1-2. Ri fanela u ita mini uri Yehova a takalele nḓila ine ra mu gwadamela ngayo?

 MUSI hu tshi pfi muthu u khou gwadamela Yehova, ndi mini zwine zwa ḓa muhumbulo waṋu? Khamusi ni humbula nga ha muthu ane a gwadama a tshi rabela, a amba na Yehova musi a sa athu u eḓela. Kana khamusi ni humbula nga ha muṱa wo takalaho une wa ḓiphiṋa nga u guda Bivhili kha Vhurabeli ha Muṱa.

² Kha dzenedzi tsumbo mbili, ri nga amba uri vhoṱhe vha khou gwadamela Yehova. Naa Yehova u ḓo takalela nḓila ine vha khou mu gwadamela ngayo? U ḓo zwi takalela arali vha tshi khou lingedza u ita zwine a zwi funa nahone vha tshi khou zwi itiswa ngauri vha a mu funa na u mu ṱhonifha. Ri funa Yehova nga maanḓa. Ri a zwi ḓivha uri ndi ene ane ra tea u mu gwadamela nahone ri ṱoḓa u zwi ita nga nḓila ya khwinesa.

3. Ri ḓo amba nga ha mini kha ino thero?

³ Kha heyi thero, ri ḓo amba nga ha nḓila ye Yehova a vha a tshi ṱoḓa u gwadamelwa ngayo zwifhingani zwa Bivhili. Ri ḓo dovha ra guda nga ha nḓila dza malo dzine Yehova a ṱoḓa ri tshi mu gwadamela ngadzo ṋamusi. Zwenezwi zwi ḓo ri thusa uri ri humbulisise nga ha nḓila ine ra nga khwinisa ngayo nḓila ine ra mu gwadamela ngayo. Zwiṅwe hafhu, ri ḓo guda uri u gwadamela Yehova nga nḓila yo teaho zwi ita hani uri ri takale.

4. Vhathu vhe vha vha vha tshi gwadamela Yehova vho sumbedza hani uri vho vha vha tshi mu funa na u mu ṱhonifha?

⁴ Vhanna vha fhulufhedzeaho vha ngaho Abele, Noaxe, Abrahamu na Yobo vho sumbedza uri vha funa Yehova na u mu ṱhonifha. Vho zwi itisa hani? Vho thetshelesa Mudzimu, vha vha na lutendo na u mu ṋekedza zwiṱhavhelo. Bivhili a i ri vhudzi zwithu zwoṱhe zwe vha vha vha tshi tea u zwi ita. Fhedzi vho ita zwoṱhe zwine vha nga kona u itela u hulisa Yehova, ndi ngazwo o takalela nḓila ine vha mu gwadamela ngayo. Nga murahu, Yehova o ṋea Vhaisiraele Mulayo wa Mushe. Yeneyi milayo yo vha i tshi amba nga ha nḓila dzine a ṱoḓa vha tshi mu gwadamela ngadzo.

5. Yehova o vha a tshi ṱoḓa uri vhatevheli vha Yesu vha mu gwadamele hani?

⁵ Musi Yesu o no fa na u vuswa, Yehova ho ngo tsha lavhelela uri vhathu vha mu gwadamele vha tshi tevhedza Mulayo wa Mushe. (Vharoma 10:4) Vhakriste vho vha vha tshi khou tea u tevhedza mulayo muswa une wa vha “mulayo wa Kristo.” (Vhagal. 6:2) Vho vha vha tshi tea u edzisa Yesu na u ita zwe a funza u itela u tevhedza wonoyu “mulayo,” hu si nga u u rwela ngomani na nga u tevhedza milayo minzhi-minzhi yo ṅwaliwaho. Na ṋamusi, Vhakriste vha ita zwoṱhe zwine vha nga kona u itela u tevhela Yesu uri vha kone u takadza Yehova na uri vha “homolosw[e].”​—Mat. 11:29.

6. Ino thero i ḓo ri thusa hani?

⁶ Musi ri tshi haseledza nḓila dzo fhambanaho dzine ra nga gwadamela ngadzo Yehova, ḓivhudziseni uri: ‘Nṋe ndi khou itisa hani kha zwenezwi? Naa ndi nga khwinisa kha nḓila ine nda khou gwadamela Yehova ngayo?’ A zwo ngo khakhea u takalela zwine na khou ita zwino, fhedzi ni tea u humbela Yehova uri a ni thuse u vhona hune na nga khwinisa hone.

7. Yehova u ḓipfa hani nga thabelo dzashu dzi bvaho mbiluni?

⁷ Ri gwadamela Yehova nga u mu rabela. Bivhili i fanyisa thabelo dzashu na zwioro zwo lugiselelwaho zwavhuḓi zwe zwa vha zwi tshi ṋekedzwa denndeni ḽikhethwa na zwe zwa ṋekedzwa thembeleni nga murahu. (Ps. 141:2) Zwenezwi zwioro zwo vha zwi tshi nukhelela kha Mudzimu. Na thabelo dzashu dzi bvaho mbiluni dzi a mu “takadza,” na musi ri tshi khou amba nae nga maipfi a leluwaho. (Mir. 15:8; Dot. 33:10) Ri na zwiitisi zwi pfalaho zwa u tenda uri Yehova u ṱoḓa u ri pfa ri tshi mu vhudza nḓila ine ra mu funa na u mu livhuwa ngayo. U ṱoḓa ri tshi mu vhudza zwine zwa ri vhilaedzisa, zwine ra zwi fhulufhela na zwine ra zwi tama. Musi ni sa athu u amba na Yehova nga thabelo, zwi ḓo vha zwavhuḓi uri ni humbulisise nga ha zwine na ḓo zwi amba. Zwenezwo zwi ḓo ita uri ni ṋekedze “zwioro” zwa khwinesa kha Khotsi aṋu wa ṱaḓulu.

8. Ri na zwibuli zwifhio zwa u renda Mudzimu?

⁸ Ri gwadamela Yehova nga u mu renda. (Ps. 34:1) Musi ri tshi vhudza vhaṅwe nḓila ine ra funa na u tama ngayo zwine a vha zwone na zwe a zwi ita, ri vha ri tshi khou renda Yehova. Arali ri tshi livhuwa zwe Yehova a ri itela zwone, ri ḓo vha na zwithu zwinzhi zwavhuḓi zwa u amba nga hae. Ri ḓo vha na zwiitisi zwinzhi zwa u renda Yehova arali ra humbula nga ha zwithu zwoṱhe zwavhuḓi zwe a ri itela zwone. Musi ri tshi shela mulenzhe kha u huwelela, zwi ri ṋea tshibuli tsha u renda Mudzimu, ‘zwenezwi zwi tou nga tshiṱhavhelo tshine ra tshi ṋekedza Mudzimu ri tshi  khou shumisa milomo yashu.’ (Vhahev. 13:15) Samusi ri tshi tea u humbulisisa musi ri sa athu u amba na Yehova nga thabelo, na musi ri tshi ya tsimuni ri tea u humbulisisa nga ha zwine ra ḓo zwi amba. Ri ṱoḓa uri “tshiṱhavhelo” tshashu tshi vhe tsha khwinesa. Ndi ngazwo ri tshi huwelela nga u fhisea.

9. Ri vhuyelwa hani nga u vha hone miṱanganoni u fana na Vhaisiraele? Ṋeani tsumbo ya nḓila ye miṱangano ya ni thusa ngayo.

⁹ Ri gwadamela Yehova nga u vha hone miṱanganoni. Yehova o vhudza Vhaisiraele uri: “Vhanna vhoṱhe vha fanela u ḓa luraru phanḓa ha Yehova Mudzimu wau fhethu he a hu nanga.” (Dot. 16:16) Vho vha vha tshi tea u sia nnḓu dzavho na masimu avho hu si na ane a khou zwi linda. Fhedzi Yehova o vha fhulufhedzisa uri: “A hu na muthu ane a ḓo lingedza u dzhia shango ḽau musi u tshi ya phanḓa ha Yehova Mudzimu wau.” (Ek. 34:24) Vhaisiraele vho ya kha vhuṱambo ha ṅwaha muṅwe na muṅwe ngauri vho vha vha tshi fhulufhela Yehova. Zwenezwi zwo vha vhuyedza vhukuma. Sa tsumbo, vho guda mulayo wa Mudzimu nga ho engedzeaho, vho humbula zwithu zwavhuḓi zwe Yehova a vha itela zwone nahone vho ḓiphiṋa nga u ṱwa na vhaṅwe vhane vha funa Yehova. (Dot. 16:15) Na riṋe ri vhuyelwa nga nḓila dzi fanaho musi ri tshi ita zwine ra nga kona uri ri vhe hone miṱanganoni. A ri tsha amba nga ha nḓila ine Yehova a takala ngayo musi ri tshi ya miṱanganoni ro lugiselela phindulo pfufhi dzine dza ṱuṱuwedza.

10. Ndi ngani ri tshi nga amba uri u imba ndi iṅwe nḓila ya ndeme ya u gwadamela Yehova?

¹⁰ Ri gwadamela Yehova nga u mu imbela. (Ps. 28:7) Vhaisiraele vho vha vha tshi dzhiela nṱha u imba. Vho vha vha tshi zwi dzhia sa iṅwe nḓila ya ndeme ya u gwadamela Yehova. Khosi Davida o vhea Vhalevi vha 288 uri vha imbe thembeleni. (1 Koron. 25:1, 6-8) Ṋamusi, ri nga sumbedza nḓila ine ra funa ngayo Mudzimu nga u mu imbela nyimbo dza u mu renda. A zwi ṱoḓei uri ri tou vha dziṋambi. Ṱhogomelani tsumbo i tevhelaho: Musi ri tshi amba, “ri a khakha lunzhi,” fhedzi a zwi iti uri ri si tsha amba tshivhidzoni na musi ri tsimuni. (Yak. 3:2) Nga hu fanaho, ri nga renda Yehova nga nyimbo naho ri si dziṋambi.

11. U ya nga Phisalema 48:13, ndi ngani ri tshi tea u ḓiṋea tshifhinga tsha u guda Bivhili sa muṱa?

¹¹ Ri gwadamela Yehova nga u guda Bivhili na nga u funza vhana vhashu nga hae. Vhaisiraele vho vha vha sa shumi nga Savhatha. Ḽo vha ḽi ḓuvha ḽa u khwaṱhisa vhushaka havho na Yehova. (Ek. 31:16, 17) Vhathu vha fhulufhedzeaho vho vha vha tshi gudisa vhana vhavho nga ha Yehova na nga zwithu zwavhuḓi zwe a vha itela zwone. Na riṋe ri tea u ḓiṋea tshifhinga tsha u vhala na u guda Ipfi ḽa Mudzimu. Ndi iṅwe nḓila ya u gwadamela Yehova nahone i ri thusa uri ri sendele tsini nae. (Ps. 73:28) Nahone musi ri tshi guda Bivhili sa muṱa, ri nga thusa vhana vhashu uri vha vhe na vhushaka ha tsini na Khotsi ashu wa ṱaḓulu ane a ri funa.​—Vhalani Phisalema 48:13.

12. Ri guda mini kha nḓila ye Yehova a dzhia ngayo mushumo wa u ita dennde ḽikhethwa na zwishumiswa zwaḽo?

¹² Ri gwadamela Yehova nga u fhaṱa na u ṱhogomela zwifhaṱo zwa ndangulo. Bivhili i amba uri mushumo wa u ita dennde ḽikhethwa na zwishumiswa zwaḽo wo vha u “mushumo mukhethwa.” (Ek. 36:1, 4) Na ṋamusi, Yehova u dzhia mushumo wa u fhaṱa zwifhaṱo zwa ndangulo sa iṅwe nḓila ya u mu gwadamela. Vhaṅwe vhahashu vha fhedza tshifhinga tshinzhi vha tshi khou ita yeneyi mishumo. Naa a ri dzhieli nṱha zwine vha khou zwi ita u itela u tikedza mushumo wa u huwelela? Vha a shela mulenzhe na kha mushumo wa u huwelela. Khamusi vhaṅwe vhavho vha ṱoḓa u vha vhavulanḓila. Vhahulwane vha nga sumbedza  uri vha tikedza mushumo wa u fhaṱa nga u tendela vhenevha vhahashu vhane vha vha vhashumi vha biko uri vha vhe vhavulanḓila musi vha tshi fanelea. Roṱhe ri nga shela mulenzhe kha u ita uri zwenezwo zwifhaṱo zwi dzule zwo kuna nahone zwi kha vhuimo havhuḓi, hu sa londwi uri ri na vhutsila kha zwa u fhaṱa kana a ri na.

13. Ri tea u ḓipfa hani nga ha u ṋeela u itela u tikedza mushumo wa u huwelela?

¹³ Ri gwadamela Yehova nga u ṋeela u itela u tikedza mushumo wa u huwelela. Vhaisiraele vho vha vha songo tendelwa u ḓa phanḓa ha Yehova vha songo fara tshithu. (Dot. 16:16) Vho vha vha tshi tea u ḓisela Yehova tshifhiwa zwi tshi ya nga zwine vha zwi kona. Zwenezwi zwo vha zwi tshi ḓo sumbedza uri vha livhuwa zwoṱhe zwe Yehova a vha a tshi khou vha itela zwone. Ri nga sumbedza hani uri ri funa Yehova na uri ri livhuwa zwoṱhe zwine a khou ri itela zwone? Iṅwe nḓila ndi nga u ṋeela u ya nga zwine ra zwi kona u itela u tikedza tshivhidzoni na kha mushumo wa u huwelela. Muapostola Paulo o ri: “Mudzimu u takalela tshifhiwa tshi bvaho mbiluni, ngauri u lavhelela uri muthu a ṋee zwine a nga kona, hu si zwine a si zwi kone.” (2 Vhakor. 8:4, 12) Yehova u a takala vhukuma musi ri tshi ṋeela, naho zwi si zwinzhi.​—Marko 12:42-44; 2 Vhakor. 9:7.

14. U ya nga Mirero 19:17, Yehova u ḓipfa hani musi ri tshi thusa vhahashu vha shayaho?

¹⁴ Ri gwadamela Yehova nga u thusa vhahashu vha shayaho. Yehova o fhulufhedzisa uri u ḓo fhaṱutshedza Vhaisiraele vhane vha thusa vha shayaho. (Dot. 15:7, 10) Musi ri tshi thusa wahashu a shayaho, zwi nga ri khou ṋea Yehova tshifhiwa. (Vhalani Mirero 19:17.) Sa tsumbo, musi Vhakriste vha Filipi vha tshi ṋea Paulo o valelwaho dzhele tshifhiwa, Paulo o amba uri tshenetsho tshifhiwa ndi tshiṱhavhelo “tshi takadzaho Mudzimu.” (Vhafil. 4:18) Humbulisisani nga ha vhathu vha tshivhidzoni tshaṋu, ni ḓivhudzise uri: ‘Naa hu na muthu ane nda nga mu thusa?’ Yehova u a takala vhukuma musi a tshi vhona ri tshi shumisa tshifhinga tshashu, nungo dzashu, vhukoni hashu na zwine ra vha nazwo u itela u thusa vha shayaho. Ndi iṅwe nḓila ine ra vha ri tshi khou mu gwadamela ngayo.​—Yak. 1:27.

15. Ndi ngani u gwadamela Yehova nga nḓila yo teaho hu si muhwalo, naho ri tshi tea u shumisa tshifhinga tshashu na nungo dzashu?

¹⁵ A si muhwalo u gwadamela Yehova nga nḓila yo teaho, naho ri tshi tea u shumisa tshifhinga tshashu na nungo dzashu. (1 Yoh. 5:3) Ndi ngani? Ndi ngauri ri gwadamela Yehova ngauri ri a mu funa. Kha ri ri ṅwana u khou ṱoḓa u ṋea khotsi awe tshifhiwa. A nga fhedza awara nnzhi a tshi khou vha olela tshifanyiso. Ha vhoni u nga o tambisa tshifhinga tshawe a tshi khou vha olela tshenetsho tshifanyiso. U a funa khotsi awe nahone u ṱoḓa u vha ṋea tshenetsho tshifhiwa. Na riṋe ri takalela u shumisa tshifhinga tshashu na nungo dzashu u itela u gwadamela Yehova ngauri ri a mu funa.

16. U ya nga Vhahevheru 6:10, Yehova u ḓipfa hani nga ha zwine ra zwi ita u itela u mu takadza?

¹⁶ Vhabebi a vha lavheleli uri vhana vhavho vha ḓo vha ṋea zwifhiwa zwi fanaho. Vha a zwi ḓivha uri vhana vhavho a vha na vhukoni vhu fanaho. Na Khotsi ashu wa ṱaḓulu u a ḓivha zwine muṅwe na muṅwe washu a kona u zwi ita. Khamusi ni kona u ita zwo engedzeaho u fhira vhaṅwe. Kana khamusi a ni koni u ita zwinzhi, zwi tshi itiswa ngauri ni mulala, ni na mutakalo u si wavhuḓi kana ni na vhuḓifhinduleli muṱani. Ni songo kulea nungo. (Vhagal.  6:4) Yehova ha nga hangwi zwine na khou mu itela zwone. U ḓo zwi takalela, tenda na vha ni tshi khou zwi ita nga nungo dzaṋu dzoṱhe nahone ni na zwiitisi zwavhuḓi. (Vhalani Vhahevheru 6:10.) Yehova u a ḓivha na zwine na tama u zwi ita. U ṱoḓa ni tshi fushea nga zwine na kona u mu itela zwone.

17. (a) Ri nga ita mini arali zwi tshi ri konḓela u gwadamela Yehova nga dziṅwe nḓila dze ra amba nga hadzo? (b) No vhuyelwa hani nga u gwadamela Yehova nga iṅwe ya nḓila dzi re kha tshifanyiso tshi re kha bogisi “ Zwine Zwa Ḓo Ita Uri Ni Takale Nga Ho Engedzeaho”?

¹⁷ Ri nga ita mini arali zwi tshi ri konḓela u ita zwiṅwe zwa zwithu zwe ra amba nga hazwo, zwi ngaho u guda Bivhili kana u huwelela? Musi ri tshi ita zwenezwi zwithu nga ho engedzeaho, ri ḓo takalela u zwi ita nga ho engedzeaho nahone zwi ḓo ri vhuyedza nga ho engedzeaho. Ri nga fanyisa nḓila ine ra gwadamela ngayo Yehova na u ita zwithu zwi ngaho u ita nyonyoloso kana u lidza kaṱara. Ri nga ri si kone u khwinisa arali ri tshi ita nyonyoloso nga zwiṅwe zwifhinga kana ri tshi lidza kaṱara nga zwiṅwe zwifhinga. Fhedzi hu nga itea mini arali ra zwi ita ḓuvha ḽiṅwe na ḽiṅwe? Khamusi ri nga thoma ri tshi fhedza tshifhinga tshiṱuku ri tshi khou zwi ita. Fhedzi nga u ya ha tshifhinga, ri nga kona u fhedza tshifhinga tshilapfu ri tshi khou zwi ita. Musi ri tshi vhona mvelelo dzavhuḓi kha zwine ra khou ita, ri ḓo sedza phanḓa kha u zwi ita nahone ri ḓo takalela u zwi ita. Zwo tou ralo na kha nḓila dzine ra nga gwadamela ngadzo Yehova.

18. Ndi tshifhio tshithu tsha ndemesa tshine ra nga tshi ita nahone ri ḓo vhuyelwa nga mini?

¹⁸ Tshithu tsha ndemesa tshine ra nga tshi ita, ndi u ita zwoṱhe zwine ra nga kona u itela u gwadamela Yehova. Zwenezwo zwi ḓo ita uri ri takale, ri fushee nahone ri vhe na fhulufhelo ḽa u gwadamela Yehova u ya nga hu sa fheli. (Mir. 10:22) A ri vhilaeli ngauri ri a zwi ḓivha uri Yehova u a ri thusa musi ri tshi sedzana na thaidzo. (Yes. 41:9, 10) Ri na zwiitisi zwavhuḓi zwa u takalela u gwadamela Khotsi ashu ane a ri funa o tewaho “nga vhugala na u huliswa” nga tsiko yawe yoṱhe.​—Nzumb. 4:11.