1. Anetshelani mafhungo a Bivhili ane a ombedzela nḓila ye vhathu vha Mudzimu vha ḓifhura ngayo. (Sedzani tshifanyiso tsha u thoma.)

ḼIṄWE ḓuvha nga matsheloni, Tshifhe Muhulu Aroni o vha o ima muṋangoni wa thembele ya Yehova, o fara ndongo dza zwioro zwa mulilo. Tsini nae, ho vha hu na Kora we a vha e na vhanna vha 250 na vhone vha tshi khou ṋekedza zwioro kha Yehova, muṅwe na muṅwe o fara ndongo yawe ya mulilo. (Num. 16:16-18) Musi u tshi tou hasha maṱo, vhenevho vhanna vhoṱhe vho vha vha tshi vhonala u nga ndi vhagwadameli vha Yehova vha fulufhedzeaho. Naho zwo ralo, vho vha vho fhambana na Aroni ngauri vhaṅwe vho vha vhe vhagunei vhane vha ḓihudza vhe vha lingedza u dzhia vhutshifhe. (Num. 16:1-11) Vho ḓifhura nga u humbula uri Mudzimu u ḓo ṱanganedza vhurabeli havho. Fhedzi tshenetsho tshilavhelelwa tsho vha tshi u nyadza Yehova, ane a kona u vhona mbilu na muhoyo wavho.—Yer. 17:10.

2. Ndi mini zwe Mushe a zwi amba hu tshee nga phanḓa, nahone naa maipfi awe o ḓadzea?

² Zwi swayeaho ndi uri nga tsha mulovha tsha hone, Mushe o vha o amba uri: “Matshelo Yehova u ḓo ri ḓivhisa ane a vha wawe.” (Num. 16:5) Vhukuma, Yehova a sumbedza phambano vhukati ha vhagwadameli vha ngoho na vha mazwifhi musi “[Kora na] vhanna vhaḽa vha maḓana mavhili a ná mahumi maṱanu vhe vha ṋekedza  zwioro vha ḽiwa nga mulilo we wa bva ha Yehova.” (Num. 16:35; 26:10) Nga tshenetsho tshifhinga, Yehova o tsireledza Aroni, zwe zwa sumbedza uri u tshifhe na mugwadameli wa ngoho wa Mudzimu.—Vhalani 1 Vhakorinta 8:3.

3. (a) Ndi vhuimo vhufhio he ha vha hone misini ya muapostola Paulo? (b) Ndi mini zwe Yehova a zwi ita kha mashandukwa a maḓanani a miṅwaha o fhiraho?

³ Vhuimo vhu fanaho ho dovha ha vha hone miṅwahani ya 1500 nga murahu ha zwenezwo, misini ya muapostola Paulo. Vhaṅwe vhathu vhe vha vha vha tshi ḓivhidza Vhakriste vho ḓidzhenisa kha pfunzo dza mazwifhi; fhedzi vha ḓi bvela phanḓa vha tshi ḓikonanya na tshivhidzo. Kha muthu a si na vhusedzi, vhenevho vhagunei vho vha vha tshi vhonala vha songo fhambana na vhaṅwe tshivhidzoni. Fhedzi vhugunei havho ho vha vhu na khombo kha Vhakriste vha fulufhedzeaho. Dzenedzo phele dzo ambaraho mikumba ya dzinngu dzo thoma u “fhelisa lutendo lwa vhaṅwe.” (2 Tim. 2:16-18) Naho zwo ralo, Yehova u na vhusedzi, nahone khamusi Paulo o vha a tshi ḓivha zwenezwi kha zwe Mudzimu a zwi ita kha mashandukwa—Kora na vhatikedzi vhawe—maḓanani a miṅwaha o fhiraho. Malugana na zwenezwi, kha ri ṱolisise mafhungo o ṅwalwaho Maṅwaloni nahone ri vhone zwine ra nga zwi guda khao.

4. Paulo o vha e na vhungoho ha mini, nahone o khwaṱhisedza hani Timotheo?

⁴ Paulo o vha e na vhungoho ha uri Yehova u ḓo kona u vhona vhurabeli ha muhoyo, nga hu fanaho o vha e na khwaṱhisedzo ya uri Yehova u ḓo kona u vhona vhane vha si mu thetshelese. Vhungoho ha Paulo ho vhonala nga maipfi e a a shumisa musi a tshi hevhedzwa uri a ṅwalele Timotheo. Nga murahu ha u ṱalusa nga ha khombo ya lwa muya ye vhagunei vha vha vha tshi khou i ḓisela vhaṅwe vhathu tshivhidzoni, Paulo o ṅwala uri: “Hu sa londwi zwenezwo, mutheo wa Mudzimu wo khwaṱhaho u ḓi dzula wo ima, u na luswayo lune lwa ri: ‘Yehova u a ḓivha vha re vhawe,’ na uri: ‘Vhoṱhe vhane vha vhidzelela dzina ḽa Yehova vha fanela u furalela zwi songo lugaho.’”—2 Tim. 2:18, 19.

5, 6. Ndi zwifhio zwi swayeaho kha maipfi e Paulo a a shumisa ane a ri “mutheo wa Mudzimu wo khwaṱhaho,” nahone zwenezwi zwo kwama hani Timotheo?

⁵ Ndi zwifhio zwi swayeaho kha maipfi a Paulo kha lwonolwu luṅwalo? Maipfi ane a ri “mutheo wa Mudzimu wo khwaṱhaho” o bulwa kha yeneyi ndimana fhedzi Bivhilini. Bivhili i shumisa ipfi “mutheo” u itela u fanyisa zwithu zwo fhamba-fhambanaho, u katela Yerusalema wa vhukuma sa muḓi wa Isiraele ḽa kale. (Ps. 87:1, 2) Mushumo we wa itwa nga Yesu kha ndivho ya Yehova na wone u vhambedzwa na mutheo. (1 Vhakor. 3:11; 1 Pet. 2:6) Paulo o vha a tshi khou humbula mini musi a tshi ṅwala nga ha “mutheo wa Mudzimu wo khwaṱhaho”?

⁶ Paulo o amba nga ha “mutheo wa Mudzimu wo khwaṱhaho” kha mafhungo e khao a redza maipfi a Mushe nga ha Kora na vhatevheli vhawe, o ṅwalwaho kha Numeri 16:5. Zwi vhonala u nga Paulo o vha a tshi khou ambela kha zwe zwa itea misini ya Mushe musi a tshi khou lingedza u ṱuṱuwedza Timotheo na u mu humbudza nga ha vhukoni ha Yehova ha u fhelisa zwiito zwa vhushandukwa. Ndivho ya Yehova yo vha i sa ḓo thivhelwa nga vhagunei tshivhidzoni samusi na Kora a songo kona u i thivhela maḓanani a miṅwaha nga phanḓa ha zwenezwo. Paulo ho ngo ṱalutshedza nga vhuḓalo zwine “mutheo wa Mudzimu wo khwaṱhaho” wa imela zwone. Fhedzi maipfi e a a shumisa o thusa Timotheo uri a fulufhele nḓila dza Yehova.

7. Ndi ngani ri tshi nga vha na vhungoho ha uri Yehova u ḓo ita zwithu nga nḓila yo lugaho na nga u fulufhedzea?

⁷ Maitele a Yehova mahulwane ha shanduki. Psalme ya 33:11 i ri: “A Yehova maano ha shanduki lini na lini; mihumbulo ya mbilu yawe ndi ya kale na kale.” Maṅwe maṅwalo a amba uri vhuvhusi ha Yehova, vhuthu, u luga na u fulufhedzea ndi zwa lini na lini. (Ek. 15: 18; Ps. 106:1; 112:9; 117:2) Maleaxi 3:6 i ri: “Nṋe Yehova a thi shanduki.” Nga hu fanaho, Yakobo 1:17 i amba uri Yehova ha “shanduki u fana na mirunzi i sudzuluwaho.”

8, 9. Ndi ngudo ifhio ine ra i guda kha “luswayo” lwa tshifanyiso tsha Paulo?

⁸ Tshifanyiso tsha Paulo tsho ṅwalwaho kha 2 Timotheo 2:19 tshi sumbedza mutheo une wa vha na mulaedza, zwa tou nga hu na luswayo lwo ṅwalwaho khawo. Zwifhingani zwa kale, zwo vha zwo ḓowelea uri hu vhe na muṅwalo kha mutheo wa tshifhaṱo, khamusi une wa sumbedza mufhaṱi kana muṋe watsho. Paulo ndi ene muṅwali wa Bivhili wa u thoma u shumisa tshenetshi tshifanyiso. * Luswayo lwa “mutheo wa Mudzimu wo khwaṱhaho” lu ṱalusa zwithu zwivhili. Tsha u thoma, “Yehova u a ḓivha vha re vhawe,” tsha vhuvhili, “Vhoṱhe vhane vha vhidzelela dzina ḽa Yehova vha fanela u furalela zwi songo lugaho.” Zwenezwi zwi ri humbudza zwine ra zwi vhala kha Numeri 16:5.—Vhalani.

⁹ Ndi ngudo ifhio ine ra i guda kha “luswayo” lwa tshifanyiso tsha Paulo? Kha vhane vha vha vha Mudzimu, zwilinganyo na maitele a Yehova zwi nga nweledzwa nga ngoho mbili dza ndeme: (1) Yehova u funa vhane vha fulufhedzea khae, nahone (2) Yehova u vhenga zwi songo lugaho. Yeneyi ngudo i tshimbidzana hani na mafhungo a vhagunei tshivhidzoni?

10. Zwiito zwa vhagunei zwo kwama hani vhaṅwe vha fulufhedzeaho misini ya Paulo?

¹⁰ Zwi vhonala uri Timotheo na vhaṅwe vha fulufhedzeaho vho vha vha tshi vhilaedziswa nga zwiito zwa vhagunei vhe vha vha vhe vhukati havho. Vhaṅwe Vhakriste vha nga vha vho ḓivhudzisa uri ndi ngani vhenevho vhathu vho tendelwa u vha hone tshivhidzoni. Vhaṅwe vha fulufhedzeaho vha nga vha vho ḓivhudzisa arali Yehova a tshi kona u vhona u fulufhedzea havho khae zwa vhukuma na muhoyo wa vhurabeli ha vhagunei.—Mish. 20:29, 30.

11, 12. Vhurifhi ha Paulo ho khwaṱhisa hani lutendo lwa Timotheo?

¹¹ A zwi timatimisi uri vhurifhi ha Paulo ho khwaṱhisa lutendo lwa Timotheo nga u mu humbudza nga ha zwe zwa itea musi zwi tshi bviselwa khagala uri Aroni a fulufhedzeaho u a ṱanganedzea nahone Kora ane a vha mudzia muhoyo na khonani dzawe vha bvukululwa, vha landulwa nahone vha fheliswa. Zwi re zwone ndi uri Paulo o vha a tshi khou amba uri naho ho vha hu na Vhakriste vha mazwifhi vhukati havho, Yehova u ḓo vhona vha re  vhawe zwa vhukuma, samusi o vha vhona misini ya Mushe.

¹² Yehova ha shanduki na luthihi; ri nga ḓitika ngae. U vhenga u sa luga, nahone nga tshifhinga tshawe u ḓo haṱula vhaitazwivhi vha sa rembuluwi. Samusi Timotheo o vha e muṅwe wa vhane vha “vhidzelela dzina ḽa Yehova,” o dovha a humbudzwa nga ha vhuḓifhinduleli hawe ha u landula ṱhuṱhuwedzo mmbi ya Vhakriste vha mazwifhi. *

13. Ndi fulufhelo ḽifhio ḽine ra nga vha naḽo?

¹³ Na riṋe ri nga khwaṱhiswa nga lwa muya nga maipfi a Paulo o hevhedzwaho. Tsha u thoma, zwi a khwaṱhisa vhukuma u ḓivha uri Yehova u a zwi vhona musi ri tshi fulufhedzea khae. Ha sokou zwi vhona fhedzi a si ite tshithu ngazwo. Nṱhani hazwo, Yehova u na dzangalelo kha vha re vhawe. Bivhili i ri: “Ngauri Yehova maṱo awe a sedza shango ḽoṱhe, uri a vhonadze maanḓa awe kha ane a mu nambatela nga mbilu yoṱhe.” (2 Koron. 16:9) Nga zwenezwo, ri nga vha na fulufhelo ḽo khwaṱhaho ḽa uri zwine ra zwi itela Yehova “nga mbilu yo kunaho” a si zwa fhedzi na luthihi.—1 Tim. 1:5; 1 Vhakor. 15:58.

14. Ndi vhurabeli ha mufuda-ḓe vhune Yehova a si vhu ṱanganedze?

¹⁴ Ndi tsevho kha riṋe u ḓivha uri Yehova ha ṱanganedzi vhurabeli ha muhoyo. Samusi maṱo awe a tshi “sedza shango ḽoṱhe,” a nga kona u vhona vhane mbilu dzavho dza si ‘nambatele’ khae. Mirero 3:32 i ri “Yehova u nengwa nga vhadzia-u-pambuwa,” u fana na vhane vha ḓiita u nga vho luga, ngeno vha tshi khou ita zwivhi vho dzumbama. Naho mudzia-u-pambuwa a tshi nga fhura vhaṅwe vhathu nga vhuṱali lwa tshifhinganyana, maanḓa na u luga ha Yehova zwi khwaṱhisedza uri “Mu-dzumba-zwe-a-tshinya ha vuledzi tshithu.”—Mir. 28:13; vhalani 1 Timotheo 5:24; Vhaheberu 4:13.

15. Ndi mini zwine ra fanela u zwi iledza nahone ndi ngani?

¹⁵ Vhunzhi ha vhathu vha Yehova vho ḓikumedza nga mbilu yoṱhe. A zwo ngo ḓowelea uri vhaṅwe tshivhidzoni vha gwadamele Yehova nga muhoyo. Naho zwo ralo, samusi zwo itea misini ya Mushe na tshifhingani tsha tshivhidzo tsha u thoma tsha Vhakriste, zwi nga itea na kha riṋe na ṋamusi. (2 Tim. 3:1, 5) Naho zwo ralo, naa ri fanela u humbululela Vhakriste nga riṋe, ri timatime arali vha tshi fulufhedzea kha Yehova nga mbilu yoṱhe? Na khathihi! Zwi ḓo vha zwo khakhea u humbulela zwithu ri si na vhuṱanzi nazwo nga ha vhahashu vha tshinnani na vha tshisadzini. (Vhalani Vharoma 14:10-12; 1 Vhakorinta 13:7.) Zwiṅwe hafhu, u vha na nḓowelo ya u sa fulufhela u fulufhedzea ha vhaṅwe tshivhidzoni zwi nga ri vhaisa nga lwa muya.

16. (a) Ndi mini zwine muṅwe na muṅwe washu a fanela u zwi ita u itela u iledza u vha na muhoyo mbiluni yashu? (b) Ndi ngudo ifhio ine ra i wana kha bogisi “ Ni Dzule Ni Tshi Ḓiṱolisisa. . . Ni Dzule Ni Tshi Sumbedza. . . ”?

¹⁶ Mukriste muṅwe na muṅwe u fanela u ‘ṱolisisa mishumo yawe.’ (Vhagal. 6:4) Nga nṱhani ha nḓowelo dzashu mmbi, zwi a leluwa uri ri nambatele mikhuvha mivhi ri sa zwi ṱhogomeli. (Vhaheb. 3:12, 13) Nga zwenezwo, tshifhinga tshoṱhe ri fanela u ṱolisisa zwiṱuṱuwedzi zwashu zwa u shumela Yehova. Ri nga ḓivhudzisa uri: ‘Naa ndi gwadamela Yehova nga nṱhani ha uri ndi a mu funa nahone ndi ṱhogomela vhuvhusahoṱhe hawe? Kana naa ndi livhisa nga maanḓa ṱhogomelo kha phaṱhutshedzo dzine nda fulufhela u ḓiphina ngadzo Paradisoni?’ (Nzumb. 4:11) Vhukuma, roṱhe ri nga vhuyelwa nga u ṱolisisa mishumo yashu na u bvisa muhoyo woṱhe mbiluni dzashu.

17, 18. Ndi ngani ri tshi fanela u gwadamela Yehova nga u fulufhedzea??

¹⁷ Ri a vhuyelwa vhukuma musi ri tshi lwela u fulufhedzea kha vhurabeli hashu. Mupsalme o ri: “Wa mashudu ndi muthu uyo ané Yehova  a si mu vhalele mulandu, ané muyani wawe hu si vhe na tshiné a dzumba.” (Ps. 32:2) Vhukuma, vhane vha bvisa muhoyo mbiluni dzavho vho takala nahone vha ḓo takala nga nḓila yo fhelelaho tshifhingani tshi ḓaho.

¹⁸ Nga u ya ha tshifhinga, Yehova u ḓo bvukulula vhoṱhe vhane vha ita vhuvhi kana vhane vha tshila vhutshilo vhu re kavhili, u ḓo ita uri zwi vhe khagala u “ṱalukanya muvhuya na muvhi, na [u] kona u ṱalukanya we a shumela Yehova na we a si mu shumele.” (Mal. 3:18) Zwa zwino, zwi a ri khwaṱhisa u ḓivha uri “maṱo a Yehova o lavhelesa vho lugaho, na nḓevhe dzawe dzi thetshelesa zwine vha humbela.”—1 Pet. 3:12.