Nga tshifhinga tsha dzi Olympic dza 2024, hu anganyelwa uri vhathu vha ṱoḓaho u vha biḽioni ṱhanu vha ḓo ṱalela vhathu vho dzhenelelaho kha yeneyi mitambo vha bvaho kha mashango a 206. Vho Thomas Bach vhane vha vha muhulwane wa International Olympic Committee vho ri: “Ri tshipiḓa tsha tshiitea tshine tsha ita uri vhathu u mona na shango ḽoṱhe vha vhe na vhuthihi na mulalo. Kha ri ḓiphiṋe nga tshenetshi tshiitea tshine tsha ṱuṱuwedza uri roṱhe ri tshile nga mulalo ri na vhuthihi hu sa londwi uri ro fhambana.”

 Naa dzi Olympic dzi nga ita uri hu vhe na mulalo na vhuthihi zwa vhukuma? Naa hu na fhulufhelo ḽa uri hu ḓo vhuya ha vha na mulalo na vhuthihi?

 Dzi Olympic dza uno ṅwaha a dzo ngo livhisa ṱhogomelo fhedzi kha zwa mitambo. Dzi khou livhisa ṱhogomelo na kha zwa politiki na zwiṅwe zwithu zwine zwa ita uri vhathu vha si vhe na vhuthihi. Zwiṅwe zwazwo ndi ndugelo dza vhathu, tshiṱalula, u sa farwa zwavhuḓi nga nṱhani ha vhurereli vhune wa vha khaho na u sa farwa ha vhathu nga nḓila ya u fana.

 Zwiitea zwa mitambo zwine zwa kwama mashango manzhi u fana na dzi Olympic, zwi a takadza vhathu. Fhedzi zwenezwi zwiitea zwi dzumbulula uri vhathu vha humbula na u ita zwithu nga nḓila dzine dza ita uri vha si vhe na vhuthihi na u ṱuṱuwedza uri vha bvele phanḓa vha tshi humbula na u ita nga u ralo nṱhani ha uri zwi ḓise mulalo na vhuthihi.

 Bivhili yo dzula yo amba uri vhathu vha ḓo ḓifara nga nḓila ine zwa ḓo ita uri zwi konḓe uri hu vhe na vhuthihi. (2 Timotheo 3:1-5) U itela u ḓivha zwinzhi nga ha honovhu vhuporofita, vhalani thero “Did the Bible Predict the Way People Think and Act Today?”

 Bivhili i ri vhudza nga ha ḽeneḽi fhulufhelo ḽine ra nga ḽi fhulufhela. I fhulufhedzisa uri vhathu vhoṱhe shangoni vha ḓo vha na vhuthihi vhe fhasi ha muvhuso wa ṱaḓulu une wa vhidzwa “Muvhuso wa Mudzimu.”—Luka 4:43; Mateo 6:10.

 Khosi ya wonoyo Muvhuso ane a vha Yesu Kristo, u ḓo ita uri shangoni ḽoṱhe hu vhe na mulalo. Bivhili i ri:

•   “Muvhuya u ḓo bvelela, na mulalo u ḓo anda.”—Phisalema 72:7.

•   “U ḓo tshidza mushai ane a lila a tshi ṱoḓa thuso . . . U ḓo vha lamulela musi vha tshi khou tsikeledzwa na musi vhe khakhathini.”—Phisalema 72:12, 14.

 Na ṋamusi, zwine Yesu a zwi funza zwo ita uri vhathu vha dzimiḽioni vhane vha bva mashangoni a 239 vha vhe na vhuthihi. Sa Vhakriste, Ṱhanzi dza Yehova u mona na shango vho guda u vha na mulalo. U itela u ḓivha uri vho zwi itisa hani, vhalani magazini wa Tshiingamo u re na tshiṱoho “Ni Nga Litsha Hani U Vhenga Vhaṅwe?.”