Pulanete yashu yo itwa zwavhuḓi vhukuma u itela uri i tikedze vhutshilo. I na maḓi manzhi, ane a vha a ndeme vhutshiloni. U kunama na u mona-mona ha shango zwo itelwa u thivhela lwanzhe uri lu si rotholese kana u fhisesa. Dzingamufhe wa shango na maanḓa a maginethe zwi ḽi tsireledza kha masana a re na khombo. Nḓila ine zwimela na zwipuka zwa ḓitika ngayo nga ḽifhasi i a mangadza vhukuma. Nga zwenezwo, vhathu vhanzhi vho phetha nga ḽa uri pulanete yashu yo itwa hu na ndivho.—Vhalani Yesaya 45:18.

Fhedzi ni nga ḓivhudzisa uri, ‘Naa tshengelo na u sa vha na khaṱulokwayo ndi tshipiḓa tsha yeneyo ndivho?’—Vhalani Doiteronomio 32:4, 5.

Ḽifhasi ḽo sikwa uri ḽi vhe haya hu takadzaho ha vhathu vhane vha ṱhonifhana na u funa Musiki wavho. Nga zwenezwo, vhutshilo ha vhathu vhu na ndivho khulwane u fhira pulanete kana vhutshilo ha tshipuka. Ri nga kona u pfesesa uri Musiki washu ndi nnyi nahone ra dzhiela nṱha na u edzisa lufuno na khaṱulokwayo zwawe.—Vhalani Muhuweleli 12:13; Mixa 6:8.

Musiki washu a nga ita uri zwoṱhe zwe a livha u zwi ita zwi ḓadzee. Ngauralo, ri nga vha na vhungoho ha uri u ḓo fhelisa tshengelo na u sa vha na khaṱulokwayo na u ita uri pulanete yashu i vhe haya ho teaho na hu takadzaho vhathu.—Vhalani Psalme ya 37:11, 29; Yesaya 55:11.