Ṱhogomelani zwi tevhelaho malugana na vharangaphanḓa vha vhurereli vha ḓivheaho na nndwa ine ya vha hone ngei Ukraine:

•   “Murangaphanḓa wa Kereke Ya Russian Orthodox ane a pfi Kirill, ha ngo sasaladza zwine Russia ḽa khou zwi ita kha Ukraine. . . . Kereke yawe yo bvela phanḓa i tshi amba mazwifhi nga ha Ukraine nahone Putin u khou shumisa eneo mazwifhi u itela u ḓiimelela uri ndi ngani ḽa Russia ḽi tshi khou lwa na Ukraine.”—EUobserver, 7 March 2022.

•   “Kirill o imelela zwine Russia ḽa khou zwi ita nga u amba uri yeneyi nndwa ndi nḓila ya u lwa na tshivhi.”—AP News, 8 March 2022.

•   “Nga Musumbuluwo,murangaphanḓa wa Kereke Ya Ukrainian Orthodox ane a pfi Epiphanius Wa U Thoma wa ngei Kyiv, o fhaṱutshedza vhathu vhawe uri vha ‘lwe na maswole a Russia’ . . . [O] ita na u amba uri u vhulaya maswole a Russia a si tshivhi.”—Jerusalem Post, 16 March 2022.

•   “Riṋe [vha Ukrainian Council of Churches and Religious Organizations (UCCRO)] ri khou tikedza mmbi ya Ukraine na vhoṱhe vhane vha khou lwela shango ḽashu. Ri khou fhaṱutshedza zwoṱhe zwine vha khou zwi ita u itela u tsireledza shango ḽashu kha maswina. Ri khou vha rabelela.”—UCCRO a Statement, 24 February 2022.

 Inwi ni zwi vhona hani? Naa vhurereli vhune ha amba uri vhu tevhela Yesu Kristo vhu fanela u ṱuṱuwedza vhatevheli vhaho uri vha lwe? Bivhili i ri mini nga hazwo?

Ḓivhazwakale nga ha vhurereli na nndwa

 Ḓivhazwakale i sumbedza uri vhurereli vhu ḓiita u nga vhu ṱoḓa mulalo ngeno vhu tshi anzela u amba uri a zwo ngo khakhea u ya nndwani, uri ndi zwavhuḓi u ya nndwani kana uri zwo tea uri hu yiwe nndwani. Ndi kale Ṱhanzi dza Yehova vha tshi amba uri zwine vhurereli ha khou zwi ita ndi muhoyo. Ṱhogomelani tsumbo dzi tevhelaho dzi bvaho kha khandiso dzashu.

•   Thero ya Awake! ine ya ri “The Crusades—A ‘Tragic Illusion’” i sumbedza uri Kereke ya Katolika ya Roma yo shela mulenzhe kha u vhulawa ha vhathu vhanzhi, vha tshi ri vha khou zwi itela Mudzimu na Kristo.

•   Thero ya Awake! ine ya ri “The Catholic Church in Africa” i sumbedza tsumbo ya ndila ye vhurereli ha kundelwa ngayo u thivhela nndwa vhukati ha tshitshavha na u vhulawa ha vhathu vhanzhi vha lushaka luthihi.

•   Thero ya Awake! ine ya ri “Is Religion to Blame?,” “Religion’s Role in Man’s Wars,” na ine ya ri “Religion Takes Sides” dzi a ṱalutshedza nḓila ye kereke ya Katolika, ya Orthodox na vharangaphanḓa vha kereke ya Protestant vha tikedza ngayo nndwa nnzhi.

Naa vhurereli ha Vhukriste vhu tea u tikedza nndwa?

 Zwe Yesu a zwi funza: “U tea u funa muhura wau vhunga u tshi ḓifuna.” (Mateo 22:39) “Ni dzule ni tshi funa maswina aṋu.”—Mateo 5:44-47.

 Zwe Yesu a zwi amba: “Muvhuso wanga a si tshipiḓa tsha ḽino shango. Arali Muvhuso wanga wo vha u tshipiḓa tsha ḽino shango, vhatevheli vhanga vho vha vha tshi ḓo vha vho ḓa vha lwa uri ndi si kumedzelwe.” (Yohane 18:36) “Vhoṱhe vhane vha fara banga vha ḓo fa nga banga.”—Mateo 26:47-52.

 Humbulani hezwi: Arali Vhakriste vha songo lwela kana u tsireledza Yesu tshifhinga tsha kale, naa zwo tea uri vha lwe zwino? U itela u vhona nḓila ye Vhakriste vha u thoma vha thetshelesa na u tevhela Yesu ngayo, vhalani thero ine ya ri “Is War Compatible With Christianity?”

Hu ḓo itea mini kha vhurereli vhune ha tikedza nndwa?

 Bivhili i funza uri Yehova ha ṱanganedzi vhurereli vhune ha ri vhu tevhela Yesu ngeno vhu sa ṱanganedzi pfunzo yawe.—Mateo 7:21-23; Tito 1:16.

•   Bugu ya Nzumbululo i sumbedza uri Mudzimu u ḓo vhona honoho vhurereli mulandu nga nṱhani ha “vhoṱhe vhe vha vhulawa kha ḽifhasi.” (Nzumbululo 18:21, 24) U itela u ḓivha uri ndi ngani a tshi ḓo vhona honoho vhurereli mulandu, vhalani thero ine ya ri “What Is Babylon the Great?”

•   Yesu o amba uri vhurereli hoṱhe vhu sa ṱanganedzwi nga Mudzimu vhu ḓo fheliswa nga nṱhani ha mishumo yaho mivhi, sa izwi na miri ine ya aṋwa mitshelo i si yavhuḓi i tshi “remiwa ya poswa muliloni.” (Mateo 7:15-20) U itela u vhona uri zwenezwi zwi ḓo itea hani, vhalani thero ine ya ri “The End of False Religion Is Near!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images