Zwi khagala uri Mikaele ndi dzina ḽa Yesu ḽa musi a sa athu u ḓa kha ḽifhasi na musi o no vhuyelela ṱaḓulu. a Vhuṅwe vhurereli vhu mu vhidza “Mikaele Mukhethwa.” Mikaele o lwa na Saṱhane musi Mushe o no lovha nahone o thusa muruṅwa uri a swikise mulaedza kha muporofita Daniele. (Daniele 10:13, 21; Yuda 9) Mikaele u tshila u tendelana na dzina ḽawe ḽine ḽa amba uri “Ndi Nnyi A Fanaho Na Mudzimu?” Zwenezwi u zwi ita musi a tshi lwela vhuvhusi ha Mudzimu na u lwa na maswina a Mudzimu.​—Daniele 12:1; Nzumbululo 12:7.

 Vhonani uri ndi ngani zwi tshi pfala u tenda uri Yesu ndi ene Mikaele muhulwane wa vharuṅwa.

•   Mikaele ndi “muhulwane wa vharuṅwa.” (Yuda 9) Dzina ḽine ḽa ri “muhulwane wa vharuṅwa,” ḽi bvelela kha vese mbili fhedzi Bivhilini. Kha dzenedzo vese, ḽenelo dzina ḽi shumiselwa kha muthu muthihi, zwine zwa sumbedza uri ndi muruṅwa muthihi fhedzi ane a vhidzwa nga ḽenelo dzina. Iṅwe ya dzenedzo vese i amba uri Murena Yesu “u ḓo tsa a tshi bva ṱaḓulu, u ḓo vhidzelela nga ipfi ḽa muhulwane wa vharuṅwa.” (1 Vhathesalonika 4:16) Yesu u na “ipfi ḽa muhulwane wa vharuṅwa” ngauri ndi ene Mikaele muhulwane wa vharuṅwa.

•   Mikaele u livhisa mmbi ya vharuṅwa. Bivhili i ri: “Mikaele na vharuṅwa vhawe vha lwa na ḽigweṋa,” ḽine ḽa vha Saṱhane. (Nzumbululo 12:7) Mikaele u na maanḓa a u vhusa ṱaḓulu ngauri ndi “muṅwe wa vhakololo vhahulwane.” (Daniele 10:13, 21; 12:1) David E. Aune ane a vha mugudi wa Thestamennde Ntswa o amba uri eneo madzina a ṱalusa Mikaele sa “muhulwane wa mmbi ya vharuṅwa.”

   Bivhili i bula dzina ḽa muthu muthihi uri ndi ene a langa mmbi ya vharuṅwa. I amba nga ha musi “murena Yesu a tshi bva ṱaḓulu e na vharuṅwa vhawe vha maanḓa, e kha mulilo u dugaho, a tshi ḓa u lifhedza.” (2 Vhathesalonika 1:7, 8; Mateo 16:27) Yesu o ya ṱaḓulu nahone “vharuṅwa, vhavhusi na vha re na maanḓa vho itwa uri vha ḓiṱukufhadze khae.” (1 Petro 3:21, 22) Zwi ḓo vha zwi sa pfali uri Mudzimu a vhee Yesu a dovhe a vhee na Mikaele uri vha vhe vhahulwane vha vharuṅwa. Fhedzi zwi a pfala u phetha nga ḽa uri enea madzina mavhili, Yesu na Mikaele a ambela kha muthu muthihi.

•   Mikaele “u ḓo ima” nga “tshifhinga tshi konḓaho.” (Daniele 12:1) Kha bugu ya Daniele, maipfi ane a ri “u ḓo ima” a anzela u shumiswa kha khosi ine ya dzhia vhukando ho khetheaho. (Daniele 11:2-4, 21) Yesu Kristo ane a vhidzwa “Ipfi ḽa Mudzimu,” u ḓo dzhia vhukando ho khetheaho sa “khosi ya mahosi” musi a tshi fhelisa maswina oṱhe a Mudzimu na u tsireledza vhathu vhawe. (Nzumbululo 19:11-16) Zwenezwo u ḓo zwi ita nga tshifhinga tsha “maṱungu mahulu a sa athu u vhuya a vha hone u bva tshee shango ḽa sikwa.”​—Mateo 24:21, 42.