Musi Bivhili i tshi ṱalusa Haramagedo, i amba uri ndi nndwa ine ya ḓo vha hone vhukati ha Mudzimu na mivhuso yoṱhe. I ḓo kwama ḽifhasi ḽoṱhe, hu si tshipiḓa tshiṱuku fhedzi tsha shango.

•   Mimuya mivhi ndi madimoni ane “a ita vhuṱolo, a ya kha mahosi a ḽifhasi ḽoṱhe, a a kuvhanganyela nndwani ya ḓuvha ḽihulu ḽa Mudzimu Ramaanḓaoṱhe. . . . A kuvhanganyela mahosi fhethu hune nga Tshihevheru ha pfi Haramagedo.”—Nzumbululo 16:14, 16.

 “Haramagedo” ḽi bva kha ipfi ḽa Tshihevheru Har Meghid·dohnʹ, ḽine ḽa amba uri “Thavha Ya Megiddo.” Megiddo ho vha hu ḓorobo ye ya vha i Isiraele tshifhingani tsha kale. Ndi ngazwo vhaṅwe vhathu vha tshi vhona u nga nndwa ya Haramagedo i ḓo lwiwa Isiraele. Fhedzi Megiddo kana Vhubvaḓuvha-kati a si huhulwane lune “mahosi a ḽifhasi ḽoṱhe” na mmbi dzao a nga fhelela.

 Musi bugu ya Nzumbululo itshi ṅwaliwa, ho shumiswa zwifanyiso kana “zwiga.” (Nzumbululo 1:1) Haramagedo a i ambeli kha fhethu ha vhukuma, fhedzi i ambela kha vhuimo ha shango ḽoṱhe vhune tshaka dza ḓo kuvhangana u itela u lingedza u lwa na Muvhuso wa Mudzimu lwa u fhedza.—Nzumbululo 19:11-16, 19-21.