Sendelani Tsini Na Mudzimu

“Yehova, . . . U A Nḓivha”

“A HU NA tshithu tshine tsha vhavha u fhira u ḓivha uri a hu na muthu ane a ri londa kana u ri pfesesa.” * Naa no no vhuya na ḓipfa nga yeneyo nḓila? Naa no no vhuya na ḓipfa u nga a hu na muthu ane a ni londa kana u pfesesa zwine na ṱangana nazwo, na nḓila ine na ḓipfa ngayo? Arali zwo ralo, ni nga khuthadzwa nga u ḓivha uri: Yehova u a londa vhagwadameli vhawe lune a kona u ṱhogomela zwoṱhe zwine zwa itea vhutshiloni havho ha ḓuvha ḽiṅwe na ḽiṅwe. Maipfi a Davida a re kha Psalme ya 139 a ri khwaṱhisedza zwenezwi.

E na vhungoho ha uri Mudzimu u a mu takalela, Davida o ri: “Yehova, U a nṱalukanya, U a nḓivha.” (Ndimana 1) Kha yeneyi ndimana Davida o shumisa tshifanyiso tshavhuḓi. Ḽiiti ḽa Luheberu ḽine ḽa ri “u nṱalukanya” ḽi nga ambela kha u bwa matombo a u ita tsimbi (Yobo 28:3), u ṱola shango (Vhahaṱuli 18:2) kana u sengulusa mulandu (Doiteronomio 13:15). Yehova u ri ḓivha nga nḓila ine zwa nga u ṱolisisa tshithu tshiṅwe na tshiṅwe vhutshiloni hashu. Davida u ri funza uri Mudzimu u na dzangalelo kha vhashumeli vhawe. U a vha ṱolisisa nahone u a vha ḓivha nga muthihi nga muthihi.

Davida o dovha a sumbedza vhukule vhune Mudzimu a ri ṱolisisa ngaho musi a tshi ri: “U dzula hanga na u vuwa hanga U a zwi ḓivha; zwa mbiluni yanga U zwi vhona Ú kule.” (Ndimana 2) Naho Yehova e “kule” ngei ṱaḓulu, u ḓivha u dzula hashu khamusi nga murahu ha ḓuvha ḽi netisaho vhukuma, nahone u ḓivha u vuwa hashu nga matsheloni u itela mishumo yashu ya ḓuvha ḽiṅwe na ḽiṅwe. U dovha a ḓivha zwine ra zwi elekanya, zwine ra zwi funa na zwine ra ṱoḓa u zwi ita. Naa Davida u ḓipfa a songo vhofholowa nga nṱhani ha uri Yehova u dzula o mu sedza? Na khathihi! (Ndimana 23, 24) Ndi ngani a tshi zwi takalela?

Davida u a zwi ḓivha uri Yehova u ṱolisisa vhagwadameli Vhawe nga nṱhani ha zwiitisi zwi pfalaho. Davida o bula zwenezwo zwiitisi musi a tshi ri: “U tshimbila hanga na u lala hanga U a zwi sedza, na nḓila dzanga dzoṱhe dzi khagala phanḓa hau [“u a dzi ḓivha,” NW].” (Ndimana 3) Ḓuvha ḽiṅwe na ḽiṅwe Yehova u vhona ‘nḓila dzashu dzoṱhe’—vhukhakhi hashu na mishumo yashu yavhuḓi. Naa u livhisa ṱhogomelo kha zwivhi kana kha zwivhuya? Ipfi ḽa Luheberu ḽine ḽa ri “sedza” ḽi nga amba u “sefa” kana u “sela,” u fana na musi mulimi a tshi nga sela mungu u itela u wana luvhele. Mubulo une wa ri “u a dzi ḓivha” u ṱalutshedzela ipfi ḽa Luheberu ḽine ḽa nga amba uri “u takalela.” Musi Yehova a tshi ṱolisisa zwithu zwine vhagwadameli vhawe vha zwi amba na u zwi ita ḓuvha ḽiṅwe na ḽiṅwe, u sedza zwivhuya fhedzi. Ndi ngani zwo ralo? Ndi ngauri u takalela vhuḓidini vhune vha vhu ita u itela u mu takadza.

Psalme ya 139 i ri funza uri Yehova u a londa vhukuma vhagwadameli vhawe. U vha ṱolisisa na u vha ṱhogomela ḓuvha ḽiṅwe na ḽiṅwe. Nga zwenezwo, u a ḓivha thaidzo dzine vha sedzana nadzo nahone u a pfesesa vhuṱungu vhune vha vhu pfa nga nṱhani ha dzenedzo thaidzo. Naa ni pfa ni tshi ṱuṱuwedzea u gwadamela Mudzimu ane a ri londa nga yeneyo nḓila? Arali zwo ralo, ni nga vha na vhungoho ha uri Yehova a nga si vhuye a ‘hangwa zwe na shuma na ḓinetisa lufunoni ni tshi itela dzina ḽawe.’—Vha-Heberu 6:10.

[Ṱhaluso i re magumoni a siaṱari]