•   “China ḽo vhiga uri uno ṅwaha nga tshilimo ho fhisesa u fhira naho hu lini.”—The Guardian, 7 September 2022.

•   “Hoyu ṅwaha u ḓo vha ṅwaha wa vhuṱanu kha zwiṅwe zwipiḓa zwa Afurika hu na gomelelo.”—UN News, 26 August 2022.

•   “Kha mashango a fhiraho hafu a Yuropa ho ambiwa uri hu ḓo vha na gomelelo ḽi fhiraho magomelelo oṱhe e a vhuya a vha hone kha miṅwaha ya 500 yo fhiraho.”—BBC News, 23 August 2022.

 Vhaḓivhi vhanzhi vha humbulela uri gomelelo ḽi ḓo bvela phanḓa ḽi tshi vha hone nahone zwi ḓo tou ṋaṋa vhukuma. Naa ri nga fhulufhela uri hu ḓo vhuya ha vha na vhumatshelo havhuḓi? Bivhili i ri mini nga hazwo?

 Bivhili yo dzula yo amba uri tshifhingani tshine ra khou tshila khatsho:

•   “Hu ḓo vha na . . . nḓala fhethu hunzhi.”—Luka 21:11.

 Kanzhi gomelelo ḽi ita uri hu vhe na ṱhahelelo ya zwiḽiwa. U ṱahela ha zwiḽiwa zwi ita uri vhathu vha tambule na u fa. Musi zwenezwi zwi tshi itea, hu vha hu tshi khou itea zwe Bivhili ya dzula yo zwi amba.—Nzumbululo 6:6, 8.

 Bivhili i a ri vhudza uri ndi mini zwine zwa khou ita uri gomelelo ḽi engedzee. I ri:

•   “[Muthu] ha na maanḓa a u livhisa ṋayo dzawe.”—Yeremia 10:23.

 Zwenezwi zwi amba uri vhathu a vha koni u “livhisa ṋayo [dzavho]” kana u ḓivhusa. Phetho dzavho dzi si dzavhuḓi dzi ita uri hu vhe na gomelelo kana ṱhahelelo ya maḓi.

•   Vhorasaintsi vha tenda uri zwine vhathu vha zwi ita zwi ita uri hu vhe na mufhiso, zwenezwo zwa ita uri hu vhe na gomelelo shangoni ḽoṱhe.

•   Vhathu vhane vha vha na tseḓa na vhane vha ita zwithu vha sa humbuleli ḽa matshelo vha ita uri hu remiwe miri, hu tshikafhadzwe ḽifhasi na u ita uri zwithu zwa kha ḽifhasi zwi si shumiswe nga nḓila yavhuḓi. Zwenezwo zwi ita uri hu vhe na ṱhahelelo ya maḓi.

 Fhedzi Bivhili i ri ṋea fhulufhelo.

 Bivhili i fhulufhedzisa uri Mudzimu u ḓo tandulula thaidzo ya ṱhahelelo ya maḓi. Nga nḓila-ḓe?

1.  1. Mudzimu u ḓo “fhelisa vha tshinyadzaho ḽifhasi.” (Nzumbululo 11:18) U ḓo fhelisa vhathu vhavhi vha re na tseḓa vhane zwiito zwavho zwa tshinyadza ḽifhasi.—2 Timotheo 3:1, 2.

2.  2. “Shango ḽi ḓo vha tivha ḽi re na ṱhanga.” (Yesaya 35:1, 6, 7) Mudzimu u ḓo lugisa zwe zwa tshinywa nga gomelelo nahone u ḓo ita uri ḽifhasi ḽi vhe pharadiso ine ya vha na maḓi manzhi.

3.  3. “U ṱhogomela ḽifhasi, wa ḽi ita uri ḽi vhe na zwibveledzwa zwinzhi zwavhuḓi.” (Phisalema 65:9) Mudzimu u ḓo fhaṱutshedza ḽifhasi ḽa vha na zwiḽiwa zwavhuḓi na maḓi o kunaho a eḓanaho vhathu vhoṱhe.