MUNNA u fanela u tsireledza hani mufumakadzi wawe? Vhathu vhanzhi vha aluwa vha tshi ḓivha uri tshipikwa tshihulwane tsha munna ndi u thusa muṱa wawe uri u vhe wo tsireledzeaho nga zwa dzitshelede. Naho zwo ralo, vhaṅwe vhafumakadzi vhane vha vha na zwithu zwinzhi zwi vhonalaho vha ḓipfa vha songo tsireledzea kha maḓipfele—nahone vho hanganea. Sa tsumbo, mufumakadzi wa Mupania ane a pfi Rosa o amba zwi tevhelaho nga ha munna wawe: “Musi e na vhaṅwe o vha e na vhuthu, fhedzi hayani o vha e munna a si na vhuthu.” Joy ane a bva Nigeria o ri: “Musi ndi sa tendelani na munna wanga, o vha a tshi ri, ‘Ni fanela u ita tshiṅwe na tshiṅwe tshine nda ni vhudza ngauri ndi munna waṋu.’”

Munna a nga ḓadzisa hani vhuḓifhinduleli hawe nga nḓila ya lufuno? Munna a nga ita hani uri muṱa wawe u vhe wo tsireledzeaho, “vhuawelo” ha mufumakadzi wawe?—Ruthe 1:9.

Naho munna na mufumakadzi vha tshi lingana phanḓa ha Mudzimu, Bivhili i amba uri mufarisi muṅwe na muṅwe u na vhuḓifhinduleli vhu sa fani muṱani. Vharoma 7:2 i amba uri mufumakadzi o vhingwaho u fhasi ha “mulayo wa munna wawe.” U fana na madzangano manzhi ane a vhea muthu ane a ḓo ranga phanḓa zwithu, Mudzimu o vhea munna uri a vhe ṱhoho ya mufumakadzi wawe. (1 Vhakorinta 11:3) Vhanna vha fanela u ranga phanḓa miṱa yavho.

Sa vhanna ni fanela u shumisa hani vhuḓifhinduleli haṋu he na ṋewa nga Mudzimu? Bivhili i ri: “Bvelani phanḓa ni tshi funa vhafumakadzi vhaṋu, samusi na Kristo o funa tshivhidzo.” (Vhaefesa 5:25) Vhukuma, naho Yesu Kristo a songo vhinga, tsumbo yawe i nga ni thusa uri ni vhe munna wavhuḓi. Kha ri vhone uri nga nḓila-ḓe.

Yesu o vha a tshi ṱoḓa u khuthadza na u thusa vhaṅwe. Yesu o fulufhedzisa vhoṱhe vhe vha vha vho tsikeledzwa na vhe vha vha vhe na thaidzo dza muthu nga eṱhe, musi a tshi ri: “Iḓani ha nṋe, . . . ndi ḓo ni homolosa.” (Mateo 11:28, 29) Kanzhi o vha a tshi vha thusa musi vha tshi lwala na u vha sendedza tsini na Yehova. Ndi ngazwo vhanzhi vho ḓipfa vhe tsini-tsini na Yesu nahone vha tshi tenda uri u ḓo vha rula mihwalo yavho!

Nḓila ine vhanna vha nga edzisa ngayo Yesu. Sedzani nḓila dzine na nga thusa ngadzo mufumakadzi waṋu kha mushumo une a fanela u u ita. Vhaṅwe vhafumakadzi vha ḓipfa nga nḓila  ye Rosa a ḓipfa ngayo, we a ri: “Ndo vha ndi tshi tou vha mushumi wa munna wanga.” Zwo fhambanaho na zwenezwo, muṅwe munna ane a pfi Kweku ane a vha mbinganoni yavhuḓi, o ri: “Kanzhi ndi vhudzisa mufumakadzi wanga nḓila ine nda nga mu ṱhaḓula ngayo. Ngauri ndi a mu funa, ndi anzela u dzhia vhukando ha u thoma kha u mu thusa nga mishumo ya nḓuni.”

Yesu o vha a tshi humbulela na u pfela vhuṱungu. Lwa miṅwaha ya 12, muṅwe mufumakadzi o vha e na thaidzo khulwane ya mutakalo. Musi a tshi pfa nga ha maanḓa a Yesu a vhuṱolo, “o vha a tshi dzulela u amba uri: ‘Arali nda tou kwama fhedzi zwiambaro zwawe zwa nga nnḓa, ndi ḓo fhola.’” O vha a tshi khou amba ngoho. O ya kha Yesu, a kwama lupendelo lwa tshiambaro tshawe nahone a fhola nga tshenetsho tshifhinga. Naho vhaṱaleli vho phetha nga ḽa uri onoyo mufumakadzi o ita zwe a vha a songo fanela u zwi ita, Yesu o ṱhogomela uri o vha a tshi ṱoḓa thuso. * O mu vhudza, uri: “Ṅwana’nga, . . . u fhole vhulwadze hau.” Ho ngo sokou iledza u mu shonisa kana u mu kaidza fhedzi, fhedzi o pfesesa vhulwadze hawe. O sumbedza uri u munna wa mufuda-ḓe—munna a pfelaho vhuṱungu.—Marko 5:25-34.

 Nḓila ine vhanna vha nga edzisa ngayo Yesu. Musi mufumakadzi waṋu a tshi khou lwala, mu sumbedzeni uri ni a mu ṱhogomela nga ho engedzeaho na u sa mu fhelela mbilu. Lingedzani u vhona zwithu nga nḓila ine a zwi vhona ngayo nahone ni pfesese nḓila ine a aravha ngayo. Sa tsumbo, Ricardo o ri: “Musi ndi tshi ṱhogomela uri mufumakadzi wanga u a ṱavhanya a sinyuwa, ndi ita vhuḓidini ha u sa amba zwithu zwine zwa ḓo mu ita uri a sinyuwe.”

Yesu o vha a tshi davhidzana na vhafunziwa vhawe. Yesu o vha a tshi amba na khonani dzawe. O ri: “Zwithu zwoṱhe zwe nda zwi pfa kha Khotsi anga ndo ni vhudza zwone.” (Yohane 15:15) Ndi ngoho uri nga zwiṅwe zwifhinga Yesu o vha a tshi ṱoḓa u vha e eṱhe a tshi khou humbula na u rabela. Fhedzi o vha a tshi anzela u amba nḓila ine a ḓipfa ngayo na vhafunziwa vhawe. Vhusiku he a vhulahwa sa mutshinyi, o vha vhudza uri o “ṱungufhala zwihulu.” (Mateo 26:38) Naho nḓila ye vha aravha ngayo yo mu shonisa, Yesu ho ngo litsha u amba na khonani dzawe.—Mateo 26:40, 41.

Nḓila ine vhanna vha nga edzisa ngayo Yesu. Vhudzani mufumakadzi waṋu zwine na zwi humbula na nḓila ine na ḓipfa ngayo. Mufumakadzi a nga vhilaela uri munna wawe u vhonala e si na thaidzo ya u amba na vhaṅwe vhathu, fhedzi hayani a tshi ita tshilomo-ndundundu. Kha ḽiṅwe sia, ṱhogomelani nḓila ine Ana a ḓipfa ngayo musi munna wawe a tshi bula mahumbulele awe na nḓila ine a ḓipfa ngayo, o ri: “Ndi ḓipfa ndi tshi funiwa vhukuma nahone ndi tsini nae.”

Iledzani u ita tshilomo-ndundundu kha mufumakadzi waṋu u itela u mu pfisa vhuṱungu. Muṅwe mufumakadzi o amba uri: “Musi munna wanga o ntsinyutshela, u fhedza maḓuvha manzhi a sa ambi na nṋe. U ita uri ndi ḓipfe ndi na mulandu na u sa funwa.” Naho zwo ralo, Edwin u lingedza u edzisa tsumbo ya Yesu. “Musi ndo dinalea a thi fhinduli nga tshenetsho tshifhinga, fhedzi ndi lindela tshifhinga tsho teaho u itela u dzudzanya eneo mafhungo.”

Joy we a bulwa mathomoni o ṱhogomela tshanduko kha munna wawe u bva tshee a thoma u guda Bivhili na Ṱhanzi dza Yehova. Joy o amba uri: “O no shanduka nahone u khou lingedza vhukuma u vha munna wa lufuno ane a edzisa Yesu.” Vhavhingani vhanzhi vha khou vhuyelwa nga vhulivhisi vhu fanaho vhu re Bivhilini. Naa na inwi ni nga takalela u vhuyelwa nga vhulivhisi vhu bvaho Bivhilini? Ni nga humbela pfunzo ya Bivhili ya mahala kha muṅwe wa Ṱhanzi dza Yehova.