Ekisodo 3:7) O dovha a ri: “Ane a vhuya a ni kwama o nndonga munwe iṱoni.” (Sakaria 2:8, Bivhili Khethwa) Musi vhaṅwe vha tshi ri vhaisa na Mudzimu u a pfa vhuṱungu.

Bivhili i ri khwaṱhisedza uri naho ri tshi pfa u nga a ri ngo tea u pfelwa vhuṱungu nga Mudzimu, fhedzi “Mudzimu ndi muhulwane u fhira mbilu dzashu nahone u ḓivha zwithu zwoṱhe.” (1 Yohane 3:19, 20) Mudzimu u ri ḓivha khwine u fhira nḓila ine ra ḓi ḓivha ngayo. U a kona u vhona vhuimo hashu, nḓila ra humbula ngayo na zwine ra zwi pfa. U a ri pfela vhuṱungu.

 Bivhili i ri khwaṱhisedza uri

• “Hone U tshi ḓo vhidza Yehova a aravha. Ndi hone U tshi ḓo mu vhidzelela a ri: Ndi fhano!”—YESAYA 58:9.

• “Ngauri ngelekanyo. dzine nda khou ni elelwa ngadzo’ Nṋe ndi a dzi ḓivha; Yehova u ralo. Ndi ngelekanyo dza mulalo, a si dza u ni vhaisa; ndi dza uri ndi ni ṋee zwa matshelo, na fulufhelo. Ni ḓo mbidza na ya na nthabela; Nṋe nda ni pfa.” —YEREMIA 29:11, 12.

• “Maṱodzi anga U a ela nga mudzio wau; nga ngoho wo vhala zwoṱhe.” —PSALME ya 56:8.

Naa u ḓivha uri Mudzimu u a ri pfela vhuṱungu zwi ḓo ri thusa u sedzana na vhuimo vhu konḓaho? Ṱhogomelani zwe zwa itea kha Maria:

“Vhutshilo ho thoma u nkonḓela musi ndi tshi xelelwa nga murwa wanga we a vha e na miṅwaha ya 18, we a vha o farwa nga khentsara lwa miṅwaha mivhili. Ndo vha ndo kwatela Yehova nge a si dzhenelele na u fhodza murwa wanga!

“Nga murahu ha miṅwaha ya rathi, khonani ye nda i wana tshivhidzoni yo nthetshelesa nga vhuronwane musi ndi i vhudza uri ndi pfa u nga Yehova ha mpfuni. Nga murahu ha u nthetshelesa lwa dzi awara a sa ndzheni haṋwani, o amba luṅwalo lwe lwa nkwama vhukuma. Luṅwalo lwe a lu amba ndi 1 Yohane 3:19, 20 lune lwa ri: ‘Mudzimu ndi muhulwane u fhira mbilu dzashu nahone u ḓivha zwithu zwoṱhe.’ O mmbudza uri Yehova u a pfesesa vhuimo vhu konḓaho vhune ra vha khaho.

“Hu sa londwi zwe a zwi amba, zwo nkonḓela uri ndi litshe u sinyuwa! Ndo vhala Psalme ya 94:19 ine ya ri: ‘Kha mbilaelo nnzhi dze dza ndzhena, mbilu yanga yo ḓi takadzwa nga phumudzo dzau.’ Ndo pfa u nga dzenedzo ndimana dzo ṅwalelwa nṋe! Mafheleloni, ndo wana zwi tshi nkhuthadza u amba na Yehova nga ha mbilaelo dzanga, ndi tshi ḓivha uri u a thetshelesa nahone u a pfesesa.”

Zwi a khuthadza vhukuma u ḓivha uri Mudzimu u a ri pfesesa na uri pfela vhuṱungu! Fhedzi ndi ngani ri tshi tambula nga u rali? Naa ndi nga nṱhani ha uri Mudzimu u khou ri ṱarafa nge ra ita zwithu zwo khakheaho? Naa Mudzimu u ḓo fhelisa thambulo yoṱhe? Dzenedzo mbudziso dzi ḓo fhindulwa kha thero dzi tevhelaho.