1. (a) Yehova o ri ṋea fhulufhelo ḽifhio? (b) Zwi amba mini u “fhulufhela Yehova”? (Vhalani “Ṱhalutshedzelo Ya Maipfi.”)

 YEHOVA o ṋea vhoṱhe vhane vha mu funa fhulufhelo ḽavhuḓi. Hu si kale, u ḓo fhelisa malwadze, maṱungu na lufu. (Nzumb. 21:3, 4) U ḓo thusa “vho vuḓaho” vhane vha mu fhulufhela uri vha ite uri ḽifhasi ḽi vhe pharadiso. (Ps. 37:9-11) U ḓo dovha a ita uri zwi konadzee uri ri vhe na vhushaka havhuḓi nae vhune ha fhira vhune ra vha naho nae zwino. Ndi fhulufhelo ḽavhuḓi vhukuma. Fhedzi ndi ngani ri tshi tenda uri zwe Mudzimu a fhulufhedzisa zwi ḓo itea? Yehova u dzula a tshi ita zwoṱhe zwine a fhulufhedzisa. Ndi ngazwo ri tshi nga “fhulufhela Yehova.” * (Ps. 27:14) Ri zwi sumbedza nga u lindela Mudzimu a tshi ita zwe a fhulufhedzisa ri sa fheli mbilu nahone ro takala.—Yes. 55:10, 11.

2. Yehova o no ita mini?

² Yehova o no ḓi zwi sumbedza uri u a ita zwe a fhulufhedzisa. Kha ri vhone iṅwe tsumbo i mangadzaho. Kha bugu ya Nzumbululo, Yehova o fhulufhedzisa uri tshifhingani tshashu u ḓo ita uri vhathu vhane vha bva kha tshaka dzo fhambanaho na vhane vha amba nyambo dzi sa fani vha mu shumele nga vhuthihi. Ṋamusi vhenevha vhathu vha vhidzwa “gogo ḽihulu.” (Nzumb. 7:9, 10) Naho kha tshenetshi tshigwada hu na vhanna, vhafumakadzi na vhana vha bvaho kha zwipiḓa zwoṱhe zwa ḽifhasi, vha na mulalo na vhuthihi. (Ps. 133:1; Yoh. 10:16) Vha gogo ḽihulu vha dovha vha huwelela nga u fhisea. Vha  dzula vho lugela u vhudza vhane vha ṱoḓa u thetshelesa nga ha fhulufhelo ḽa shango ḽa khwine. (Mat. 28:19, 20; Nzumb. 14:6, 7; 22:17) Arali ni tshipiḓa tsha gogo ḽihulu, zwi tou pfala uri ni a takalela ḽeneḽi fhulufhelo ḽa uri zwithu zwi ḓo vha khwine.

3. Saṱhane u ṱoḓa u ita mini?

³ Diabolo ha ṱoḓi ni tshi vha na fhulufhelo nga ha vhumatshelo. U ṱoḓa ni tshi tenda uri Yehova ha na ndavha na inwi na uri ha nga ḓo ita zwe a ni fhulufhedzisa. Arali Saṱhane a ita uri ri si tsha vha na fhulufhelo, ri nga kulea nungo nahone ra litsha na u shumela Yehova. Samusi ri tshi ḓo zwi vhona, Diabolo o lingedza u ita uri Yobo a si tsha vha na fhulufhelo na u ita uri a litshe u shumela Yehova.

4. Ri ḓo amba nga ha mini kha ino thero? (Yobo 1:9-12)

⁴ Kha ino thero, ri ḓo amba nga ha uri Saṱhane o lingedza hani u ita uri Yobo a si tsha fhulufhedzea kha Yehova. (Vhalani Yobo 1:9-12.) Ri ḓo amba na nga ha zwine ra zwi guda kha Yobo na uri ndi ngani ri tshi tea u humbula uri Mudzimu u a ri funa na uri u ḓo ita zwe a fhulufhedzisa.

5-6. Ndi mini zwe zwa itea kha Yobo nga tshifhinga tshiṱuku?

⁵ Yobo o vha a tshi khou ḓiphiṋa nga vhutshilo. O vha e na vhushaka havhuḓi na Yehova. O vha e na muṱa muhulwane u re na vhuthihi nahone o vha o pfuma vhukuma. (Yobo 1:1-5) Fhedzi o xelelwa nga vhunzhi ha zwenezwo zwithu nga ḓuvha ḽithihi. O thoma nga u xelelwa nga lupfumo lwawe. (Yobo 1:13-17) Na vhana vhawe vhoṱhe vhe a vha a tshi vha funa vha lovha. Humbulani nga ha zwithu zwo mu welaho. Musi vhabebi vha tshi lovhelwa nga ṅwana, zwi a vha vhaisa vhukuma. Humbulani nḓila ye Yobo na mufumakadzi wawe vha ṱungufhala na u hanganea ngayo musi vha tshi pfa uri vhana vhavho vhoṱhe vha fumi vho lovha. Ndi ngazwo Yobo o kherukanya zwiambaro zwawe a tshi khou lila, a fhedza a wela fhasi!—Yobo 1:18-20.

⁶ Nga murahu ha zwenezwo, Saṱhane o ita uri Yobo a vhe na vhulwadze vhu vhavhaho na vhu shonisaho. (Yobo 2:6-8; 7:5) Musi zwenezwo zwi sa athu u itea, vhathu vho vha vha tshi ṱhonifha Yobo. Vho vha vha tshi ya khae musi vha tshi ṱoḓa nyeletshedzo. (Yobo 31:18) Zwino vho vha vha sa ṱoḓi na u mu vhona. Mashaka awe, khonani dzawe na vhashumeli vhawe vho mu ṱamba!—Yobo 19:13, 14, 16.

7. (a) Yobo o vhona u nga ndi ngani a tshi khou tambula, fhedzi ndi mini zwe a si zwi ite? (b) Samusi zwo sumbedzwa kha tshifanyiso, Mukriste a nga sedzana na milingo ifhio?

⁷ Saṱhane o vha a tshi khou ṱoḓa uri Yobo a vhone u nga u khou tambula ngauri Yehova o mu sinyutshela. Sa tsumbo, Saṱhane o ita uri hu ḓe ḓumbu ḽi wise nnḓu ye vhana vha fumi vha Yobo vha vha vho dzula vha tshi khou ḽa vhe khayo. (Yobo 1:18, 19) O dovha a ita uri mulilo u bve ṱaḓulu u fhise zwifuwo zwa Yobo na vhalisa vhazwo. (Yobo 1:16) Ngauri ḽeneḽo ḓumbu na mulilo zwo vha zwi tshi khou bva ṱaḓulu, Yobo o vhona u nga zwi khou bva kha Yehova. Zwenezwo zwo ita uri Yobo a tende uri o sinyusa Yehova. Naho zwo ralo, Yobo ho ngo sema Khotsi awe wa ṱaḓulu. Yobo o tenda uri Yehova o mu ṋea zwithu zwinzhi zwavhuḓi vhutshiloni hawe. A humbula uri arali a tshi ṱanganedza zwithu zwavhuḓi zwi bvaho kha Yehova, u tea u ṱanganedza na zwi si zwavhuḓi. A ri: “Dzina ḽa Yehova nga ḽi bvele phanḓa ḽi tshi rendwa.” (Yobo 1:20, 21; 2:10) Yobo o dzula a tshi fhulufhedzea kha Yehova naho o xelelwa nga lupfumo, vhana nahone a si tsheena mutakalo wavhuḓi. Fhedzi Saṱhane o vha a sa athu u fhedza ngae.

8. Saṱhane o shumisa vhukwila vhufhio kha Yobo?

 ⁸ Saṱhane o dovha a shumisa vhuṅwe vhukwila kha Yobo. Saṱhane o shumisa vhathu vhararu vhe vha ḓiita u nga vha khonani dza Yobo uri vha ite uri Yobo a ḓipfe e si tshithu. Vhenevha vhanna vho amba uri Yobo u khou tambula ngauri o ita vhukhakhi vhunzhi. (Yobo 22:5-9) Vho lingedza na u ita uri Yobo a tende uri Mudzimu o vha a si na ndavha na zwithu zwinzhi zwavhuḓi zwe a zwi ita. (Yobo 4:18; 22:2, 3; 25:4) Vho vha vha tshi khou lingedza u ita uri Yobo a vhone u nga Mudzimu ha mu funi, uri ha nga ḓo mu ṱhogomela na uri u mu shumela a zwi vhuyedzi nga tshithu. Zwe vha zwi amba zwo vha zwi tshi nga ita uri Yobo a vhone u nga a hu na fhulufhelo ḽa uri zwithu zwi ḓo vhuya zwa luga.

9. Ndi mini zwo thusaho Yobo uri a vhe na tshivhindi na u dzula o khwaṱha?

⁹ Vhonani Yobo nga iṱo ḽa muhumbulo o dzula miḽorani a tshi khou pfa vhuṱungu. (Yobo 2:8) Khonani dzawe dzi dzulela u mu vhudza uri ha muthu wavhuḓi na uri zwoṱhe zwe a vhuya a zwi ita a si tshithu. Milingo yawe yo vha i tshi khou mu lemela vhukuma ngeno a tshi khou ḽa mbilu nge a lovhelwa nga vhana vhawe. Musi khonani dzawe dzi tshi khou amba, Yobo o thoma a sa khou fhindula. (Yobo 2:13–3:1) Arali vhenevho vhanna vhane vha khou ḓiita khonani dza Yobo vha tshi vhona u nga Yobo o fhumula ngauri u ṱoḓou ṱutshela Yehova, vho rwa fhasi. Hu swika tshifhinga tshine Yobo a fhindula khonani dzawe, khamusi u amba navho o tou vha sedza maṱoni. A vha vhudza uri: “Ndi ḓo dzula ndi tshi fhulufhedzea u swika ndi tshi fa!” (Yobo 27:5) Ndi mini zwo thusaho Yobo uri a vhe na tshivhindi tsho raloho na uri a dzule o khwaṱha naho a tshi khou tambula? Naho o vha o kulea nungo vhukuma, ho ngo litsha u fhulufhela uri Mudzimu wawe ane a mu funa u ḓo mu thusa. O vha a tshi zwi ḓivha uri naho  a nga lovha, Yehova u ḓo mu vusa.—Yobo 14:13-15.

10. Mafhungo a Yobo a ri gudisa mini?

¹⁰ Mafhungo a Yobo a ri gudisa uri Saṱhane a nga si kone u ri kombetshedza uri ri litshe u shumela Yehova na uri Yehova u vhona zwoṱhe zwine zwa itea kha riṋe. Zwe zwa itea kha Yobo zwi nga dovha zwa ri thusa uri ri kone u pfesesa mafhungo nga vhuḓalo. Kha ri vhone uri ri nga guda mini kha Yobo.

11. Arali ra dzula ri tshi fhulufhela Yehova, ri nga vha na vhungoho ha mini? (Yakobo 4:7)

¹¹ Yobo o zwi sumbedza uri arali ra dzula ri tshi fhulufhela Yehova, ri nga kona u konḓelela mulingo naho u ufhio nahone ri nga kona u lwa na Saṱhane. Musi ri tshi ita zwenezwo, hu ḓo itea mini? Bivhili i ri vhudza uri Diabolo u ḓo ri shavha.—Vhalani Yakobo 4:7.

12. Yobo o khwaṱhiswa hani nga fhulufhelo ḽa mvuwo?

¹² Ri tea u vha na lutendo lwo khwaṱhaho kha fhulufhelo ḽa mvuwo. Samusi ro zwi amba kha thero yo fhiraho, Saṱhane u shumisa u ofha lufu u ita uri ri litshe u fhulufhedzea kha Yehova. Musi zwi tshi ḓa kha Yobo, Saṱhane o amba uri a nga litsha na u shumela Yehova a tshi itela u ḓitshidza. Saṱhane o vha a tshi khou ḓifhura nga murunzi wa ningo. Yobo o dzula a tshi fhulufhedzea kha Yehova naho o vha a tshi khou vhona u nga u ḓo fa. Tshe tsha mu thusa u konḓelela ndi u fhulufhela uri Yehova ndi wavhuḓi na u fhulufhela uri Yehova u ḓo lugisa zwithu. Yobo o vha a tshi tenda uri arali Yehova a sa lugisa mafhungo musi a tshi kha ḓi tshila, o vha a tshi ḓo mu vusa tshifhingani tshi ḓaho. Yobo o vha a tshi tenda uri vhafu vha ḓo vuswa zwa vhukuma. Arali ri tshi tenda uri vhafu vha ḓo vuswa, a ri nga litshi u fhulufhedzea kha Yehova nga nṱhani ha u ofha u fa.

13. Ndi ngani ri tshi tea u ḓivha vhukwila he Saṱhane a vhu shumisa kha Yobo?

¹³ Ri tea u ḓivha vhukwila he Saṱhane a vhu shumisa kha Yobo ngauri u kha ḓi shumisa vhukwila vhu fanaho na ṋamusi. Ṱhogomelani zwe Saṱhane a zwi amba. O ri: “Muthu [hu si Yobo fhedzi] a nga bvisa zwoṱhe zwine a vha nazwo uri a tsireledze vhutshilo hawe.” (Yobo 2:4, 5) Zwavhuḓivhuḓi, Saṱhane o vha a tshi khou amba uri a ri funi Yehova zwa vhukuma na uri ri ḓo mu ṱutshela u itela u ḓitshidza. Saṱhane o dovha a amba uri na Mudzimu ha ri funi nahone ha dzhieli nṱha zwine ra zwi ita u itela u mu takadza. Fhedzi riṋe a ri tendi eneo mazwifhi ngauri ri a ḓivha vhukwila ha Saṱhane.

14. Milingo i nga ri ṋea tshibuli tsha u ita mini? Ṋeani tsumbo.

¹⁴ Musi ri tshi ṱangana na milingo, ri nga zwi dzhia sa tshibuli tshine ra nga tshi shumisa u itela u ḓiḓivha khwine. Milingo ye Yobo a ṱangana nayo yo mu thusa uri a ḓivhe vhushayanungo hawe na u vhu lugisa. Sa tsumbo, o zwi vhona uri u tea u shumela kha u ḓiṱukufhadza nga ho engedzeaho. (Yobo 42:3) Na riṋe ri nga ḓiḓivha khwine musi ro ṱangana na mulingo. Vho Nikolay * vhe vha valelwa dzhele naho vhe na thaidzo dza mutakalo, vho ri: “Tshifhinga tsha musi ndo valelwa dzhele tsho nthusa uri ndi kone u ṱhogomela vhushayanungo vhune nda khou tea u shumela khaho.” Musi ri tshi ṱhogomela uri ri na vhushayanungo vhukene, ri nga kona u shumela kha u vhu lugisa.

15. Ri tea u thetshelesa nnyi nahone ndi ngani?

¹⁵ Ri tea u thetshelesa Yehova, hu si maswina ashu. Yobo o thetshelesa nga vhuronwane musi Yehova a tshi amba nae. Mudzimu o vhudzisa Yobo mbudziso dzi tevhelaho u itela u  mu thusa uri a vhone uri u na ndavha nae: ‘Naa u a vhona maanḓa anga kha tsiko? Ndo vhona zwoṱhe zwe zwa itea kha iwe. Naa u vhona u nga ndi nga si kone u u ṱhogomela?’ Yobo a tshi fhindula o sumbedza uri u a ḓiṱukufhadza na u livhuwa vhuḓi ha Yehova. O ri: “Nḓevhe dzanga dzo pfa nga ha iwe, fhedzi zwino iwe ndi u vhona nga maṱo anga.” (Yobo 42:5) Musi Yobo a tshi amba eneo maipfi, khamusi o vha a tshi kha ḓi vha o dzula miḽorani, muvhili wawe wo ḓala zwilonda nahone a tshi kha ḓi lilela vhana vhawe vho lovhaho. Naho zwo ralo, Yehova o khwaṱhisedza Yobo uri u kha ḓi mu funa na uri u a mu takalela.—Yobo 42:7, 8.

16. U ya nga Yesaya 49:15, 16, ri tea u humbula mini musi ri tshi ṱangana na milingo?

¹⁶ Na ṋamusi, vhathu vha nga ri sema na u ri dzhia ri si tshithu. Vha nga lingedza u tshinya dzina ḽashu kana ḽa ndangulo ya Yehova na u ri “pomoka vhuvhi hoṱhe” ngeno vha tshi khou zwifha. (Mat. 5:11) Mafhungo a Yobo a ri gudisa uri Yehova u fhulufhela uri ri ḓo dzula ri tshi fhulufhedzea khae musi ri tshi sedzana na milingo. Yehova u a ri funa nahone a nga si vhuye a laṱa vhane vha mu fhulufhela. (Vhalani Yesaya 49:15, 16.) Ni songo thetshelesa mazwifhi ane a ambiwa nga maswina a Mudzimu vha tshi itela u tshinya dzina ḽa vhashumeli vha Mudzimu. Vho James vha ngei Turkey, vhe muṱa wavho wa sedzana na milingo i vhavhaho, vha ri: “Ro zwi vhona uri arali ra thetshelesa mazwifhi ane a ambiwa nga ha vhathu vha Mudzimu zwi ḓo ri kula nungo. Ro livhisa ṱhogomelo kha zwine Muvhuso wa Mudzimu wa fhulufhedzisa u ri itela  zwone tshifhingani tshi ḓaho na u dzula ro farakanea tshumeloni ya Yehova. Zwenezwo zwo ita uri ri dzule ro takala.” Ri thetshelesa Yehova u fana na Yobo. Mazwifhi ane maswina ashu a a amba ha iti uri ri si tsha vha na fhulufhelo.

17. Ni guda mini kha vhanna na vhafumakadzi vha fhulufhedzeaho vho ambiwaho kha Vhahevheru ndima 11?

¹⁷ Yobo ndi muṅwe kha vhashumeli vha Yehova vhanzhi-vhanzhi vhe vha vha na tshivhindi na u dzula vho khwaṱha musi vhe milingoni i vhavhaho. Musi muapostola Paulo a tshi ṅwala vhurifhi vhu yaho kha Vhahevheru, o amba nga ha vhaṅwe vhanzhi a ri vha ‘gole ḽa dziṱhanzi.’ (Vhahev. 12:1) Vhoṱhe vho sedzana na milingo i konḓaho, fhedzi vho dzula vha tshi fhulufhedzea kha Yehova vhutshiloni havho hoṱhe. (Vhahev. 11:36-40) Naa vho konḓelela milingo na u ita vhuḓidini mahala? Na khathihi! Vho bvela phanḓa vha tshi fhulufhela Yehova naho vho fa hu sa athu u itea zwoṱhe zwe Mudzimu a fhulufhedzisa. Nahone vho vha vhe na vhungoho ha uri vha ḓo vhona hu tshi itea zwe Mudzimu a fhulufhedzisa ngauri vho vha vha tshi zwi ḓivha uri u a vha takalela. (Vhahev. 11:4, 5) Tsumbo yavho i nga ri thusa uri ri ḓiimisele u bvela phanḓa ri tshi fhulufhela Yehova.

18. No ḓiimisela u ita mini? (Vhahevheru 11:6)

¹⁸ Shango ḽine ra tshila khaḽo ḽi khou ṋaṋa u vhifha ḽi tshi ya. (2 Tim. 3:13) Saṱhane u kha ḓi ḓo bvela phanḓa a tshi linga vhathu vha Mudzimu. Naho ri tshi kha ḓi ḓo sedzana na milingo, kha ri bvele phanḓa ri tshi shumela Yehova nga nungo dzashu dzoṱhe ri na vhungoho ha uri ro “fhulufhela Mudzimu a tshilaho.” (1 Tim. 4:10) Ni songo hangwa uri nḓila ye Mudzimu a fhedzisela o fhaṱutshedza ngayo Yobo i sumbedza uri “Yehova u na lufuno luhulu na khathutshelo.” (Yak. 5:11) U nga ri na riṋe ri nga dzula ri tshi fhulufhedzea kha Yehova, ri na vhungoho ha uri u ḓo lambedza “vhane vha mu ṱoḓa zwi tshi bva mbiluni.”—Vhalani Vhahevheru 11:6.