Yehova o vhudza Vhaisiraele uri vha tea u vha vhakhethwa. U itela u vha thusa uri vha vhe vhakhethwa, o vha vhudza uri: “U songo tshimbila u tshi tshinya vhaṅwe dzina kha vhahau. U songo vhulayisa muṅwe muthu. Ndi nṋe Yehova.”—Lev. 19:2, 16.

Maipfi ane a ri ‘u vhulayisa’ a ṱalutshedza zwavhuḓi ḽiidioma ḽa Tshihevheru, fhedzi eneo maipfi a amba mini? Iṅwe bugu ya Vhayuda i ambaho nga ha bugu ya Levitiko i ri: “Zwi a konḓa u pfesesa enea maipfi ngauri a ri ḓivhi uri ḽiidioma ḽa Tshihevheru ḽi khou amba nga ha mini. Arali ri tshi khou tevhedza ipfi nga ipfi, ḽeneḽi ḽiidioma ḽi amba uri ‘u songo ima nṱha ha kana tsini na.’”

Vhaṅwe vhagudi vha vhona u nga enea maipfi a tshimbidzana na ndimana ya 15 ine ya ri: “Ni haṱule nga u fhulufhedzea. Ni songo ṱalula mushai kana na takalela mupfumi. Ni haṱule muṅwe muthu nga nḓila yo teaho.” (Lev. 19:15) Arali zwo ralo, mulayo u re kha ndimana ya 16 une wa ri u songo “vhulayisa muṅwe muthu,” u nga vha u tshi khou amba uri Vhaisiraele vha tea u fhulufhedzea musi vha tshi senga khothe, zwi tshi ḓa kha zwa mabindu kana muṱani. Nahone Muisiraele ho ngo tea u ita zwithu zwa vhufhura a tshi itela u ḓivhuyedza. Ndi ngoho uri a ro ngo tea u ita zwenezwo zwithu, fhedzi hu na nḓila ya khwine ine ra nga pfesesa ngayo eneo maipfi a re kha ndimana ya 16.

Ṱhogomelani maipfi a u thoma a yeneyo ndimana. Mudzimu u vhudza vhathu vhawe uri vha songo tshinya vhaṅwe dzina. Ndi ngoho uri muthu ane a sola vhaṅwe a nga vhanga thaidzo, fhedzi muthu ane a tshinya vhaṅwe dzina, u ita zwi fhiraho zwenezwo. (Mir. 10:19; Muh. 10:12-14; 1 Tim. 5:11-15; Yak. 3:6) Kanzhi muthu ane a tshinya vhaṅwe dzina, u amba zwithu zwi si zwone nga ha muṅwe muthu. Muthu ane a tshinya vhaṅwe dzina, u amba mazwifhi nga ha muṅwe muthu naho zwi tshi nga vhulayisa onoyo muthu. Ni songo hangwa uri vhaṅwe vhanna vho tshinya dzina ḽa Nabothe nga u amba mazwifhi nga hae, zwa ita uri a kanḓwe nga matombo u swikela a tshi fa. (1 Dzikh. 21:8-13) Samusi tshipiḓa tsha vhuvhili tsha Levitiko 19:16 tsho amba, muthu ane a tshinya vhaṅwe dzina a nga vhulayisa muṅwe muthu.

Zwiṅwe hafhu, muthu a nga tshinya muṅwe dzina ngauri u a mu vhenga. 1 Yohane 3:15 i ri: “Ane a vhenga wahawe ndi muvhulayi, ni a zwi ḓivha uri a hu na muvhulayi ane a ḓo wana vhutshilo vhu sa fheli.” Zwiṅwe hafhu, musi Mudzimu o no ri: “U songo vhulayisa muṅwe muthu,” o dovha a ri: “U songo vhenga wahau mbiluni yau.”—Lev. 19:17.

Ndi ngazwo mulayo u songo ḓoweleaho u re kha Levitiko 19:16 u tshi khou kaidza Vhakriste. Ri tea u iledza mihumbulo mivhi nahone ri songo tshinya vhaṅwe dzina. Nga maṅwe maipfi, ri nga “vhulayisa muṅwe muthu” arali ra thoma u sa mu takalela kana ra mu itela vivho, zwa vho ita uri ri mu tshinye dzina nahone zwenezwo zwi ḓo vha zwi tshi khou sumbedza uri ri a mu vhenga. Vhakriste a vho ngo tea u vhenga muthu.—Mat. 12:36, 37.