Samusi Mudzimu e Muya, na vharuṅwa ndi zwivhumbiwa zwa muya zwi sa vhonali nahone a zwi na “ṋama na marambo.” Vharuṅwa vha fulufhedzeaho vha dzula ṱaḓulu nahone vha a kona u vhona Mudzimu ngei ṱaḓulu.—Luka 24:39; Mateo 18:10; Yohane 4:24.

Nga zwiṅwe zwifhinga, vharuṅwa vho vhuya vha vha kha tshivhumbeo tsha muthu u itela u ita mishumo ye vha ṋewa nga Mudzimu kha ḽifhasi nahone vho humela ṱaḓulu musi vho no fhedza mishumo yavho.—Vhahaṱuli 6:11-23; 13:15-20.

Naho Bivhilini vharuṅwa vha tshi ṱaluswa sa vhanna, fhedzi a huna munna kana mufumakadzi khavho. A vha vhingi kana u vhingwa nahone a vha vhi na vhana. Zwiṅwe hafhu, vharuṅwa a vho ngo thoma u vha hone kha ḽifhasi sa vhathu—sa lutshetshe, vhana kana vhathu vhahulwane. Vharuṅwa vho sikwa nga Yehova; ndi ngazwo Bivhilini vha tshi vhidzwa “vharwa vha Mudzimu.”—Yobo 1:6; Psalme ya 148:2, 5.

Musi Bivhili i tshi amba nga ha “ndimi dza vhathu na dza vharuṅwa,” i vha i tshi khou sumbedza uri vharuṅwa vha na luambo lwavho nahone vha a amba. Naho Mudzimu o amba na vhathu a tshi shumisa vharuṅwa, ha ri tendeli ri tshi gwadamela vharuṅwa kana u vha rabela.—1 Vhakorinta 13:1; Nzumbululo 22:8, 9.

Hu na vharuṅwa vha zwigidi zwa fumi zwi tshi andiswa nga zwigidi zwa fumi, khamusi vha nga vha vhe dzibilioni. *—Daniele 7:10; Nzumbululo 5:11.

Vharuṅwa ndi “vhahali vha maanḓa”—vha na maanḓa a fhiraho a vhathu—nahone vho ṱalifha u fhira vhathu. Vha na luvhilo luhulu vhukuma lune ri nga si kone u lu humbula.—Psalme ya 103:20; Daniele 9:20-23.

Hu sa londwi maanḓa ane vha vha nao, vharuṅwa vha na mikano nahone hu na zwithu zwine vha si zwi ḓivhe.—Mateo 24:36; 1 Petro 1:12.

Vharuṅwa vho sikwa vhe na vhumuthu, pfaneleo dza Mudzimu na mbofholowo ya u ḓikhethela. Nga zwenezwo, u fana na vhathu, vha a ḓivha zwo lugaho na zwi songo lugaho. Zwi ṱungufhadzaho ndi uri vhaṅwe vharuṅwa vho khetha u shandukela Mudzimu.—Yuda 6.