Cameron: Ndi takalela u dovha nda ni vhona Jon. Ndi ḓiphina tshifhinga tshoṱhe nga pfunzo ya Bivhili ya vhege iṅwe na iṅwe. * No vuwa hani?

Jon:Ndo vuwa zwavhuḓi.

Cameron: Zwi a takadza u ḓivha uri no vuwa zwavhuḓi. Tshifhingani tsho fhiraho musi ndi fhano ro haseledza uri ndi ngani Ṱhanzi dza Yehova dzi tshi amba uri Muvhuso wa Mudzimu wo thoma u vhusa nga 1914. * Samusi ro zwi haseledza, ro wana vhuṱanzi ha vhuporofita vhune ha vha Bivhilini kha bugu ya Daniele ndima ya 4. Naa ni kha ḓi humbula zwo ṅwalwaho?

Jon: Ho vha hu muloro wa Khosi Nebukadanetsara nga ha muri muhulwane.

Cameron: Zwo tou ralo. Kha muloro wawe, Nebukadanetsara o vhona muri muhulwane une wa ṱoḓa u swika ṱaḓulu. O pfa muḓinḓa wa Mudzimu a tshi mu vhudza uri wonoyo muri u remiwe, fhedzi hu sale tshiguthe na midzi. Musi ho no fhela “miṅwaha miṱanu-na-mivhili” wonoyo muri u ḓo dovha wa aluwa. * Ro dovha ra haseledza uri ndi ngani vhuporofita vhu tshi ḓadzea luvhili. Naa ni a humbula u ḓadzea ha u thoma?

Jon: Ho vha hu zwithu zwe zwa itea kha Nebukadanetsara, a si zwone kani? O xelelwa nga muhumbulo lwa miṅwaha ya sumbe.

Cameron: Zwo tou ralo. Nebukadanetsara o xelelwa nga muhumbulo lwa tshifhinganyana, nga zwenezwo, vhuvhusi hawe ha thithisea. Fhedzi musi honoho vhuporofita vhu tshi ḓadzea nga vhuḓalo, vhuvhusi ha Mudzimu vhu ḓo thithiswa lwa zwifhinga zwa sumbe. Samusi ro zwi vhona, zwifhinga zwa sumbe zwo thoma musi muḓi wa Yerusalema u tshi fheliswa nga 607 B.C.E. U bva tsheetsho, ho vha hu si tsheena mahosi kha ḽifhasi ane a imela vhuvhusi ha Yehova Mudzimu kha vhathu. Naho zwo ralo, mafheleloni a zwifhinga zwa sumbe, Mudzimu o vha a tshi ḓo vhea Muvhusi muswa ane a ḓo vhusa vhathu vhawe—muthu a re ṱaḓulu. Nga maṅwe maipfi, u fhela ha zwifhinga zwa sumbe hu ḓo sumbedza mathomo a vhuvhusi ha Muvhuso wa Mudzimu wa ṱaḓulu. Zwino ro no haseledza uri zwifhinga zwa sumbe zwo thoma lini. Ngauralo, arali ri tshi nga kona u ḓivha uri yeneyo miṅwaha yo fhedza tshifhinga tshingafhani, ri ḓo ḓivha uri Muvhuso wa Mudzimu wo thoma u vhusa lini. Naa ni khou pfesesa zwe ra zwi haseledza u swika zwino?

Jon: Ee, yeneyi mvusuluso yo ita uri ndi kone u zwi humbula.

Cameron: Ndi zwavhuḓi. Kha ri thome khaseledzo yashu nahone ri ṱolisise vhulapfu ha zwifhinga zwa sumbe. Ndi khou tou bva u fhedza u vhala nga ha eneo  mafhungo u itela u ḓihumbudza nga ha zwenezwi zwithu zwa ndeme. Ndi ḓo lingedza u ṱalutshedza nga hune nda nga kona ngaho.

Jon: Zwo luga.

Cameron: Kha u ḓadzea ha u thoma ha vhuporofita vhu kwamaho Nebukadanetsara, zwi tou vha khagala uri zwifhinga zwa sumbe zwo vha zwi miṅwaha ya sumbe ya vhukuma. Fhedzi vhuporofita vhuhulwane vhu kwamaho Muvhuso wa Mudzimu, zwifhinga zwa sumbe zwi fanela u vha zwo lapfa u fhira miṅwaha ya sumbe ya vhukuma.

Jon: Ndi ngani ni tshi ralo?

Cameron: Tsha u thoma, humbulani uri zwifhinga zwa sumbe zwo thoma musi muḓi wa Yerusalema u tshi fheliswa nga 607 B.C.E. Arali ra nga thoma u vhala u bva kha wonoyo ṅwaha, miṅwaha ya sumbe ya vhukuma i ḓo ri livhisa kha ṅwaha wa 600 B.C.E. Fhedzi a hu na tshithu tshi swayeaho tshe tsha itea nga wonoyo ṅwaha malugana na vhuvhusi ha Mudzimu. Samusi ro zwi haseledza mathomoni, miṅwahani ya maḓana musi Yesu e kha ḽifhasi, o sumbedza uri zwifhinga zwa sumbe a zwi athu u fhela.

Jon: Ee, zwi khou pfala. Zwino ndi a zwi humbula.

Cameron: Zwifhinga zwa sumbe zwi fanela u vha zwi tshi katela tshifhinga tshilapfu, nṱhani ha miṅwaha yo ḓoweleaho.

Jon: Ndi tshifhinga tshingafhani?

Cameron: Bivhilini bugu ya Nzumbululo, ine ya tshimbidzana na bugu ya Daniele, i ri thusa u kona u ḓivha vhulapfu ha zwifhinga zwa sumbe. I ṱalusa uri zwifhinga zwiraru na hafu zwi imela maḓuvha a 1 260. * Zwifhinga zwa sumbe—zwine zwa vha zwifhinga zwiraru na hafu zwi tshi vhaliwa kavhili—zwi lingana na maḓuvha a 2 520. Ni khou zwi pfesesa?

Jon: Ee, ndi khou zwi pfesesa. Fhedzi a thi koni u pfesesa uri zwenezwi zwi sumbedza hani uri Muvhuso wa Mudzimu wo thoma u vhusa nga 1914.

Cameron: Zwo luga, kha ri vhone arali ri tshi nga ita uri zwenezwo zwithu zwi pfale. Nga zwiṅwe zwifhinga kha vhuporofita ha Bivhili, ḓuvha ḽi imela ṅwaha. * Arali ra nga shumisa mulayo wa uri ḓuvha ḽithihi ḽi lingana na ṅwaha, zwifhinga zwa sumbe zwi lingana na miṅwaha ya 2 520. Musi ri tshi vhala u bva nga 607 B.C.E., miṅwaha ya 2 520 i ri livhisa kha ṅwaha wa 1914. * Ndi yone nḓila ye ra swikelela ngayo uri 1914, ndi ṅwaha we zwifhinga zwa sumbe zwa fhela ngawo, mathomo a vhuvhusi ha Yesu sa Khosi ya Muvhuso wa Mudzimu. Zwi swayeaho ndi uri u bva nga 1914, ho itea zwithu zwihulwane shangoni—zwiitea zwe Bivhili ya dzula yo zwi amba uri zwi ḓo itea maḓuvhani a vhufhelo.

Jon: Ndi zwiitea zwifhio zwenezwo?

Cameron: Ṱhogomelani zwe Yesu a zwi amba samusi zwo ṅwalwa kha Mateo 24:7. Malugana na tshifhinga tshee a vha a tshi ḓo thoma u vhusa ngatsho ṱaḓulu, Yesu o ri: “Lushaka lu ḓo lwa na luṅwe lushaka; muvhuso wa lwa na muṅwe muvhuso, zwiḽiwa zwi ḓo ṱahela ha vha na midzinginyo fhethu ho fhamba-fhambanaho.” Ṱhogomelani uri Yesu o dzula o amba uri zwiḽiwa zwi ḓo ṱahela ha vha na midzinginyo nga tshenetsho tshifhinga. Shango ḽashu ḽo no vhona dzenedzo tshengelo maḓanani a miṅwaha o fhiraho, a si zwone kani?

Jon: Ndi zwone.

Cameron: Kha ino ndimana, Yesu o dzula o amba nga ha dzinndwa musi a tshi thoma u vhusa sa Khosi ya Muvhuso wa Mudzimu. Bugu ya Bivhili ya Nzumbululo yo dzula yo amba uri dzinndwa a dzi nga  kwami fhethu huthihi fhedzi, fhedzi dzi ḓo kwama shango ḽoṱhe nga tshenetsho tshifhinga tsha maḓuvha a vhufhelo. * Naa ni kha ḓi humbula uri nndwa ya shango ya u thoma yo thoma lini?

Jon: Yo thoma nga 1914, ṅwaha we na ri Yesu o thoma ngawo u vhusa! Ndo vha ndi sa athu u vhuya nda humbula nga ha nḓila ine zwa tshimbidzana ngayo.

Cameron: Musi ri tshi ṱumanya eneo mafhungo oṱhe—vhuporofita nga ha zwifhinga zwa sumbe, u katela na vhuṅwe vhuporofita ha Bivhili ha maḓuvhani a vhufhelo—vhu a ṱumana. Ṱhanzi dza Yehova dzi na vhungoho ha uri Yesu o thoma u vhusa sa Khosi ya Muvhuso wa Mudzimu nga 1914 nahone maḓuvha a vhufhelo o thoma nga wonoyo ṅwaha. *

Jon: Ndi khou lingedza u pfesesa zwenezwi zwoṱhe.

Cameron: Ndi khou ni pfesesa vhukuma. Samusi ndo zwi amba mathomoni, na nṋe zwo ndzhiela tshifhinga u zwi pfesesa nga vhuḓalo. Tsha u fhedza, ndi fulufhela uri nyambedzano yashu yo ni thusa u kona u vhona uri naho ṅwaha wa 1914 u songo ṅwalwa nga ho livhaho Bivhilini, Ṱhanzi dza Yehova dzi thea lutendo lwadzo nga ha wonoyo ṅwaha kha Maṅwalo.

Jon: Ee, zwenezwi ndi zwine zwa ntakadza nga ha inwi, tshiṅwe na tshiṅwe tshine na tshi amba ni tshi tikedza nga luṅwalo. A ni ambi zwine zwa bva muhumbuloni waṋu. Fhedzi ndi a ḓivhudzisa uri ndi ngani zwenezwo zwo serekana. Ndi ngani Mudzimu a songo ri vhudza Bivhilini uri 1914 u ḓo vha ṅwaha une Yesu a ḓo thoma ngawo u vhusa ṱaḓulu?

Cameron: Yeneyo ndi mbudziso yavhuḓi vhukuma Jon. Ngoho ndi ya uri hu na zwithu zwinzhi zwi songo bviselwaho khagala Maṅwaloni. Ndi ngani Mudzimu o ṅwala Bivhili nga nḓila ine ya ita uri vhathu vha ite vhuḓidini u itela u i pfesesa? Khamusi ri nga haseledza nga ha zwenezwo tshifhingani tshi ḓaho.

Jon: Ndi nga zwi takalela zwenezwo.